breaking news
bc hostal
-
ఏ పూటకాపూట
సాక్షి, హైదరాబాద్: సంక్షేమ గురుకులాలు, హాస్టళ్లు, కస్తూర్బా విద్యాలయాలు, ఆదర్శ పాఠశాలల్లో చదువుతున్న విద్యార్థులకు ప్రభుత్వం నిర్దేశించిన మెనూ ప్రకారం టిఫిన్, భోజనం అందడం లేదు. నూరుశాతం పోషక విలువలున్న ఆహారాన్ని అందించాలని ప్రభుత్వం ప్రత్యేక మెనూ రూపొందించి ఆదేశించినా, సరుకుల కొరత కారణంగా ఆహార పంపిణీ గాడి తప్పింది. ఏపూటకాపూట అందుబాటులో ఉన్న సరుకులతో వండివార్చుతున్నారు. విద్యా సంస్థల్లో డిమాండ్కు తగిన సరుకుల ఇండెంట్ ప్రతి నెలా ముందస్తుగా సమర్పిస్తున్నా, ఆ మేరకు సరుకులు పంపిణీ చేయడంలో కాంట్రాక్టర్లు విఫలమవుతున్నారు.ప్రస్తుత విద్యా సంవత్సరంలో సరుకుల పంపిణీకి ‘నేషనల్ ఫెడరేషన్ ఆఫ్ ఫార్మర్స్ ప్రొక్యూర్మెంట్, ప్రాసెసింగ్ అండ్ రీటెయిలింగ్ కోఆపరేటివ్ ఆఫ్ ఇండియా లిమిటెడ్ (నాకాఫ్) కాంట్రాక్టు బాధ్యతలు స్వీకరించింది. కనీసం పక్షం రోజుల ముందే క్షేత్రస్థాయి నుంచి విద్యా సంస్థల వారీగా ఇండెంట్ సమర్పిస్తున్నారు. సెప్టెంబర్ నెలకు సంబంధించిన డిమాండ్ అధికారులు సమర్పించినా, కాంట్రాక్టు సంస్థ పంపిణీ చేయడంలో పూర్తిగా విఫలమైంది. అక్టోబర్ నెలలో కొన్నిచోట్ల అరకొరగా సరుకులు పంపిణీ చేయగా, నవంబర్లోనూ ఇదే పరిస్థితి పునరావృతమవుతోంది. దీంతో విద్యార్థులకు మెనూ ప్రకారం భోజనం అందించకుండా... అందుబాటులో ఉన్నవాటితో సరిపెడుతున్నారు.ఆదిలాబాద్ జిల్లా అదనపు కలెక్టర్ (స్థానిక సంస్థలు) సోమ రాజేశ్వర్ ఏకంగా కాంట్రాక్టు సంస్థకు లేఖ రాస్తూ.. పదిరోజుల్లోగా డిమాండ్కు సరిపడా సరుకులన్నీ పంపిణీ చేయాలని స్పష్టం చేశారు.బోండా, బజ్జీ, పూరి బంద్... బూస్ట్, బిస్కెట్, చిక్కిలకు బ్రేక్రాష్ట్రవ్యాప్తంగా గురుకుల విద్యా సంస్థలు, కేజీబీవీలు, మోడల్ స్కూళ్లు, హాస్టళ్లలో వంట సరుకుల పంపిణీకి ఈ ఏడాది కేంద్రీకృత విధానాన్ని అమల్లోకి తెచ్చింది. 2026–27 విద్యాసంవత్సరానికి విద్యార్థులకు నాణ్యమైన భోజనం, వంట కోసం అవసరమైన నిత్యావసర వస్తువుల సరఫరా బాధ్యతను నాకాఫ్కు ప్రాజెక్టు పర్యవేక్షణ యూనిట్ (పీఎంయూ) అప్పగించింది.