సల్మాన్‌ నా అన్న కాదు : కత్రినా

Katrina Kaif Says Salman Khan Is Not Her Brother - Sakshi

బాలీవుడ్‌ కండలవీరుడు సల్మాన్‌ ఖాన్‌- కత్రినా కైఫ్‌ జంటగా తెరకెక్కిన తాజా మూవీ ‘భారత్‌’. అలీ అబ్బాస్‌ జాఫర్‌ దర్శకత్వంలో రూపొందిన ఈ సినిమా జూన్‌ 5 విడుదల కాబోతున్న సంగతి తెలిసిందే. ఈ క్రమంలో ‘భారత్‌’కు సంబంధించిన ప్రమోషన్‌ కార్యక్రమాలు జోరుగా సాగుతున్నాయి. ఇందులో భాగంగా సల్మాన్‌- కత్రినాలు మీడియాతో చిట్‌చాట్‌ నిర్వహించారు. ఈ సందర్భంగా ఆసక్తికర సంభాషణ చోటుచేసుకుంది. చాలా కాలం తర్వాత సల్మాన్‌ భాయీజాన్‌తో నటించడం ఎలా ఉందంటూ ఓ విలేకరి కత్రినాను ప్రశ్నించారు. ఈ విషయంపై కత్రినా కంటే ముందే స్పందించిన సల్మాన్‌.. తాను కత్రినా భాయీజాన్‌ను కాదని, తననెప్పుడూ అలా పిలవనివ్వను అంటూ సరదాగా సమాధానమిచ్చాడు. దీంతో అక్కడ నవ్వులు పూశాయి.

ఈ విషయంపై స్పందించిన కత్రినా మాట్లాడుతూ...‘అవును. నిజమే కదా. సల్మాన్‌ నా సోదరుడు కాదు. కేవలం స్నేహితుడు మాత్రమే. తనలో హాస్య చతురత గురించి మీకు తెలుసు కదా. ప్రతీ ఒక్కరితో సరదాగా ఉండటం తనకు అలవాటు. చుట్టూ ఉన్న వారిని నవ్విస్తూ ఉంటాడు. ఆ క్రమంలో పంచ్‌లు వేయాలని చూస్తుంటాడు. నేను కూడా తక్కువేం కాదు. అందుకే తనకి సరైన సమాధానం ఇస్తుంటా అంటూ చెప్పుకొచ్చింది.

కాగా మైనే ప్యార్‌ క్యోం కియాలో కత్రినా తొలిసారిగా సల్మాన్‌తో జోడీ కట్టిన సంగతి తెలిసిందే. ఆ తర్వాత ఏక్‌ థా టైగర్‌, టైగర్‌ జిందాహై వంటి సినిమాల్లో వీరు కలిసి నటించారు. అయితే సల్మాన్‌తో కత్రినా డేటింగ్‌లో ఉందంటూ వార్తలు ప్రచారమైన సంగతి తెలిసిందే. ఈ విషయంపై బాహాటంగా వారెప్పుడూ స్పందించలేదు. అయితే రణ్‌బీర్‌ కపూర్‌తో కత్రినా సన్నిహితంగా మెలగడంతోనే వీరి మధ్య బంధం తెగిపోయిందని బీ- టౌన్‌లో టాక్‌ విన్పించింది. కాగా రణ్‌బీర్‌ కపూర్‌ ప్రస్తుతం అలియా భట్‌తో డేటింగ్‌ చేస్తున్న సంగతి తెలిసిందే. దీంతో కత్రినా మళ్లీ సల్మాన్‌కు దగ్గరైందంటూ రూమర్లు వినిపిస్తున్నాయి. ఈ నేపథ్యంలో వీరిద్దరు కలిసి నటించడం ప్రాధాన్యత సంతరించుకుంది.

Read latest Movies News and Telugu News | Follow us on FaceBook, Twitter, Telegram



 

Read also in:
Back to Top