TV
తూకంలో తేడాపై రోడ్డెక్కిన రైతులు
సిరిసిల్లఅర్బన్‌: ఐకేపీ ద్వారా విక్రయించిన సన్‌ఫ్లవర్‌ పంట తూకంలో తేడాపై ఇల్లంతకుంట మండలానికి చెందిన రైతులు శనివారం కలెక్టరేట్‌ వద్ద ఆందోళనకు దిగారు. మండలంలోని ముస్కానిపేట, గాలిపల్లి, చిన్నకేసన్నపల్లి, పత్తికుంటపల్లి, తాళ్లపల్లి గ్రామాలకు చెందిన సుమారు 50 మంది రైతులు కలెక్టరేట్‌కు తరలివచ్చారు. వారు మాట్లాడుతూ ఐకేపీ ద్వారా విక్రయించిన సన్‌ఫ్లవర్‌ పంట తూకంలో వచ్చిన క్వింటాళ్లు మార్క్‌ఫెడ్‌ తీసుకున్న తూకానికి తేడా వస్తుందన్నారు. ఒక్కో రైతుకు మూడు క్వింటాళ్ల వరకు నష్టం జరుగుతుందని ఆవేదన వ్యక్తం చేశారు. ఈ విషయాన్ని కలెక్టర్‌ సందీప్‌కుమార్‌ ఝా దృష్టికి తీసుకెళ్లగా వెంటనే స్పందించి డీఆర్‌డీవో శేషాద్రిని పిలిపించి తూకంలో తేడాలపై విచారణ చేపట్టి రిపోర్టు ఇవ్వాలని ఆదేశించారు. అనంతరం రైతులు డీఆర్డీవోకు వివరాలతో కూడిన వినతిపత్రం అందించారు. సుధాకర్‌రెడ్డి, ఐదు గ్రామాల రైతులు తదితరులు పాల్గొన్నారు.
డీఆర్డీవోకు వినతిపత్రం
