బస్సు ఆపలేదని విద్యార్థుల ఆందోళన

విజయనగరం: ఆర్టీసీ బస్సు ఆపడంలేదని విద్యార్థులు రోడ్డుపైన ఆందోళనకు దిగారు. విజయనగరం సమీపంలోని కోదాడపేట వైపు నుంచి ఆర్టీసీ బస్సు మంగళవారం ఉదయం నగరంలోకి వస్తోంది. కోదాడ పేటలో 30 మంది విద్యార్థులు బస్సు కోసం వేచి ఉండగా ఖాళీ లేకపోవడంతో డ్రైవర్ బస్సును ఆపకుండా ముందుకు పోనిచ్చాడు. దాంతో విద్యార్థులు ఒక్కసారిగా బస్సుకు అడ్డంగా వచ్చారు. దీంతో డ్రైవర్, కండక్టర్‌లతో వాగ్వివాదానికి దిగారు. రోడ్డు పై బైఠాయించి తమను ఎక్కించుకోవాలని ఆందోళన చేపట్టారు. బస్సులు సక్రమంగా ఆపడంలేదని, కాలేజీ, స్కూళ్లకు వెళ్లడానికి ఇబ్బంది పడుతున్నామని విద్యార్థులు తెలిపారు.