ప్రేమలోన పడితినె

‘పడితినమ్మో పడితినమ్మో ప్రేమలోన పడితినే’ అంటూ ‘నేను నా రాక్షసి’లో ఇలియానా చుట్టూ తిరుగుతూ రానా పాట పాడుతుంటారు. ఇప్పుడు కూడా ఆ పాటే పాడుకుంటున్నారు. ఇది రియల్‌ లవ్‌. టాలీవుడ్‌ మోస్ట్‌ ఎలిజిబుల్‌ బ్యాచిలర్స్‌ లిస్ట్‌ లో రానా ఒకరు. కొంత కాలంగా రానా రిలేషన్‌ షిప్‌ స్టేటస్‌ ఏంటి? అంటే సమాధానం లేని ప్రశ్నే. అయితే ఈసారి అడక్కుండానే ఈ ప్రశ్నకు సమాధానం చెప్పారు రానా. ప్రేమలో ఉన్నట్టు ఓ పోస్ట్‌ ద్వారా స్పష్టం చేశారు. మిహీకా బజాజ్‌తో  దిగిన ఓ సెల్ఫీని పోస్ట్‌ చేసి ‘తను నాకు యస్‌ చెప్పింది’  అని పేర్కొన్నారు రానా.

క్రసాల్‌ జ్యువెలర్స్‌ ఓనర్‌ బంటీ బజాజ్‌ కుమార్తె ఈ మిహీకా బజాజ్‌. ఆమె తండ్రి అసలు పేరు సురేష్‌ బజాజ్‌. ఇంటీరియర్‌ డిజైనింగ్‌ బిజినెస్‌ లో ఉన్నారు మిహీకా. ఆమె పుట్టి, పెరిగింది హైదరాబాద్‌ లోనే. ముంబైలోని ఓ ప్రముఖ ఇన్‌ స్టిట్యూట్‌ లో ఇంటీరియర్‌ డిజైనింగ్‌ లో డిప్లొమా చేశారు. ఆ తర్వాత లండన్‌ లో ఆర్ట్‌ అండ్‌ డిజైన్‌ లో ఎంఏ చేశారామె. ఎప్పటినుంచి రానా, మిహీకా ప్రేమలో ఉన్నారనే విషయం బయటకు రాలేదు కానీ ఈ ఏడాది చివర్లో వివాహం చేసుకోబోతున్నారని సమాచారం. రానా తన ప్రేమ విషయాన్ని సోషల్‌ మీడియాలో పంచుకున్న వెంటనే పలువురు సెలబ్రిటీలు, ఫ్యాన్స్‌ శుభాకాంక్షలు తెలిపారు.