సాంటెండర్‌ (స్పెయిన్‌): ప్రపంచ జూనియర్‌ బ్యాడ్మింటన్‌ చాంపియన్‌షిప్‌ అండర్‌ –19 పురుషుల సింగిల్స్‌ విభాగంలో భారత టీనేజర్‌ శంకర్‌ ముత్తుస్వామి రన్నరప్‌గా నిలిచాడు. ఆదివారం జరిగిన ఫైనల్లో చెన్నైకు చెందిన 18 ఏళ్ల శంకర్‌ 14–21, 20–22తో కువాన్‌ లిన్‌ (చైనీస్‌ తైపీ) చేతిలో ఓడిపోయాడు. 30 ఏళ్ల ఈ మెగా ఈవెంట్‌ చరిత్రలో రజత పతకం నెగ్గిన నాలుగో భారతీయ ప్లేయర్‌గా శంకర్‌ నిలిచాడు. గతంలో జూనియర్‌ మహిళల సింగిల్స్‌లో అపర్ణ పోపట్‌ (1996లో), సైనా (2006లో)... జూనియర్‌ పురుషుల సింగిల్స్‌లో సిరిల్‌ వర్మ (2015) ఫైనల్లో ఓడి రజతం సాధించారు. 2006లో రన్నరప్‌గా నిలిచిన సైనా 2008లో విజేతగా నిలువగా... గురుసాయిదత్‌ (2008లో), సాయిప్రణీత్, ప్రణయ్‌ (2010లో), సమీర్‌ వర్మ (2011లో), లక్ష్య సేన్‌ (2018లో) సెమీఫైనల్లో ఓడి కాంస్యాలు గెలిచారు.  చదవండి: Special Story: ఉరికే జలపాతం.. ఉత్తుంగ తరంగం.. సెరీనా విలియమ్స్‌


 సింగిల్స్‌లో సాయమ్, వైష్ణవిలకు రన్నరప్
 
  సాక్షి, హైదరాబాద్: తెలంగాణ-ఏపీ రాష్ట్రాల జూనియర్ బ్యాడ్మింటన్ టోర్నమెంట్‌లో బాలికల డబుల్స్ టైటిల్‌ను టాప్ సీడ్ వైష్ణవి-అర్చన (రంగారెడ్డి) జోడీ కైవసం చేసుకుంది. బాలుర సింగిల్స్‌లో సాయమ్ బోత్రా, బాలికల సింగిల్స్‌లో వైష్ణవి రన్నరప్‌తో సరిపెట్టుకున్నారు. విశాఖపట్టణంలోని పోర్ట్ స్టేడియంలో ఆదివారం జరిగిన ఫైనల్ పోటీలతో ఈ ఈవెంట్ ముగిసింది. అండర్-17 బాలికల డబుల్స్ తుదిపోరులో టాప్‌సీడ్ కె.వైష్ణవి-బి.అర్చన జంట 22-20, 21-14తో రాష్ట్రానికే చెందిన రెండో సీడ్ శ్రీచందన (మెదక్)-ప్రణాలి కరణి (హైదరాబాద్) జంటపై గెలుపొందింది.
 
 దీంతో ప్రణాలి జోడీ రన్నరప్‌గా నిలిచింది. బాలికల సింగిల్స్ ఫైనల్లో టాప్ సీడ్ వైష్ణవి (రంగారెడ్డి) 16-21, 12-21తో రెండో సీడ్ ఎం.తనిష్క్ (గుంటూరు) చేతిలో పరాజయం చవిచూసింది. అంతకుముందు జరిగిన సెమీస్‌లో వైష్ణవి 21-18, 21-16తో హేమధ్రుతి (వైజాగ్)పై, తనిష్క్ 21-13, 21-8తో శ్రీచందన (మెదక్)పై నెగ్గారు. బాలుర సింగిల్స్ ఫైనల్లో నాలుగో సీడ్ సాయమ్ బోత్రా (హైదరాబాద్) 22-20, 16-21, 12-21తో టాప్ సీడ్ జగదీశ్ (వైజాగ్) చేతిలో కంగుతిన్నాడు.
 
 సెమీస్‌లో సాయమ్ 21-17, 20-22, 21-17తో రెండో సీడ్ ఆదిత్య బాపినీడు (ఖమ్మం)పై, జగదీశ్ 15-21, 21-17, 21-16తో చంద్రకుమార్ (తూర్పు గోదావరి)పై గెలుపొందారు. బాలుర డబుల్స్ ట్రోఫీని అంజన్ సాయి (పశ్చిమ గోదావరి)-ఎస్.కె.గౌస్ (నెల్లూరు) జోడీ గెలుచుకుంది.