సాక్షి, రంగారెడ్డి జిల్లా: టీఎస్‌పీఎస్సీ నిర్వహించిన టీఆర్‌టీ ద్వారా ఎంపికైన స్కూల్‌ అసిస్టెంట్, లాంగ్వేజ్‌ పండిట్‌ అభ్యర్థులకు శనివారం కౌన్సెలింగ్‌ నిర్వహించిన జిల్లా విద్యాశాఖ అధికారులు.. ఇదే రోజు నియామక పత్రాలు అందజేశారు. వీరంతా బోధనా వృత్తిలో చేరుతుండడంతో సర్కారు బడుల్లో విద్య గాడిలో పడనుంది. ఖైరతాబాద్‌లోని జిల్లా పరిషత్‌ సమావేశ మందిరంలో జిల్లా విద్యాశాఖాధికారి కె.సత్యనారాయణరెడ్డి చేతుల మీదుగా కొత్త టీచర్లు పోస్టింగ్‌ ఆర్డర్లు అందుకున్నారు. ఉమ్మడి జిల్లా వ్యాప్తంగా 1,269 ఉపాధ్యాయ పోస్టుల భర్తీకి గతేడాది టీచర్‌ రిక్రూట్‌మెంట్‌ టెస్ట్‌ (టీఆర్‌టీ) నిర్వహించిన విషయం తెలిసిందే. ఏ వివాదాలు లేని 251 స్కూల్‌ అసిస్టెంట్, లాంగ్వేజ్‌ పండిట్‌ పోస్టుల భర్తీకి ప్రభుత్వం గ్రీన్‌ సిగ్నల్‌ ఇచ్చింది. 235 మందికి అధికారులు కౌన్సెలింగ్‌ నిర్వహించి పోస్టింగ్‌ ఆర్డర్లు ఇచ్చారు. ఇక కోర్టు వివాదాల నేపథ్యంలో 915 ఎస్‌జీటీ, 16 పీఈటీ పోస్టుల భర్తీ ప్రక్రియను పక్కనబెట్టారు. ఈ కేసు కూడా తేలితే సర్కారు బడులకు మహర్దశ పట్టనుంది. విద్యార్థులకు నాణ్యమైన, గుణాత్మక విద్య పూర్తిస్థాయిలో లభించనుంది.   గడువులోపు చేరకుంటే పోస్టింగ్‌ రద్దు..  టీఆర్‌టీ కౌన్సెలింగ్‌కు గైర్హాజరైన 16 మంది అభ్యర్థుల ఇళ్లకు పోస్టింగ్‌ ఆర్డర్లను పోస్టు ద్వారా జిల్లా విద్యాశాఖ పంపనుంది. 15 రోజుల్లోపు వీరు తమకు కేటాయించిన స్కూళ్లలో రిపోర్ట్‌ చేయాల్సి ఉంటుంది. నిర్దిష్ట గడువులోపు విధుల్లో చేరకుంటే ఆ పోస్టింగ్‌లను రద్దు చేస్తామని జిల్లా విద్యాశాఖాధికారి కె.సత్యనారాయణ రెడ్డి తెలిపారు.   వీవీల సేవలకు స్వస్తి  తాజాగా ఆయా బడులకు శాశ్వత టీచర్లు రానుండడంతో.. ప్రస్తుతం అక్కడ పనిచేస్తున్న విద్యా వలంటీర్లను తొలగించనున్నారు. వీవీల నియామక సమయంలోనూ ఈమేరకు ప్రభుత్వం స్పష్టంగా పేర్కొంది. శాశ్వత టీచర్లు విధుల్లోకి వచ్చేవరకు పనిచేయాల్సి ఉంటుందని, ఆ తర్వాత విధులకు స్వస్తి చెప్పాల్సి ఉంటుందని వీవీలకు విద్యాశాఖ అధికారులు కూడా వివరించారు. ఈ నేపథ్యంలో దాదాపు 200 పైచిలుకు వీవీలు తప్పుకోనున్నారు. అయితే, వీరిని ఖాళీలు ఉన్న బడుల్లో సర్దుబాటు చేస్తారా? లేదా.. లేకా విధుల నుంచి తొలగిస్తారా.. అనే విషయం తేలాల్సి ఉంది. ఈ విషయమై పాఠశాల విద్య డైరెక్టరేట్‌కు లేఖ రాస్తామని విద్యాశాఖ వర్గాలు వెల్లడించాయి.   రోస్టర్‌ లొల్లి  స్కూళ్ల కేటాయింపులో రోస్టర్‌ విధానం పాటించకపోవడంపై కొందరు అభ్యర్థులు, ఉపాధ్యాయ సంఘాల నేతలు తీవ్ర అభ్యంతరం వ్యక్తం చేశారు. కేవలం మెరిట్‌ ప్రాతిపదికన పోస్టింగ్‌లు ఇవ్వడంతో వెనుకబడిన, ఎస్సీ, ఎస్టీ, బీసీ అభ్యర్థులకు అన్యాయం జరిగిందని మండిపడ్డారు. అంతేకాకుండా సుదూర ప్రాంతాల్లోని పాఠశాలల్లో పోస్టింగ్‌లు దక్కాయని ఆవేదన వ్యక్తం చేశారు. రోస్టర్‌ విధానం పాటించి ఉంటే సమీపంలోని స్కూళ్లను ఎంపిక చేసుకునే అవకాశం దక్కేదని భావిస్తున్నారు. అయితే, మరోపక్క ప్రభుత్వం సూచించిన నియమనిబంధనల ప్రకారమే అభ్యర్థులకు పోస్టింగ్‌లు దక్కాయని విద్యాశాఖ అధికారులు పేర్కొంటున్నారు.    