విద్యార్థులకు ఉదయం పూట బూస్ట్తో కూడిన పాలు ఇస్తారు. కొన్నిచోట్ల టీ కూడా ఇస్తున్నారు. బూస్టు, టీ పౌడర్, పంపిణీ కాకపోవడం, కొన్నిచోట్ల చక్కెర కూడా ఇవ్వకపోవడంతో విద్యార్థులకు ఈ మేరకు కోత పడింది.ఉదయం పూట ఇచ్చే టిఫిన్లకు మైదా పంపిణీ కాకపోవడంతో బోండా, బజ్జీ, పూరి పూర్తిగా నిలిచిపోయింది. దీనికి బదులుగా ఉప్మా మాత్రమే ఇస్తున్నారు.సాయంత్రం పూట ఇచ్చే చిరుతిళ్లలో చిక్కి (పల్లీపట్టి) ఇస్తుండగా, ఇప్పుడు స్నాక్స్ ఎగ్గొడుతున్నారు. ఉమ్మడి ఆదిలాబాద్, కరీంనగర్, నిజామాబాద్ జిల్లాల్లో ఈ పరిస్థితి ఎక్కువగా ఉంది.రాష్ట్రంలోని చాలా చోట్ల కందిపప్పు సరఫరా లేదు. దీంతో పప్పు కూర, పప్పు చారు నిలిచిపోయింది. ఇప్పటివరకు ఎస్సీ ఎస్టీ, బీసీ, మైనార్టీ గురుకుల విద్యాలయాల్లో 40 శాతం సరుకుల సరఫరా ఆగినట్లు సిబ్బంది చెబుతున్నారు.సరుకుల సరఫరా నిర్లక్ష్యంపై మంత్రి అడ్లూరి తీవ్ర ఆగ్రహంగురుకుల విద్యా సంస్థల్లో విద్యార్థులకు యూనిఫాంతో పాటు ప్రొవిజన్స్, ఇతర వస్తువుల పంపిణీ బాగా వెనుకబడి ఉండడంపై రాష్ట్ర ఎస్సీ, ఎస్టీ సంక్షేమ శాఖ మంత్రి అడ్లూరి లక్ష్మణ్ కుమార్ తీవ్ర ఆగ్రహం వ్యక్తం చేశారు.గురుకులాలకు సరఫరా చేస్తున్న ప్రతి వస్తువు నాణ్యతను క్షుణ్ణంగా పరిశీలించాలని, సరఫరా చేసిన వస్తువులు నాణ్యతా ప్రమాణాలకు అనుగుణంగా ఉన్నాయా? వాటిని పరిశీలించి ధ్రువీకరిస్తున్న అధికారులు ఎవరు? ప్రతి విద్యాసంస్థలో సరుకుల స్వీకరణ, నిల్వ, పంపిణీ బాధ్యతలను ఎవరు పర్యవేక్షిస్తున్నారు? అనే అంశాలపై అన్ని శాఖల అధిపతులు (హెచ్ఓడీలు) సమగ్ర నివేదిక సమర్పించాలన్నారు. ప్రతి జిల్లా నుంచి నోడల్ అధికారి నివేదిక ఇవ్వాలని, బఫర్ స్టాక్ తప్పనిసరి నిర్వహించాలన్నారు. ఈనెల 25వ తేదీ నాటికి స్పష్టమైన పురోగతితో నివేదిక ఇవ్వాలని, ఆరోజున సమీక్షించి తగిన చర్యలు తీసుకుంటానన్నారు.ఇదీ చదవండి: గ్రీన్కార్డ్ కలలో కరుగుతున్న కాలం! -
మరో మూడు బీసీ హాస్టళ్ల మూసివేత..!
