నాలుగు రోజుల్లో 5వేల కోట్లు!

సహకార బ్యాంకులలో కూడా పాత 500, 1000 రూపాయల నోట్లను జమ చేసుకోవచ్చని అలా చెప్పారో లేదో.. సరిగ్గా నాలుగంటే నాలుగే రోజుల్లో మహారాష్ట్రలో్ని సహకార బ్యాంకులలో ఏకంగా 5వేల కోట్లు జమయ్యాయి. వీటిలో చాలావరకు రైతుల ఖాతాలే ఉంటాయి. కానీ ఒక్కసారిగా ఇంత పెద్దమొత్తం డిపాజిట్ కావడంతో ఇప్పుడు వీటిలో ఏవైనా అనుమానిత లావాదేవీలు ఉన్నాయేమోనని నాబార్డ్ పరిశీలించనుంది. కొన్ని ఖాతాల్లో లెక్కల్లోకి రాని డబ్బులను డిపాజిట్ చేసినట్లు ఫిర్యాదులు వచ్చాయని అధికారులు చెబుతున్నారు. మొత్తం రాష్ట్రంలో 31 డీసీసీబీలు ఉన్నాయి. అవన్నీ స్థానిక నాయకుల చేతుల్లోనే నడుస్తున్నాయి. నవంబర్‌ నెలలో కేవలం నాలుగు రోజులు మాత్రమే ఈ బ్యాంకులలో రద్దయిన నోట్ల డిపాజిట్లకు రిజర్వు బ్యాంకు అనుమతించింది. మొత్తం 3800 శాఖల్లో కలిపి ఈ నాలుగు రోజుల్లో సుమారు రూ. 5వేల కోట్ల సొమ్ము డిపాజిట్ అయ్యింది. ఈ బ్యాంకులలో ఆ నాలుగు రోజుల తర్వాత డిపాజిట్లను అనుమతించలేదు. వారానికి రూ. 24వేలు డ్రా చేసుకోడానికి మాత్రమే అక్కడ వీలుంది.