రాహుల్‌ పర్యటనకు టీపీసీసీ ఏర్పాట్లు

కాంగ్రెస్‌ పార్టీ అధ్యక్షుడు రాహుల్‌ గాంధీ

సాక్షి, హైదరాబాద్‌: ఏఐసీసీ అధ్యక్షుడు రాహుల్‌గాంధీ రాష్ట్ర పర్యటన కోసం తెలంగాణ ప్రదేశ్‌ కాంగ్రెస్‌ కమిటీ(టీపీసీసీ) భారీ ఏర్పాట్లు చేస్తోంది. ఈ నెల 13,14 తేదీల్లో తెలంగాణలో పర్యటించేందుకు రాహుల్‌ అంగీకరించడంతో ఆ రెండు రోజుల్లో వివిధ చోట్ల సభలు, సమావేశాలు నిర్వహించాలని యోచిస్తోంది.

రాహుల్‌ గాంధీ ఎక్కడెక్కడ పర్యటించాలన్న దానిపై టీపీసీసీ అధ్యక్షుడు ఉత్తమ్‌కుమార్‌రెడ్డి పార్టీ నేతలతో చర్చలు జరుపుతున్నారు. కాగా, హైదరాబాద్, రంగారెడ్డి జిల్లాలకే రాహుల్‌ పర్యటనను పరిమితం చేయాలని నిర్ణయించిన టీపీసీసీ ఆ దిశగా అన్ని ఏర్పాట్లు చేసుకుంటోంది.  

మహిళా సంఘాలతో సమావేశం
టీపీసీసీ వర్గాలు అనధికారికంగా వెల్లడించిన వివరాల ప్రకారం 13న మధ్యాహ్నం 2 గంటలకు శంషాబాద్‌ విమానాశ్రయంలో రాహుల్‌ దిగనున్నారు. అక్కడనుంచి కార్యకర్తలు మోటార్‌సైకిళ్ల ర్యాలీతో ఆయనకు స్వాగతం పలకనున్నారు. ఆ తర్వాత రాజేంద్రనగర్‌లో మహిళా సంఘాలతో ఏర్పాటు చేసిన సమావేశానికి హాజరవుతారు. అనంతరం శేరిలింగంపల్లి నియోజకవర్గంలో నిర్వ హించే బస్సుయాత్రలో ఆయన పాల్గొంటారు. ఆ తర్వాత నాంపల్లి నియోజకవర్గంలో సభ నిర్వహిస్తారు. అనంతరం ముస్లిం ప్రముఖులు, మేధావులతో సమావేశమవుతారు. హోటల్‌ హరితప్లాజాలో ఆ రాత్రి బస చేస్తారు.  

పెద్దమ్మగుడిలో పూజలు..ప్యారడైజ్‌లో లంచ్‌  
ఇక, 14వ తేదీ ఉదయం జూబ్లీహిల్స్‌లోని పెద్దమ్మగుడికి వెళ్లి రాహుల్‌ పూజలు చేస్తారు. అక్కడి నుంచి జూబ్లీహిల్స్, ఖైరతాబాద్‌ నియోజకవర్గాల సమావేశాల్లో పాల్గొంటారు. ఆ తర్వాత వ్యాపార ప్రముఖులు, పత్రికా సంపాదకులతో వేర్వేరుగా సమావేశమవుతారు. అక్కడి నుంచి ప్యారడైజ్‌ హోటల్‌లో లంచ్‌ చేస్తారు. అనంతరం ఉస్మానియా విశ్వవిద్యాలయంలో విద్యార్థులతో సమావేశమవుతారు.

సికిం ద్రాబాద్, సనత్‌నగర్, గోషామహల్‌ నియోజకవర్గాల్లో పర్యటిస్తారు. ఆ తర్వాత కులీకుతుబ్‌షా స్టేడియంలో జరిగే సమావేశంలో పాల్గొంటారు. మదీనా హోటల్‌లో రాత్రి విందు అనంతరం ఢిల్లీకి తిరుగుపయనమవుతారు. అయితే, ఈ షెడ్యూల్‌లో కొన్ని మార్పు చేర్పులు ఉండే అవకాశముందని, సోమవారం నాటికి తుది షెడ్యూల్‌ ఖరారవుతుందని టీపీసీసీ వర్గాలు చెబుతున్నాయి. రాహుల్‌గాంధీ కార్యాలయం అంగీకారం తెలిపిన అనంతరం మంగళవారం షెడ్యూల్‌ను అధికారికంగా ప్రకటిస్తారని సమాచారం.