మీరెప్పుడైనా ఓ వంద మీటర్ల దూరం ఈత కొట్టారా? బావిలోనో, స్విమ్మింగ్‌ పూల్‌లోనో, అటు నుంచి ఇటుకి ఆపసోపాలు పడి ఈత కొట్టే బ్యాచే కదా మనమంతా.. కాని సముద్రంలో సుదీర్ఘంగా ఈతకొట్టేవాళ్లను చూశారా? ఒకటి కాదు రెండు కాదు ఏకంగా ఒక దేశం నుంచి మరొక దేశానికి ఈత కొట్టే గజ ఈతగాడిని చూశారా? అంత దూరం ఎలా ఈత కొట్టాడు? అది కూడా సముద్రంలో... అని అనుకుంటున్నారా? అయితే ఈ స్టోరీ మీద ఓ లుక్కేయండి...అది స్వీడన్‌ దేశ తీరం... గాలివాటంగా ఉంది.. సముద్రంలోని నీరు వణికించేలా ఉంది. 2022 ఆగస్టు నెల..బార్ట్లో మీజ్‌ కుబ్కోవ్‌స్కీ అనే 27 ఏళ్ల యువకుడు సముద్రంలోకి దిగాడు...ఈతకొట్టడంప్రారంభించాడు. ఐదు, పది కిలోమీటర్లు కాదు 32 గంటలు ఈది 115 కిలోమీటర్లు వెళ్లాడు. కాని వాతావరణం సముద్రాన్ని హెచ్చరించింది..సముద్రం ఉప్పెన రూపం దాల్చింది.. అల్లకల్లోలం అయ్యేలోపే బార్ట్లో తప్పించుకున్నాడు.అంతటితో ఆగలేదు..2023 మళ్లీ ఈదడానికి సిద్ధపడ్డాడు. ఈసారి 40 గంటలు ఈది 116.7 కిలోమీటర్ల దూరానికి చేరుకున్నాడు. కాని వాతావరణం తన ప్రతాపాన్ని చూపి మళ్లీ పైచేయి సాధించింది. తర్వాత 2024 ముచ్చటగా మూడో ప్రయత్నంప్రారంభించాడు. కాని ఈసారి 19 గంటలకే వాతావరణం బలమైన పరిస్థితిని పూర్తిగా తన అదుపులోకి తీసుకుంది... కాని బార్ట్లో71.7 కిలోమీటర్లు వెనక్కి తగ్గాడు. 2025లో నాలుగో ప్రయత్నం...ఈసారి మాత్రం విజయం చేతికి చిక్కి తప్పించుకుంది. ఆగస్టు 17న బయలుదేరిన కుబ్కోవ్‌స్కీ 55 గంటలపాటు ఈది 159 కి.మీల దూరానికి చేరుకున్నాడు. పక్కనున్న పోలాండ్‌ దేశ తీరానికి కాస్త దూరంలోకి వచ్చి తీవ్రమైన అలసటతో అపస్మారక స్థితిలోకి వెళ్లిపోయాడు. వెంటనే సహాయక బృందం అతడిని కాపాడింది.చివరగా 2026 జూలై 31... ఈసారి కూడా 55 గంటల పది నిమిషాల పాటు నిర్విరామంగా ఈతకొట్టి పోలాండ్‌ తీరానికి చేరుకున్నాడు. బాల్టిక్‌ సముద్రాన్ని ఈదిన తొలి వ్యక్తిగా కుబ్కోవ్‌స్కీ నిలిచాడు. నాలుగుసార్లు సముద్రం అతడిని ఆపింది. ఐదోసారి మాత్రం అతడు సముద్రాన్ని గెలిచాడు. ఇంత ప్రయత్నానికి కారణం లేకపోలేదు. కేన్సర్‌తో బాధపడే పిల్లల కోసం నిధులు సేకరించాలని ప్రతి ఏటా కుబ్కోవ్‌స్కీ సముద్రంపై అలుపెరగని యుద్ధం చేశాడు. ఈ విజయాన్ని పిల్లలకు అంకితం చేసి, తన భగీరథ ప్రయత్నం ద్వారా వచ్చిన మొత్తాన్ని పిల్లల వైద్యానికే ఇచ్చేసి ధైర్యశాలిగా, ఔదార్యం నిండిన మంచి మనిషిలా మిగిలాడు.అతని అలుపెరగని ప్రయత్నం చూసి ఆశ్చర్యపోనివారంటూ లేరు.. బలమైన అలలు.. వణికించే నీళ్లు.. ఏమాత్రం తేడా వచ్చినాప్రాణానికే ప్రమాదం... కాని అవేవి అతడిని ఆపలేదు. గజినీ మహమ్మద్‌లా సముద్రం చేతిలో ఎన్నిసార్లు ఓడినా మళ్లీ ప్రతి దాడికి సిద్ధపడుతూనే ఉన్నాడు.

