విరాట్‌ కోహ్లి సరికొత్త రికార్డు

మాంచెస్టర్‌: భారత క్రికెట్‌ జట్టు కెప్టెన్‌ విరాట్‌ కోహ్లి సరికొత్త రికార్డు సాధించాడు. 20 వేల అంతర్జాతీయ పరుగుల మార్కును వేగవంతంగా సాధించిన రికార్డును కోహ్లి నమోదు చేశాడు. వన్డే వరల్డ్‌కప్‌లో భాగంగా వెస్టిండీస్‌తో జరుగుతున్న మ్యాచ్‌లో కోహ్లి ఈ ఫీట్‌ సాధించాడు. ఈ మ్యాచ్‌కు ముందు 37 పరుగుల దూరంలో ఉన్న కోహ్లి దాన్ని అందుకున్నాడు. దాంతో 417 ఇన్నింగ్స్‌ల్లో 20 వేల అంతర్జాతీయ పరుగులు(టెస్టులు, వన్డేలు, టీ20లు) సాధించి ‘ఫాస్టెస్ట్‌ రికార్డు’ నమోదు చేశాడు. అంతకుముందు ఈ రికార్డు మాస్టర్‌ బ్లాస్టర్‌ సచిన్‌ టెండూల్కర్‌, బ్రియాన్‌ లారాల పేరిట సంయుక్తంగా ఉంది. వారిద్దరూ 20 వేల అంతర్జాతీయ పరుగుల్ని 453 ఇన్నింగ్స్‌ల్లో సాధించగా, దాన్ని కోహ్లి తాజాగా బ్రేక్‌ చేశాడు. ఈ జాబితాలో రికీ పాంటింగ్‌(464 ఇన్నింగ్స్‌లు) మూడో స్థానంలో ఉండగా, ఏబీ డివిలియర్స్‌(483) నాల్గో స్థానంలో ఉన్నాడు. రాహుల్‌ ద్రవిడ్‌(492 ఇన్నింగ్స్‌లు) ఆరో స్థానంలో ఉన్నాడు.(ఇక్కడ చదవండి: ఇదేం డీఆర్‌ఎస్‌రా నాయనా!)

విండీస్‌తో మ్యాచ్‌లో 55 బంతుల్లో 6 ఫోర్లతో కోహ్లి హాఫ్‌ సెంచరీ సాధించాడు. రోహిత్‌ శర్మ(18) తొలి వికెట్‌గా పెవిలియన్‌ చేరిన తర్వాత క్రీజ్‌లోకి వచ్చిన కోహ్లి.. సమయోచితంగా బ్యాటింగ్‌ చేశాడు. ఈ క్రమంలోనే ముందుగా తక్కువ ఇన్నింగ్స్‌ల్లో 20వేల అంతర్జాతీయ పరుగుల రికార్డును సాధించిన కోహ్లి.. ఆపై హాఫ్‌ సెంచరీ నమోదు చేశాడు. ఈ మ్యాచ్‌లో కేఎల్‌ రాహుల్‌(48) రెండో వికెట్‌గా ఔట్‌ కాగా, విజయ్‌ శంకర్‌(14) మూడో వికెట్‌గా పెవిలియన్‌ చేరాడు. ఇక కేదార్‌ జాదవ్‌(7) నిరాశపరిచాడు. దాంతో భారత జట్టు 29 ఓవర్లు ముగిసే సరికి నాలుగు వికెట్ల నష్టానికి 140 పరుగులు చేసింది.