ఆకట్టుకుంటోన్న ‘కౌసల్య కృష్ణమూర్తి’ ట్రైలర్‌

తమిళంలో సూపర్‌హిట్‌గా నిలిచిన ‘కణా’ చిత్రాన్ని ‘కౌసల్య కృష్ణమూర్తి’గా తెలుగులో రీమేక్‌చేస్తోన్న సంగతి తెలిసిందే. అక్కడ సత్యరాజ్‌ పోషించిన పాత్రను తెలుగులో రాజేంద్రప్రసాద్‌ పోషించాడు. ఇప్పటికే షూటింగ్‌ కంప్లీట్‌చేసుకున్న చిత్రబృందం.. విడుదల చేసేందుకు సరైన సమయం కోసం ఎదురుచూసి.. ఆగస్టు 23న ప్రేక్షకుల ముందుకు తీసుకువచ్చేందుకు రెడీ అయింది. తాజాగా ఈ మూవీ ట్రైలర్‌ను విడుదల చేశారు.

తన తండ్రి కన్న కలను నెరవేర్చేందుకు కూతురు పడ్డ కష్టమే ఈ చిత్ర కథ అని ట్రైలర్‌ చూస్తే అర్థమవుతుంది. అయితే క్రికెట్‌ నేపథ్యంలో ఇదివరకే ఎన్నో చిత్రాలు వచ్చినప్పటికీ.. ఇందులో రైతుల అంశాన్ని కూడా టచ్‌ చేసినట్లు కనపడుతోంది. ‘నీ వల్ల కాదు అని ఎవరైనా అంటే నువ్వు నమ్మాల్సింది వాళ్లని కాదు.. నిన్ను’ , ‘ఈ లోకం.. గెలుస్తానని చెబితే వినదు.. గెలిచిన వాడు చెబితే  వింటుంది. ఏం చెప్పినా గెలిచి చెప్పు’లాంటి డైలాగ్‌లు ఆకట్టుకుంటున్నాయి. శివ కార్తీకేయన్‌ ఈ చిత్రంలో ఓ ముఖ్య పాత్రను పోషించారు. క్రియేటివ్‌ కమర్షియల్స్‌పై నిర్మించిన ఈ సినిమాకు భీమినేని శ్రీనివాస్‌ దర్శకత్వం వహించారు.