తాతయ్య జయంతికి టీజర్‌

తెలుగు సినిమా ఖ్యాతిని దశదిశలా వ్యాపింపజేసి, అత్యధిక భాషల్లో చిత్రాలు నిర్మించి ‘గిన్నిస్‌ బుక్‌ ఆఫ్‌ రికార్డ్స్‌’ లో స్థానం పొందిన ఏకైక నిర్మాత డి.రామానాయుడు. ఈనెల 6న ఆయన జయంతి.  ఆ రోజున ఆయన మనవడు రానా తాజా చిత్రం ‘నేనే రాజు నేనే మంత్రి’ టీజర్‌ను విడుదల చేయనున్నారు. రానా, కాజల్‌ జంటగా తేజ దర్శకత్వంలో సురేశ్‌ బాబు, కిరణ్‌ రెడ్డి, భరత్‌ చౌదరి ఈ చిత్రం నిర్మించారు.

రానా మాట్లాడుతూ– ‘‘తాతగారి జయంతిన ‘నేనే రాజు నేనే మంత్రి‘ టీజర్‌  విడుదల చేస్తుండటం సంతోషంగా ఉంది. ఈ సినిమాలో నేను పోషిస్తున్న జోగేంద్ర పాత్ర స్వభావాన్ని టీజర్‌లో పరిచయం చేస్తున్నాం’’ అన్నారు. ‘రానా పర్సనాలిటీని మాత్రమే కాదు.  అతడిలోని నటుణ్ణి పూర్తి వైవిధ్యంగా ఈ చిత్రంలో రీ ప్రజెంట్‌ చేస్తున్నా’’ అన్నారు తేజ. ‘రానా కెరీర్‌ లో మరో మైలురాయిగా నిలిచిపోయే చిత్రమిది’ అన్నారు సురేశ్‌బాబు. ఈ చిత్రానికి సంగీతం:  అనూప్‌ రూబెన్స్, కెమెరా: వెంకట్‌ సి. దిలీప్, ఎగ్జిక్యూటివ్‌ నిర్మాతలు:  అభిరామ్‌ దగ్గుబాటి, వివేక్‌ కూచిబొట్ల, సమర్పణ: డి. రామానాయుడు.