నటనే... నాప్రాణం

కంబాలచెరువు(రాజమహేంద్రవరంసిటీ): నటన అంటే ప్రాణం... అందుకే ఈ రంగంలోకి వచ్చాను.. తెలుగు ప్రేక్షకులు అందించే ప్రేమాభిమానాలతో మనసు ఆనందంతో ఉబ్బితబ్బిబ్బవుతోంది.. అందులోను తూర్పుగోదావరి జిల్లా...ఇక్కడి అందాలు మనసుకు హత్తుకునేలా ఉంటాయంటున్నారు హీరోయిన్‌ రెజీనా. రాజమహేంద్రవరంలోని ఓ ప్రైవేటు ఆస్పత్రి ప్రారంభోత్సవానికి వచ్చిన ఆమె ‘సాక్షి’తో ప్రత్యేకంగా మాట్లాడారు.

ప్రశ్న: సినిమాలపై ఇష్టం ఎలా ఏర్పడింది?
జవాబు:నాకు నటన అంటే చాలా ఇష్టం, ఆ మక్కువతోనే ప్రథమంగా యాంకరింగ్‌ చేసేదాన్ని. తర్వాత ఎస్‌ఎమ్మెస్‌ సినిమా ఆడిషన్స్‌లో నాకు అవకాశం వచ్చింది. ఆ సినిమా మంచి హిట్‌ కావడంతో అప్పటినుంచి ఆఫర్లు రావడం ప్రారంభమయ్యాయి.
ప్రశ్న: ఇప్పటివరకు ఎన్ని సినిమాలు చేశారు?
జవాబు:20 వరకు చేశా.. దాదాపు పెద్దస్థాయి హీరోలందరితోనూ నటించా.
ప్రశ్న:పుట్టిన ఊరు?
జవాబు:చెన్నై
ప్రశ్న:ఏం చదువుకున్నారు?
జవాబు: బీఎస్సీ సైకాలజీ చదివాను, హీరోయిన్‌ కాకపోతే అదే వృత్తిలో కొనసాగేదాన్ని.
ప్రశ్న:ప్రస్తుతం ఏ సినిమాలు చేస్తున్నారు?
జవాబు: నారా రోహిత్‌తో బాలకృష్ణుడు, మరో కొత్త సినిమా ప్రారంభమయ్యింది, తమిళంలో మరో సినిమా చేస్తున్నాను.
ప్రశ్న: రాజమహేంద్రవరం ఇదే రావడమా, ఇక్కడ నచ్చింది ఏమిటి?
జవాబు: శంకర అనే మూవీ షూటింగ్‌కు వచ్చాను. ఇక్కడ పూతరేకులు చాలా బాగున్నాయి.
ప్రశ్న: అవార్డులు..?
జవాబు: సైమా అవార్డుల ఫంక్షన్‌లో బెస్ట్‌ ఫిమేల్‌ అవార్డును శివ మనసులో శృతి అనే సినిమాకు అందుకున్నాను.
ప్రశ్న:మీరు నటించి....మీకు నచ్చిన సినిమాలు?
జవాబు: రవితేజ హీరోగా నటించిన పవర్, సాయిథరమ్‌తేజ్‌ హీరోగా నటించిన పిల్లా నువ్వులేని జీవితం, సుబ్రమణ్యం ఫర్‌ సేల్, సౌఖ్యం, నక్షత్రం, రొటీన్‌ లవ్‌స్టోరీ, కొత్తజంట, రారా కృష్ణయ్య..
ప్రశ్న: చివరిగా ఆడవాళ్లకు.. ఈ గ్లామర్‌ ప్రపంచంలో బయట మహిళలకు మీరిచ్చే సందేశం ఏమిటి?
జవాబు: భయం లేకుండా ముందుకు సాగితే ఆడ, మగా అనే తేడానే ఉండదు. ఎందోరో ఆడవాళ్లు కీర్తి శిఖరాలనధిరోహించారు. వారిని ఆదర్శంగా తీసుకుని, వారి జీవిత చరిత్రలను చదువుతూ వారి బాటలో సాగాలి. ప్రథమంగా స్త్రీకి ధైర్యం కావాలి.