ఏసీబీ వలలో అటవీ ఉద్యోగి

ఏలూరు (టూటౌన్), న్యూస్‌లైన్ :సీజ్ చేసిన వాహనాలకు విడుదల ఉత్తర్వులు ఇచ్చేందుకు రూ.10 వేలు డిమాండ్ చేసిన అటవీ శాఖ ఉద్యోగి జె.సుజాత అవినీతి నిరోధక శాఖ వలలో చిక్కింది. రూ.5 వేలు లంచం తీసుకుంటుండగా ఏసీబీ అధికారులు గురువారం ఆమెను రెడ్‌హ్యాండెడ్‌గా పట్టుకున్నారు. ఏసీబీ డీఎస్పీ ఐ.వెంకటేశ్వర్లు తెలిపిన వివరాల ప్రకారం... ఏలూరు అటవీ శాఖ కార్యాలయంలో జె.సుజాత సీనియర్ అసిస్టెంట్‌గా పనిచేస్తోంది. దెందులూరు మండలం గాలాయిగూడెంకు చెందిన కె.సుబ్బరావు గత ఏడాది నవంబర్ 3న తన ట్రాక్టర్‌పై పుల్లల లోడు వేసుకుని వెళ్తుండగా, జంగారెడ్డిగూడెం డివిజన్ అటవీ శాఖ అధికారులు పట్టుకున్నారు. ఆ ట్రాక్టర్‌ను సీజ్ చేశారు. అదే గ్రామానికి చెందిన శ్రీనివాస్ అనే వ్యక్తి ట్రాక్టర్‌పై పుల్లల  లోడుతో వెళ్తుండగా, అదే నెల 11న కామవరపుకోట వద్ద జంగారెడ్డిగూడెం డివిజన్ అధికారులు దానిని కూడా సీజ్‌చేశారు. ఆ రెండు ట్రాక్టర్లను తడికలపూడిలోని అటవీ శాఖ నర్సరీలో పెట్టారు.