మెట్‌పల్లి కాంగ్రెస్‌లో సీనియర్‌ నాయకుల తిరుగుబాటు

● నియోజకవర్గ ఇన్‌చార్జి నర్సింగరావు వ్యవహారశైలిపై అసంతృప్తి ● నామినేటెడ్‌ పోస్టుల్లో పార్టీ కేడర్‌కు అన్యాయం చేస్తున్నారని విమర్శలు ● అధిష్టానానికి ఫిర్యాదు చేస్తామని వెల్లడి ● మున్సిపల్‌ ఎన్నికల్లో పలు వార్డుల్లో కాంగ్రెస్‌ టికెట్లు ఆశించి భంగపడిన నాయకులు రెబెల్స్‌గా బరిలోకి దిగారు. వారి వల్ల ఐదారు చోట్ల కాంగ్రెస్‌ అభ్యర్థులు ఓటమి పాలయ్యారు. వీరిలో సీనియర్‌ నాయకులు కూడా ఉన్నారు. ● నర్సింగరావు రెబెల్స్‌ను బుజ్జగించి పోటీ నుంచి తప్పించే ప్రయత్నాలు చేయకపోవడం వల్లనే తాము ఓడిపోయామనే భావనలో వారు ఉన్నారు. ● ఓడిపోయిన నేతలను ఆయన ఇంతవరకు కలిసి చర్చించకపోవడం.. పార్టీ కార్యక్రమాల్లో తగిన ప్రాధాన్యం ఇవ్వకపోవడం వంటివి వారిలో అసంతృప్తికి దారి తీసింది. ● వీటికి తోడు ఇటీవల జరిగిన మున్సిపల్‌ కో–ఆప్షన్‌ సభ్యుల ఎన్నికల్లో బీఆర్‌ఎస్‌ మాజీ కౌన్సిలర్‌కు కాంగ్రెస్‌ మద్దతు ఇచ్చి గెలిపించింది. కాంగ్రెస్‌లో ఎంతోమంది ఈ పదవులను ఆశించినప్పటికీ వారిని కాదని బీఆర్‌ఎస్‌కు చెందిన వ్యక్తికి మద్దతు ఇవ్వడం వారిలో ఆగ్రహానికి కారణమైంది. ● ఇవన్నీ సమావేశంలో చర్చించిన వారంతా.. ఆయనతో తాడోపేడో తేల్చుకోవాలనే ఆలోచనలో ఉన్నట్లు తెలిసింది. ● పట్టణంలోని కాంగ్రెస్‌ సీనియర్లు ఏకమై నర్సింగరావుపై అధిష్టానానికి ఫిర్యాదు చేస్తామని ప్రకటించడంపై ఆయన మద్దతుదారులు గుర్రుగా ఉన్నట్లు తెలిసింది. ● మంగళవారం వారి విమర్శలకు ధీటుగా సమాధానం ఇవ్వాలని నిర్ణయించినట్లు సమాచారం. ● మొత్తానికి మెట్‌పల్లి కాంగ్రెస్‌లో జరుగుతున్న పరిణామాలు రాబోయే రోజుల్లో ఎటు దారి తీస్తాయన్నది ఆసక్తికరంగా మారింది.