అడ్రస్‌ చెప్పమంటూ మెడకు కత్తి..

అడ్రస్‌ చెప్పమంటూ మెడకు కత్తి..

తిరువొత్తియూరు: మహిళా ఉపాధ్యాయిని అడ్రస్‌ చెప్పమని కోరుతూ వృద్ధుడి మెడపై కత్తి పెట్టి హత్యా బెదిరింపులకు పాల్పడిన యువకుడిని పోలీసులు అరెస్టు చేశారు. చెన్నై, పూందమల్లి సమీపంలో గురువారం సాయంత్రం 7గంటలకు మహిళా ఉపాధ్యాయిని అడ్రస్‌ చెప్పాలని కోరుతూ ఓ యువకుడు వృద్ధుడి మెడపై కత్తి పెట్టి బెదిరించాడు.

అక్కడున్న వారిలో ఒకరు వృద్ధుడిని రక్షించేందుకు యువకుడిపై రాయి విసిరాడు. ఆ యువకుడు తప్పుకోవడంతో రాయి వృద్ధుడికి తగిలి గాయమైంది. ఆ యువకుడు దాదాపు 30 నిమిషాల వరకు వృద్ధుడి మెడపై నుంచి కత్తి తీయలేదు. చివరకు స్థానికులు యువకుడిని చుట్టుముట్టి పట్టుకొని పూందమల్లి పోలీసులకు అప్పగించారు. విచారణలో పట్టుబడిన యువకుడు పార్తిబన్‌ అని, ఆ వృద్ధుడు ఉపాధ్యాయిని తండ్రి అని తెలిసింది. పార్తిపన్‌ మానసిక స్థితి సరిగా లేదని తెలిసింది. అతన్ని అదుపులోకి తీసుకున్న పోలీసులు కీల్పాక్కం ప్రభుత్వ ఆసుపత్రికి తరలించారు. గాయపడిన వృద్ధుడిని చికిత్స కోసం ప్రభుత్వ ఆసుపత్రిలో చేర్చారు.