శ్రమిస్తేనే విజయం

నాంపల్లి, న్యూస్‌లైన్: జీవితంలో ఓటమి చెందామని చింతించకుండా శ్రమిస్తే విజయం వరిస్తుందని హైకోర్టు జస్టిస్ బి.చంద్రకుమార్ తెలిపారు. శుక్రవారం రవీంద్రభారతిలో జరిగిన ఆరాధన- శ్రీకరి 19వ టీవీ పురస్కారాల ప్రదాన కార్యక్రమంలో పాల్గొన్నారు. ఈ సందర్భంగా ఆయన ఉత్తమ యాంకర్ చిత్రలేఖకు స్వర్ణపతకం బహూకరించారు.

ఈ సందర్భంగా జరిగిన సభలో జస్టిస్ బి. చంద్రకుమార్ మాట్లాడుతూ పెట్టుబడి ఎక్కువగా ఉంటే మంచి చిత్రాలు ప్రేక్షక ఆదరణ లభిస్తుందనేది అపొహ మాత్రమేనన్నారు. తక్కువ పెట్టుబడితో ప్రేక్షక ఆదరణ పొందిన చిత్రాలు, సీరియల్స్ ఉన్నాయన్నారు. డిప్యూటీ స్పీకర్ పద్మా దేవేందర్‌రెడ్డి మాట్లాడుతూ సామాజిక స్పృహతో కార్యక్రమాలు చేపడతున్న ఆరాధన- శ్రీకరి సంస్థలను అభినందించారు.

ఈ సందర్భంగా మ్యాగజైన్ స్టోరీకి గాను సాక్షికి చెందిన పీవీ నరసింహారావుతో పాటు పలువురికి పురస్కారాలు అందజేశారు. ఈ కార్యక్రమంలో సాహితీ విమర్శకులు డాక్టర్ ద్వానా శాస్త్రి, శృతిలయ ఆర్ట్స్ అకాడమీ చైర్మన్ ఆర్.ఎన్.సింగ్ తదితరులు పాల్గొన్నారు.