TV
లాక్డౌన్ వ‌ల్ల క‌డుపు నిండా తిన‌లేని వారి సంఖ్య పెరుగుతోంది. నాలుగు మెతుకులు సంపాదించేందుకు ఉన్న ప‌ని కూడా కోల్పోయిన వారి సంఖ్య అధిక‌మ‌వుతోంది. ప్ర‌తీ న‌లుగురిలో ముగ్గురు నిరుద్యోగులుగా మిగిలిపోతున్నార‌ని ఓ అధ్యయనం నిగ్గు తేల్చింది. దేశంలో వివిధ రంగాల‌కు చెందిన 67 శాతం మంది ఉపాధి కోల్పోయార‌ని విస్తుపోయే విష‌యాల‌ను వెల్ల‌డించింది. అజీజ్ ప్రేమ్‌జీ యూనివర్సిటీ లాక్డౌన్ వ‌ల్ల వ‌చ్చిన మార్పుచేర్పుల‌పై అధ్యయనం చేసింది. ఏప్రిల్ 13 నుంచి మే 9 వ‌ర‌కు చేసిన స‌ర్వేలో 12 రాష్ట్రాల్లోని 3970 మందిపై ప‌రిశోధ‌న చేసింది. దీని ఫ‌లితాల‌ను మంగ‌ళ‌వారం వెల్ల‌డించింది.
ఈ మేర‌కు డా. రోసా అబ్ర‌హం మాట్లాడుతూ.. లాక్డౌన్.. ప్ర‌జ‌ల పోష‌ణ, ఆరోగ్యంపై తీవ్ర ప్ర‌భావం చూపుతోంద‌ని ఆందోళ‌న వ్య‌క్తం చేసింది. ఈ ప్ర‌భావం దీర్ఘ‌కాలికంగా ఉండే అవ‌కాశ‌ముంద‌ని హెచ్చ‌రించింది. "ప్ర‌స్తుత ప‌రిస్థితుల్లో ఎటువంటి ఆదాయం లేక‌పోవ‌డంతో సాధార‌ణ జ‌నం ఉన్న‌వాటితోనే బ‌తుకు వెల్ల‌దీసుకుంటున్నారు. ఈ క్ర‌మంలో ఆహారాన్ని సాధార‌ణ ప‌రిమాణం క‌న్నా త‌క్కువ మోతాదులో తీసుకుంటున్నారు. ఇది దీర్ఘ‌కాలిక ప్ర‌భావం చూపుతుంది. ముఖ్యంగా బాలిక‌ల్లో ఎక్కువ ఎఫెక్ట్ చూపుతుంది. 50 రోజుల లాక్డౌన్ ప్ర‌జ‌ల జీవనాన్ని వెన‌క్కు నెట్టివేసింద"ని అంటూ విచారం వ్య‌క్తం చేసింది. (కరోనా : ట్విటర్‌ సంచలన నిర్ణయం)
స‌ర్వే వెల్ల‌డించిన మ‌రిన్ని అంశాలు..
► ఇంట్లో ఉన్న స‌రుకులు నిండుకుండ‌టంతో పేద‌వాళ్లు క‌డుపు మాడ్చుకుంటూ బ‌తుకు వెల్ల‌దీస్తున్నారు.
► అర్బ‌న్ ప్రాంతాల్లో సుమారు 80 % మంది ఉద్యోగాలు కోల్పోతే, గ్రామీణ ప్రాంతాల్లో ఇది 58 శాతంగా ఉంది.
► ఇక లాక్డౌన్ పీరియ‌డ్‌లో 43 నుంచి 57 శాతం మంది వ‌ల‌స కూలీల‌కు య‌జ‌మానుల నుంచి చిల్లిగ‌వ్వ అంద‌లేదు.
► 90% మంది రైతులు త‌మ పంట‌ను మ‌ద్ద‌తు ధ‌ర‌కు అమ్మ‌‌డం లేదు
► ప‌ట్ట‌ణాల్లో 43శాతం, గ్రామీణ ప్రాంతంలో 34 శాతం మంది అత్యావ‌స‌రాల కోసం అప్పు తీసుకుంటున్నారు.
► న‌గ‌రాల్లో 86% రూర‌ల్ ప్రాంతాల్లో 54% వ‌చ్చే నెల అద్దె చెల్లించే స్థితిలో లేరు.
► సానుకూల అంశ‌మేమిటంటే 86% మంది జ‌నాలు ప్రభుత్వం అందిస్తున్న రేష‌న్ స‌దుపాయాన్ని వినియోగించుకుంటున్నారు. అయితే వారిలో స‌గాన్నిక‌న్నా త‌క్కువ మందికి ప్ర‌భుత్వ న‌గ‌దు అంద‌లేదు. ప‌ట్ట‌ణ, గ్రామీణ ప్రాంతాల్లో 60 శాతానికి పైగా ప్ర‌జ‌ల‌కు జ‌న్‌ధ‌న్ ఖాతాలు లేవు. (అటు సడలింపులు.. ఇటు వలసలు)