మాస్కో: ఉక్రెయిన్‌ డ్రోన్‌ దాడులు తీవ్రతరం చేసిన నేపథ్యంలో రష్యా తన నేవీ డే వేడుకలపై కోత పెట్టింది. భద్రతాపరమైన ఆందోళనలతో బాల్టిక్‌ సముద్ర తీరంలోని సెయింట్‌ పీటర్స్‌బర్గ్, కలినిన్‌ గ్రాడ్‌లలో, సుదూర తూర్పు తీర నౌకాశ్రయంలో వార్షిక నేవీ డే ఉత్సవాల సందర్భంగా ఆదివారం చేపట్టాల్సిన యుద్ధ నౌకల పరేడ్‌లను రద్దు చేసుకుంది. ఈ విషయాన్ని రష్యా అధికారులు తెలిపారు. సొంత నగరం సెయింట్‌ పీటర్స్‌బర్గ్‌లోని నేవీ ప్రధాన కార్యాలయంలో అధ్యక్షుడు పుతిన్‌ స్వయంగా హాజరు కావాల్సిన జరిగే కార్యక్రమాలను సైతం రద్దు చేసుకుంది. ఈ విషయాన్ని అధ్యక్ష భవనం క్రెమ్లిన్‌ ప్రతినిధి దిమిత్రీ పెస్కోవ్‌ ధ్రువీకరించారు. అన్ని రకాల పరిస్థితులను బేరీజు వేసుకున్నాకే ఈ నిర్ణయం ప్రభుత్వం తీసుకుందన్నారు. భద్రతకు మించింది మరేది లేదని వ్యాఖ్యానించారు. శనివారం రాత్రి నుంచి వివిధ ప్రాంతాలపైకి ఉక్రెయిన్‌ ప్రయోగించిన 99 డ్రోన్లను కూల్చినట్లు ఆదివారం రక్షణ శాఖ తెలిపింది. వీటిలో సెయింట్‌ పీటర్స్‌బర్గ్‌ నగరంపైకి వచ్చినవి కూడా ఉన్నాయంది. లెమొనొసోవ్‌ ప్రాంతంలో డ్రోన్‌ శకలాలు పడి ఒక మహిళ గాయపడినట్లు స్థానిక అధికారులు తెలిపారు. డ్రోన్ల భయంతో సెయింట్‌ పీటర్స్‌బర్గ్‌లోని పుల్కొవో ఎయిర్‌పోర్టు అధికారులు ఆదివారం ఉదయం డజన్ల కొద్దీ విమాన సర్వీసులను రద్దు చేశారు. ఈ నగరంలో జరిగిన పలు కార్యక్రమాల్లో అధ్యక్షుడు పుతిన్‌ పాల్గొన్నారు. యుద్ధ నౌకలను నిర్మించడంతోపాటు నేవీ శిక్షణను వేగవంతం చేస్తామని ఈ సందర్భంగా ఆయన ప్రకటించారు.


