కోలుకోలేనంత

కష్టమోంథా.. కోలుకోలేనంత è నల్లకాలువ ప్రభావంతో కొత్తపట్నం మండలంలోని అల్లూరు పరిసరాలలో రాకపోకలు నిలిచిపోయాయి. మండలంలోని ఈతముక్కల గ్రామంలో బకింగ్‌ హోం కెనాల్‌ సమీపంలోని వరద నీరు రోడ్ల మీదకు ప్రవహించడంతో రాకపోకలు నిలిచిపోయాయి. è గుండ్లకమ్మకు వరద ఉధృతి పెరిగి పోవడంతో అధికారులు ఒక్కసారిగా 15 గేట్ల నుంచి నీటిని దిగువకు వదిలారు. దీంతో కరవది ఎస్సీ కాలనీ, యానాది కాలనీలు, మహిళా మండలి సెంటర్లోకి వరద నీరు చేరింది. ఉలిచి గ్రామంలోకి గుండ్లకమ్మ నీరు చేరడంతో కాలనీవాసులు భయాందోళనకు గురయ్యారు. కర వది నుంచి ఒంగోలుకు రాకపోకలు బందయ్యాయి. è నాగులప్పలపాడు మండలంలోని గుండ్లకమ్మ పరివాహక ప్రాంతంలోని చదవలవాడ వద్ద చీరాల వెళ్లే జాతీయ రహదారి మీదకు భారీగా వరద నీరు చేరడంతో మూడో రోజు గురువారం కూడా ఒంగోలు నుంచి చీరాల వైపు రాకపోకలు ఆగిపోయాయి. ఈ దారిలో ఆర్టీసీ బస్సులను, ఇతర ప్రైవేట్‌ వాహనాలను పూర్తిగా నిలిపివేశారు. è చీమకుర్తి రూరల్‌ మండలంలో ఎటు చూసినా వరద నీరు కనిపిస్తోంది. è సంతనూతలపాడు మండలంలోని మద్దలూరు చిలకలపాడు గ్రామాల వైపు వెళ్లే ఆర్‌ అండ్‌ బి రహదారులు 80 శాతానికి పైగా కొట్టుకు పోయాయి. దాంతో ఈ దారిగుండా పయనించే ఆర్టీసీ బస్సులను, ఆటోలను నిలిపివేశారు. è టంగుటూరు మండలంలో కారుమంచి, మల్లవరప్పాడు మధ్య ఇప్పటికీ వరద నీరు భారీగా ప్రవహిస్తుండటంతో రాకపోకలు నిలిచాయి. è జరగుమల్లి మండలంలో ముసి వాగు ఉధృతంగా ప్రవహిస్తోంది. పాలేటిపాడు, తూమాడు గ్రామాల మద్య సంబంధాలు తెగిపోయాయి. వావిలేటిపాడు సమీపంలో అడ్డవాగు, గ్రామం పక్కనేవున్న చెరువు ఒకేసారి పారడంతో జరుగుమల్లి వైపు రాకపోకలు నిలిపివేశారు. è కొండపి మండలంలోని కొండపి, అనకర్లపూడి గ్రామాల మద్య అట్లేరు వాగు పొంగి ప్రవహిస్తోంది. అనకర్లపూడి, మద్దులూరు గ్రామాల మద్య ముసి ఉధృతితో కే.ఉప్పలపాడు, నిడమానూరు మధ్య రాకపోకలు స్తంభించాయి. కొండపి నుంచి ఒంగోలుకు రాకపోకలు ఆగడంతో ప్రజలు ఇబ్బందులు పడుతున్నారు. è దర్శి నియోజకవర్గంలోని ముండ్లమూరు మండలం వేముల నుంచి ఉల్లగల్లు వెళ్లే దారిలో వాగు ఉధృతంగా ప్రవహిస్తోంది. ఈ రెండు గ్రామాల మద్య రాకపోకలకు ఇబ్బంది ఏర్పడింది. కురిచేడు మండలంలోని వినుకొండరోడ్డు నుంచి పడమర వీరాయపాలెం వెళ్లే దారిలో కుండపోత వర్షాలకు రహదారి కోతకు గురైంది. è మార్కాపురం మండలం నాగులవరం గ్రామం వద్ద రోడ్డుపై ఇప్పటికీ గుండ్లకమ్మ ప్రవాహం తగ్గలేదు. మార్కాపురం వెళ్లే దారిలేక ప్రజలు ఇబ్బందులకు గురవుతున్నారు. అత్యవసర పరిస్థితిలో వున్న వారు ప్రత్యామ్నాయంగా నికరంపల్లి గ్రామం వెళ్లి అటునుంచి దేవరాజుగట్టు మీదుగా చుట్టూ 12 కిలోమీటర్లు ప్రయాణించి మార్కాపురం చేరుకుంటున్నారు.

తుఫాన్‌ బీభత్సం అనంతరం నేటికీ జలదిగ్బంధంలోనే గ్రామాలు