పల్నాడు

న్యూస్‌రీల్‌

భారీగా పెరిగిన కేంద్రాల నిర్వహణ వ్యయం ఇప్పటికీ 2022 ధరలకు అనుగుణంగానే బిల్లులు చెల్లింపు నేడు మూడు రెట్లు పెరిగిన నిత్యావసరాల ధరలు కేంద్రాల నిర్వహణ కష్టసాధ్యమంటున్న కార్యకర్తలు కేంద్రాల నిర్వీర్యం దిశగా చంద్రబాబు ప్రభుత్వం అడుగులు

2022లో అప్పటి వైఎస్సార్‌ సీపీ ప్రభుత్వంలో ముఖ్యమంత్రిగా వైఎస్‌ జగన్‌ మోహన్‌రెడ్డి పెంచిన ధరలనే ఇప్పటికీ కొనసాగిస్తూ పిల్లలకు పోషకాహారాన్ని అందిస్తున్నారు.దీంతో పిల్లలకు సరైన పోషకాహారం అందించలేక అంగన్‌వాడీ కార్యకర్తలు అవస్థలు ఎదుర్కొంటున్నారు.

2022 ఫిబ్రవరి నెలలో అప్పటి వైఎస్సార్‌ సీపీ ప్రభుత్వం పెంచిన ధరల ఆధారంగానే నేటికీ మధ్యాహ్న భోజన బిల్లులు చెల్లిస్తూ ఉండడంతో గర్భిణులు, బాలింతలు, చిన్నారులకు పౌష్టికాహారం అందించేందుకు అంగన్‌వాడీ కార్యకర్తలు సతమతమవుతున్నారు.

ప్రీస్కూల్‌ పిల్లల ఆహారం కోసం కూరగాయలు, ఆకుకూరలు, పసుపు, చింతపండు, కారం, పోపులు తదితర సామగ్రిని ఎప్పటికప్పుడు సిద్ధం చేసుకోవాలి. వీటి కొనుగోలుకు రోజుకు ఒక చిన్నారికి వారానికి రూ.1.50 చొప్పున ప్రభుత్వం చెల్లిస్తుంది. పెరిగిన ధరలకు ఇవి ఏమాత్రం సరిపోవడం లేదని అంగన్‌వాడీ కార్యకర్తలు వాపోతున్నారు.

గ్యాస్‌ సిలిండర్‌కు నెలకు రూ.450 చొప్పున ఇస్తున్నారు. ప్రస్తుతం సిలిండర్‌ ధర రూ. 950 కు కొనుగోలు చేస్తున్నారు. 2022తో పోల్చితే నేడు నిత్యవసరాల ధరలు మూడు రెట్లు పెరిగాయి. అలాగే గ్యాస్‌ ధర కూడా సుమారు రూ. 500 వరకు పెరిగింది.

మెనూ ప్రకారం పౌష్టికాహారం అందించేందుకు అంగన్‌వాడీ సిబ్బంది ఆవేదన వ్యక్తం చేస్తున్నారు. అంగన్‌వాడీ కేంద్రాలను పరిశుభ్రంగా ఉంచేందుకు సబ్బులు, చీపుర్లు, చాపలు, తదితర సామగ్రి కొనుగోలుకు ప్రభుత్వం నిధులు అందజేయాలి.

చంద్రబాబు సర్కార్‌ నిర్వహణ ఖర్చులను ఇవ్వకపోవడంతో కార్యకర్తలు చేతి చమురు వదిలించుకొని వీటిని కొనుగోలు చేస్తున్నారు. ఇప్పటికై నా ప్రభుత్వం స్పందించి ప్రస్తుత ధరల ప్రకారం అంగన్‌వాడీ కేంద్రాల నిర్వహణకు బిల్లులు పెంచాలని అంగన్‌వాడీ కార్యకర్తలు కోరుతున్నారు.