దొంగనోట్ల చెలామణి కేసులో ఆరుగురి అరెస్ట్

విజయనగరం టౌన్, న్యూస్‌లైన్ : డెంకాడ మండలం అయినాడ సమీపంలో దొంగనోట్లు చెలామణి చేస్తున్న ఆరుగురు ముఠా సభ్యులను అరెస్టు చేసి రిమాండ్‌కు తరలిస్తున్నట్లు ఎస్పీ కార్తికేయ తెలిపారు. శుక్రవారం జిల్లా పోలీసు కార్యాలయంలో ఏర్పాటు చేసిన విలేకరుల సమావేశంలో ఇందుకు సంబంధించిన వివరాలను ఆయన వెల్లడించారు. గురువారం రాత్రి దొంగనోట్లు చెలామణి చేస్తున్న వారిని ఓ  పాన్‌షాపు యజమాని గుర్తించి డెంకాడ పోలీసులకు సమాచారమివ్వడం, పోలీసులు రంగప్రవేశం చేసి వారిని అదుపులోనికి తీసుకోవడ ం విదితమేనన్నారు. ఈ మేరకు వారి వద్ద నుంచి రూ.13 వేలు విలువ గల నకిలీ కరెన్సీ నోట్లను స్వాధీనం చేసుకున్నట్లు తెలిపారు. నకిలీ కరెన్సీతోపాటు రూ.11,500 అసలు నగదును, ఒక ఆటోను, ఆరు సెల్‌ఫోన్లను స్వాధీనం చేసుకున్నామన్నారు.