 మీలో ఎవరైన సమ్మర్‌ వెకేషన్‌ కోసం ఉత్తర పోలాండ్‌లోని బాల్టియా సముద్ర తీరానికి వెళ్లాలను కుంటే మాత్రం కొంచెం ముందుగానే జాగ్రత్త పడాలి. ఆ బీచ్‌లో కొంత స్థలాన్ని ముందుగానే రిజర్వ్‌ చేసుకోవాలి. మీస్థలాన్ని ఇతరులతో వేరు చేసేలా నిర్మించుకోవడమో లేక అక్కడ కొంత స్థలాన్ని కొనుగోలు చేయడమో చేయాలి. ఎందుకంటే ఆ బీచ్‌లో ప్రతి ఒక్కరికి కొంత ప్రదేశాన్ని కేటాయిస్తారు.
 ఇది చాలా ఏళ్లుగా వస్తున్నపోలాండ్‌ సంప్రదాయమట.. కాకపోతే ఈ మధ్య కాలంలో విదేశీ పర్యాటకుల తాకిడి ఎక్కువవడం, సామాజిక మాధ్యమాలు పెరిగిపోవడం, వాటిలో వీరు తమ ఫొటోలను షేర్‌ చేయడంతో ఈ సంప్రదాయం ఇంకాప్రాచుర్యంలోకి వచ్చిందని పోలాండ్‌ మీడియా చెబుతోంది. కర్రలను మట్టిలో నాటి వాటి చుట్టూ ఒక పెద్ద రంగు రంగుల గుడ్డను చుడతారు. బీచ్‌కు వచ్చే కుటుంబ సభ్యుల పరిమాణం బట్టి ఎంత స్థలం కావాలో అంతకేటాయిస్తారు.


 సముద్రంలో ఏం దొరుకుతాయి.. మామూలుగా అయితే ఆల్చిప్పలు, ముత్యాలు, నిధి నిక్షేపాలు కదూ.. కానీ బాల్టిక్ సముద్ర గర్భంలో 200 ఏళ్లనాటి మద్యం సీసా ఒకటి తాజాగా దొరికింది. ఎప్పుడో రెండు శతాబ్దాల క్రితం సముద్రంలో మునిగిపోయిన ఓ నౌక శిథిలాల్లోంచి ఇది బయటపడింది. అది వోడ్కానో, జిన్నో ఇంతవరకు తెలియలేదు. అయితే.. ఆ మందు మాత్రం ఇప్పటికీ తాగడానికి భేషుగ్గా పనికొస్తుందని, ఏమాత్రం పాడవ్వలేదని, దాని వాసన కూడా చాలా బాగుందని పోలండ్లోని నేషనల్ మారిటైమ్ మ్యూజియానికి చెందిన ఆర్కియాలజిస్టు టామజ్ బెడ్నార్జ్ తెలిపారు. ఇది సుమారు 1806-30 ప్రాంతానికి చెందిన మద్యం సీసా.
 
 అందులో 14 శాతం ఆల్కహాల్ డిస్టిలేట్ ఉందని ప్రాథమిక పరీక్షలలో తేలింది. బహుశా దీన్ని కొంతవరకు నీళ్లతో డైల్యూట్ చేసి ఉంటారని అనుకుంటున్నారు. దీని అసలు బ్రాండ్ 'సెల్టర్స్' అని, ఇప్పటి రసాయన పరీక్షలు కూడా అదే బ్రాండు అని తేల్చాయని చెప్పారు. సాధారణంగా 'సెల్టర్స్' చాలా అత్యున్నత నాణ్యత కలిగినదని చెబుతుంటారు. అదే బ్రాండుకు చెందిన మద్యం, అది కూడా 200 ఏళ్లనాటిది కావడంతో దీనికి మహా గిరాకీ ఉండబోతోందని లెక్క!!