ఎల్‌వీబీ, ఇండియాబుల్స్‌ హౌసింగ్‌ విలీనానికి ఆర్‌బీఐ నో

న్యూఢిల్లీ: లక్ష్మీ విలాస్‌ బ్యాంకు(ఎల్‌వీబీ)లో, గృహ రుణాల సంస్థ ఇండియాబుల్స్‌ ఫైనాన్స్‌ విలీన ప్రతిపాదనకు ఆర్‌బీఐ అనుమతిని నిరాకరించింది. ఇండియాబుల్స్‌ హౌసింగ్‌ ఫైనాన్స్, ఇండియాబుల్స్‌ కమర్షియల్‌ క్రెడిట్‌లను లక్ష్మీ విలాస్‌ బ్యాంకులో స్వచ్ఛంద విలీనానికి చేసుకున్న దరఖాస్తును ఆమోదించడం లేదంటూ ఆర్‌బీఐ ఈ నెల 9న(బుధవారం) లేఖ ద్వారా తెలియజేసినట్టు స్టాక్‌ ఎక్సే్ఛంజ్‌లకు లక్ష్మీ విలాస్‌ బ్యాంకు తెలియజేసింది. విలీనానికి అనుమతి కోరుతూ ఎల్‌వీబీ ఈ ఏడాది మే 7న దరఖాస్తు చేయడం గమనార్హం. కాగా, భారీగా ఎగబాకిన మొండిబకాయిలు, తగినంత మూలధనం లేకపోవడం వంటి ప్రతికూలతను ఎదుర్కొంటున్న నేపథ్యంలో ఎల్‌వీబీపై ఇటీవలే ఆర్‌బీఐ ఆంక్షలు విధించిన సంగతి తెలిసిందే.