కలెక్టర్కు నివేదిక అందజేసిన అధికారులు ఆరుకు చేరిన సంఖ్య హన్మకొండ అర్బన్: విద్యార్థులు లేని కారణంగా గత ఏడాది మూడు బీసీ హాస్టళ్లను మూసివేసిన అధికారులు తాజాగా మరో మూడింటికి కూడా తాళం వేసేందుకు సిద్ధమయ్యారు. విద్యా సంవత్సరం ప్రారంభమై రెండు నెలలు గడుస్తున్నా ఒక్క విద్యార్థి కూడా బీసీ హాస్టళ్లలో చేరేందుకు ఆసక్తి చూపడం లేదు. దీంతో వాటిని మూసివేసేందుకు అనుమతి ఇవ్వాలని బీసీ సంక్షేమ శాఖ జిల్లా అధికారులు కలెక్టర్కు నివేదిక పంపించారు. ఒకటి, రెండు రోజుల్లో కలెక్టర్ నుంచి ఉత్తర్వులు రాగానే బచ్చన్నపేట, మహ బూబాబాద్, నల్లబెల్లి మండలంలోని నాచినపల్లి బీసీ బాలుర హాస్టళ్లను అధికారులు మూసివేయనున్నారు. ఇదిలా ఉండగా, గత ఏడాది జిల్లాలోని మూడు హాస్టళ్లను విద్యార్థులు లేక మూసివేసిన విషయం తెలిసిందే. తాజాగా మరో మూడు హాస్టళ్లు కూడా మూతపడేందుకు సిద్ధంగా ఉండడంతో వాటి సంఖ్య ఆరుకు చేరినట్లయింది. కాగా, జిల్లాలోని మరికొన్ని హాస్టళ్లలో కూడా ప్రసుత్తం విద్యార్థుల సంఖ్య తక్కువగా ఉంది. దీంతో ఈ సంఖ్యను పెంచుకునేందుకు వార్డెన్లకు ఈ నెలాఖరువరకు కలెక్టర్ గడువు విధించారు. నెలాఖరు తర్వాత కూడా విద్యార్థుల సంఖ్య కనీసం 30 మందికి దాటకుంటే వాటిని కూడా మూసివేసి ఉన్న వారిని పక్క హాస్టళ్లకు తరలించేందుకు ఏర్పాట్లు చేస్తున్నారు. ఈ లెక్కన జిల్లాలో మరో ఐదు నుంచి ఆరు వసతిగృహాలు కూడా మూత పడే అవకాశం ఉన్నట్లు సమాచారం. ప్రస్తుతం మూతపడుతున్న హాస్టళ్లలోని వార్డెన్లు, వర్కర్లను ఇతర ప్రాంతాల్లో అవసరం ఉన్న చోటకు సర్దుబాటు చేసేందుకు చర్యలు తీసుకుంటున్నారు. -
కళేబరం ఉన్న నీటితో వంటలు: హాస్టల్లో ఆకలి కేకలు
రాజాం (శ్రీకాకుళం జిల్లా): శ్రీకాకుళం జిల్లా రాజాం బస్డాండ్ వెనుక ఉన్న బీసీ బాలికల పోస్ట్ మెట్రిక్ హాస్టల్లో విద్యార్థినులు నాలుగు రోజులుగా ఆకలితో అలమటిస్తున్నారు. హాస్టల్ నిర్వాహకులు వంట వండకపోవడంతో విద్యార్థినులు ఎస్ఎఫ్ఐ ఆధ్వర్యంలో సోమవారం మధ్యాహ్నం రోడ్డెక్కారు. హాస్టల్లో వంట వండటానికి పక్కనున్న బావి నుంచి నీళ్లు ఉపయోగించేవారు. నాలుగు రోజుల క్రితం బావిలో ఓ పిల్లి పడి చనిపోయింది. దాంతో పాటు మోటారు పాడైంది. అయితే మోటారును బాగుచేసినా నీటిలో ఉన్న పిల్లి కళేబరం అలానే ఉంది. నీటిని శుద్ధి చేయకపోవడంతో వాటితోనే వండిన వంటలు.. దుర్వాసన వచ్చాయి. దీంతో పిల్లలు తినలేక పోతున్నారు. నీటిని శుద్ధిచేసి మంచినీటితో వండితేనే తింటామని భీష్మించారు. దాంతో ఆగ్రహించిన వార్డెన్ వంట వండేది లేదని తేల్చిచెప్పడంతో అప్పటినుంచి డబ్బున్న వాళ్లు హోటళ్లలో తింటుండగా డబ్బులు లేనివారు ఆకలితో పస్తులున్నారు. ఈ విషయం తెలిసిన విద్యార్థి సంఘాల నేతలు సోమవారం మధ్యాహ్నం హాస్టల్ విద్యార్థినులతో పట్టణంలో ర్యాలీ నిర్వహించి తహశీల్దార్ కార్యాలయం వద్ద ధర్నా నిర్వహించారు. ఉన్నతాధికారులు పరిస్థితిని విచారించి చర్యలు తీసుకుటామని హామీ ఇచ్చారు.