 ఏలూరు సిటీ : ఉపాధ్యాయ పోస్టుల భర్తీ ప్రక్రియలో మొదటి అంకం ముగిసింది. జిల్లా ఎంపిక కమిటీ (డీఎస్సీ)-14 పరీక్షకు దరఖాస్తులు వెల్లువలా వచ్చిపడ్డాయి. జిల్లాలో 123 స్కూల్ అసిస్టెంట్ (ఎస్‌ఏ), 341 సెకండరీ గ్రేడ్ టీచర్ (ఎస్జీటీ), 68 లాంగ్వేజ్ పండిట్ (ఎల్‌పీ) పోస్టులుఉండగా, మొత్తంగా 30వేల 17మంది అభ్యర్థులు దరఖాస్తులు సమర్పించారు. నోటిఫికేషన్‌లో పేర్కొనని పోస్టులకు సైతం 2,081 దరఖాస్తులు అందటం విశేషం. దరఖాస్తులను ఈనెలాఖరు నాటికి పూర్తిస్థాయిలో పరిశీలించి డీఎస్సీ పరీక్ష రాసేందుకు అర్హులైన అభ్యర్థుల జాబితాను రూపొందిస్తారు. జిల్లాలో విలీనమైన కుకునూరు, వేలేరుపాడు నుంచి అన్ని కేటగిరీలకూ 138 దరఖాస్తులు మాత్రమే అందాయి. జిల్లా వ్యాప్తంగా స్కూల్ అసిస్టెంట్ కేటగిరీ పోస్టులకు 22,760 దరఖాస్తులు రాగా, సెకండరీ గ్రేడ్ పోస్టులకు 2,798 మంది, భాషా పండిట్ పోస్టులకు 2,378 దరఖాస్తులు అందాయి. పోటాపోటీజిల్లాలో 601 ఉపాధ్యాయ పోస్టులు ఉండగా, వాటిలో 532 పోస్టులు మాత్రమే భర్తీ చేయనున్నారు. స్కూల్ అసిస్టెంట్ కేటగిరీలో కేవలం 123 పోస్టులు మాత్రమే ఉండటంతో పోటీ తీవ్రంగా మారింది. ఒక్క స్కూల్ అసిస్టెంట్ సోషల్ సబ్జెక్టుకు సంబంధించి గరిష్టంగా 9,154 మంది అభ్యర్థులు పోటీపడనున్నారు. రెండో ర్యాంకులో స్కూల్ అసిస్టెంట్ గణితం సబ్జెక్టు టీచర్ల పోస్టులకు 5,010 మంది అభ్యర్థులు దరఖాస్తు చేశారు. తెలుగు పండిట్ పోస్టులకు 2,289 మంది రంగంలో ఉన్నారు.
  
  పోస్టుల వారీగా  వచ్చిన దరఖాస్తులు ఇలా
  స్కూల్ అసిస్టెంట్ కేటగిరీలో గణితం సబ్జెక్టు 17 పోస్టులకు 5,010, బయోలాజికల్ సైన్స్ 22 పోస్టులకు 3,702, సోషల్ స్టడీస్ 51 పోస్టులకు 9,154, ఇంగ్లిష్ 6 పోస్టులకు 1,082, తెలుగు 19 పోస్టులకు 2,503, హిందీ 4 పోస్టులకు 1,259, సంస్కృతం 3 పోస్టులకు 21, ఉర్దూలో ఒక్క పోస్టుకు 29 చొప్పున దరఖాస్తులు అందాయి. భాషా పండిట్ తెలుగులో 20 పోస్టులకు 2,289, ఉర్దూ 36 పోస్టులకు 15 దరఖాస్తులు మాత్రమే వచ్చాయి, సంస్కృతం 12 పోస్టులకు 74 దరఖాస్తులు అందాయి. సెకండరీ గ్రేడ్ తెలుగు ప్లెయిన్ ఏరియాలో 305, ఏజెన్సీలో 36 పోస్టులకు 2,798 దరఖాస్తులు వచ్చాయి.