ప్రపంచంలోనే ఎత్తైన వంతెన.. ఇండియాలో..

చినాబ్‌ నదిపై నిర్మిస్తోన్న రైల్వే వంతెన నమూనా

కౌరీ: చరిత్ర సృష్టించనున్న నిర్మాణానికి కొంకణ్‌ రైల్వే శ్రీకారం చుట్టింది. ప్రపంచంలోనే అత్యంత ఎత్తయిన రైలు వంతెన నిర్మాణ పనులను ఇండియన్‌ రైల్వే ప్రారంభించింది. నిర్మాణంలో భాగంగా ఆర్చ్‌ పనులను సోమవారం ప్రారంభించారు. ఈ వంతెన నిర్మాణం పూర్తయితే, ప్రపంచంలోనే అత్యంత ఎత్తయిన బ్రిడ్జీగా చరిత్ర పుటలకెక్కుతుంది. దీన్ని కశ్మీర్‌ లోయలోగల చినాబ్‌ నదిపై నిర్మిస్తున్నారు. ఈ నదికి 359 మీటర్ల ఎత్తులో వంతెన నిర్మితమవుతోంది.

ఈ వంతెన కుతుబ్‌ మినార్‌ కంటే ఐదు రెట్లు ఎత్తు, ఈఫిల్‌ టవర్‌ కంటే 30 మీటర్ల ఎక్కువ ఎత్తులో ఉంటుంది. ప్రతిష్టాత్మకంగా చేపట్టిన ఉధమ్‌పూర్‌– శ్రీనగర్‌– బారాముల్లా రైల్‌ లింక్‌ ప్రాజెక్టులో భాగంగా ఈ వంతెనను నిర్మిస్తున్నారు. ఇది కట్రా–ధరమ్‌ రైల్వే డివిజిన్‌ పరిధికి 73 కిలోమీటర్లు, కట్రాకు 65 కిలోమీటర్ల దూరంలో ఉంటుంది. ఈ ప్రాజెక్టు కోసం మొత్తం రూ.5,005 కోట్లను వెచ్చిస్తున్నారు. మొత్తం 1,315 మీటర్ల పొడవుగల వంతెన నిర్మాణానికి 25 వేల మిలియన్‌ టన్నుల స్టీల్‌ను ఉపయోగిస్తున్నామని, పనులు చాలా వేగంగా సాగుతున్నట్టు కొంకణ్‌ రైల్వే జనరల్‌ మేనేజర్‌ రాజేష్‌ అగర్వాల్‌ వెల్లడించారు.