ఆ హిట్ సాంగ్స్...వాళ్లకు మిస్...వీళ్లకు ప్లస్!

స్టోరీని కీలక సందర్భాల్లో డ్రైవ్ చేయడానికీ, టర్న్ చేయడానికీ పాటలే మెయిన్ టూల్స్. అలాగని అన్ని పాటలూ కీలకం కాకపోవచ్చు. కొన్ని సినిమా పాటల పుట్టుక వెనుక మాత్రం ఆ సినిమాను మించిన ఆసక్తికరమైన కథనం ఉంటుంది. ఎవరికోసమో పాట రెడీ చేస్తే, ఇంకెవరికో ఆ పాటను వాడుకునే ప్రాప్తం దక్కుతుంది. ఒక సినిమా కోసం ట్యూన్ చేసి వేరే సినిమాలో పెట్టిన సాంగ్స్ కీరవాణి కెరీర్‌లో అర్ధశతకం మించే ఉంటాయి. వాటిల్లో సూపర్ డూపర్ హిట్టయిన నాలుగు పాటల తెర వెనుక కబుర్లు...
 
► మోహన్‌బాబు, శ్రీకాంత్, గ్రేసీసింగ్ కాంబినేషన్‌లో రూపొందిన సినిమా ‘తప్పు చేసి పప్పుకూడు’ (2001). ఈ చిత్రానికి దర్శకుడు ఎ. కోదండ రామిరెడ్డి, నిర్మాత మోహన్‌బాబు. హైదరాబాద్‌లోని లక్ష్మీప్రసన్న పిక్చర్స్ ఆఫీసులో మ్యూజిక్ సిట్టింగ్స్. లంచ్ తర్వాత స్వీట్స్ తినడం కీరవాణికి ఇష్టం. ఆ రోజు స్వీట్స్ లేవు. దాంతో ఆయనే పుల్లారెడ్డి స్వీట్ షాపుకెళ్లి కొన్ని రకాల స్వీట్స్ కొనుక్కున్నారు. ఆ షాపులో ఉండగా కీరవాణికో ఐడియా వచ్చింది. ‘నీ అధరామృతం పుల్లారెడ్డి... అరకేజీ అప్పుగ ఇస్తే కడతా వడ్డీ మీద వడ్డీ’ అనే ప్రాసతో కొన్ని లైన్లు అనుకున్నారు. మోహన్‌బాబుకి ఈ పాట రెడీ చేసి వినిపిస్తే ఆయన ‘‘మనకు సెట్ కాదు’’ అని చెప్పేశారు. దాంతో ఆ పాటను కీరవాణి అలాగే ఉంచేశారు. 2004లో రాజమౌళి ‘సింహాద్రి’ చేస్తున్నప్పుడు ఈ ట్యూన్ బయటకు తీశారు కీరవాణి. అదే... జనాన్ని ఊపేసిన ‘నువ్వు విజిలేస్తే ఆంధ్రా సోడాబుడ్డీ...’
 
►‘అల్లరి ప్రేమికుడు’(1994) కోసం ఓ పాట చేసి కె. రాఘవేంద్రరావుకి వినిపించారు కీరవాణి. ఏ కళనున్నారో కానీ, ఆయన ఇష్టపడలేదు. తర్వాత ఆ పాటనే నాగ్ ‘క్రిమినల్’ (1995) సినిమా కోసం దర్శకుడు మహేష్‌భట్ ఎంపిక చేసుకున్నారు. అదే... ఎవర్‌గ్రీన్ హిట్ ‘తెలుసా మనసా ఇది ఏనాటి అనుబంధమో...’.

►ఎ. కోదండ రామిరెడ్డి దర్శకత్వంలో సినిమా కోసం కీరవాణి ఓ పాట చేశారు. ఎందుకనో ఆ పాట సినిమాలో ఉపయోగించడం కుదర్లేదు. దాంతో ఆ పాటను కె. రాఘవేంద్రరావుకు వినిపించారు. ఆయనకు బాగా నచ్చేసి ‘సుందరకాండ’ (1992) సినిమాలో వాడుకున్నారు. అదే మాస్ మెచ్చిన...     ‘అరె మావ... ఇల్లలికి పండగ చేసుకుందామా...’
 
► రవితేజ హీరోగా కెమేరామ్యాన్ ఎస్. గోపాలరెడ్డి దర్శకత్వంలో రూపొందిన చిత్రం ‘నా ఆటోగ్రాఫ్... స్వీట్ మెమరీస్’ (2004). ఇందులో రవితేజ ఓ మలయాళ యువతితో ప్రేమలో పడే సందర్భం కోసం కీరవాణి ఓ పాట చేశారు. దర్శకుడికి నచ్చలేదు. దాంతో ‘దువ్విన తలనే దువ్వడం...’ పాట చేసి ఇచ్చారు. గోపాలరెడ్డి తిరస్కరించిన ఆ పాటను రాజమౌళి తీసుకున్నారు. ఆ పాటే ‘ఈగ’ (2012)లోని ‘అరె ఆరె ఆరె ఆరె.’