వినతుల పరిష్కారంలో జాప్యం చేయొద్దు

వినతుల పరిష్కారంలో జాప్యం చేయొద్దు

కలెక్టర్‌ స్నేహ శబరీష్‌

హన్మకొండ అర్బన్‌: ప్రజావాణి (గ్రీవెన్స్‌)లో స్వీకరించిన వినతుల పరిష్కారంలో ఆయా శాఖల అధికారులు జాప్యం చెయొద్దని హనుమకొండ కలెక్టర్‌ స్నేహ శబరీష్‌ అధికారులను ఆదేశించారు. సోమవారం కలెక్టరేట్‌లో నిర్వహించిన ప్రజావాణిలో కలెక్టర్‌ స్నేహ శబరీష్‌ నేరుగా పాల్గొని ప్రజల నుంచి వినతులు స్వీకరించారు. ఈసందర్భంగా ప్రజావాణిలో వచ్చిన వినతుల్ని త్వరగా పరిష్కరించుకోవాలని, వచ్చిన వినతులపై తక్షణమే చర్యలు చేపట్టాలని జిల్లాలోని పలువురు తహసీల్దార్లను వీడియో కాన్ఫరెన్స్‌ ద్వారా నేరుగా కలెక్టర్‌ ఆదేశించారు. ప్రజావాణిలో వివిధ శాఖలకు సంబంధించిన మొత్తం 176 దరఖాస్తులు స్వీకరించినట్లు తెలిపారు. కార్యక్రమంలో అదనపు కలెక్టర్‌ వెంకట్‌రెడ్డి, జిల్లా రెవెన్యూ అధికారి వైవీ గణేశ్‌, ఆర్డీఓలు, వివిధ శాఖల అధికారులు పాల్గొన్నారు.

సమస్యలు త్వరగా పరిష్కరించాలి

వరంగల్‌ కలెక్టర్‌ సత్యశారద

న్యూశాయంపేట: ప్రజావాణి దరఖాస్తులను త్వరగా పరిష్కరించాలని వరంగల్‌ కలెక్టర్‌ డాక్టర్‌ సత్యశారద అధికారులకు సూచించారు. సోమవారం కలెక్టరేట్‌లో నిర్వహించిన ప్రజావాణిలో కలెక్టర్‌ ప్రజల నుంచి వినతులను స్వీకరించారు. మొత్తం 130 వినతులు వచ్చాయి. అనంతరం కలెక్టర్‌ మాట్లాడుతూ.. గ్రీవెన్స్‌కు వచ్చిన అర్జీలు త్వరగా పరిష్కరించాలన్నారు. కార్యక్రమంలో అదనపు కలెక్టర్‌ సంధ్యారాణి, డీఆర్‌ఓ విజయలక్ష్మి, జెడ్పీ సీఈఓ రాంరెడ్డి, డీఆర్‌డీఓ, జిల్లా అధికారులు పాల్గొన్నారు.

ప్రభుత్వ భూమిని కాపాడాలి

వరంగల్‌లోని 13వ డివిజన్‌ దేశాయిపేట సీకేఎం కళాశాల గ్రౌండ్‌ను ఆనుకుని 2 ఎకరాల ప్రభుత్వ స్థలం ఉంది. కొందరు గుర్తుతెలియని వ్యక్తులు ఆ భూమిని ఆక్రమించేందుకు ప్రయత్నిస్తున్నారు. ప్రభుత్వ భూమిని కాపాడాలి.

– జన్ను అనిల్‌కుమార్‌, వరంగల్‌

1/1

వినతుల పరిష్కారంలో జాప్యం చేయొద్దు