పాకిస్థాన్‌లో మోదీ ప్రయోజనాలకు పెద్దపీట: ఇమ్రాన్ ఖాన్

భారతదేశ ప్రధానమంత్రి నరేంద్రమోదీ ప్రయోజనాలకు పాక్ ప్రధాని నవాజ్ షరీఫ్ పెద్దపీట వేస్తున్నారని పాక్ మాజీ క్రికెటర్, పాకిస్థాన్ తెహరీక్ ఎ ఇన్సాఫ్ పార్టీ అధ్యక్షుడు ఇమ్రాన్ ఖాన్ ఆరోపించారు. ఇస్లామాబాద్‌లో ఇమ్రాన్ పార్టీ తలపెట్టిన భారీ ర్యాలీని ప్రభుత్వం ఉక్కుపాదాలతో అణిచేసి, వందమందికి పైగా అనుచరులను అరెస్టుచేయడంతో ఆయన మండిపడ్డారు. నవాజ్ షరీఫ్ లండన్ ఆస్పత్రిలో గుండె ఆపరేషన్ చేయించుకోడానికి వెళ్లినప్పుడు ఆయన ముందుగా తన తల్లి, పిల్లలకు కాకుండా నరేంద్రమోదీకి ఫోన్ చేశారని ఆయన అన్నారు. సమాచార శాఖ మంత్రి పర్వేజ్ రషీద్‌పై వేటు వేశారు గానీ, అత్యంత రహస్య సమాచారాన్ని ఆయన తనంతట తానుగా మీడియాకు లీక్ చేయలేరని, నవాజ్ చెబితేనే చేశారన్న విషయం అందరికీ తెలుసని ఇమ్రాన్ ఆరోపించారు. అవినీతిపరుడైన ప్రధానమంత్రిని కాపాడేందుకు ప్రభుత్వ యంత్రంఆగం మొత్తం పనిచేస్తోందని తెలిపారు. ఒక నిందితుడు ప్రధానమంత్రిగా ఉండేందుకు తాను ఒప్పుకోనన్నారు. తాను బతికున్నంత కాలం నవాజ్ షరీఫ్ అవినీతిపై పోరాడుతూనే ఉంటానని ఇమ్రాన్ (64) చెప్పారు.