భార్య వైద్యానికి డబ్బు సమకూర్చలేక భర్త ఆత్మహత్య

హొసపేటె: కొప్పళ జిల్లా గంగావతి తాలూకా పరిధిలోని సంగాపుర గ్రామ పంచాయతీ పరిధిలో ఓ హృదయవిదారక ఘటన చోటు చేసుకుంది. అనారోగ్యంతో బాధపడుతున్న తన భార్య చికిత్స కోసం అవసరమైన లక్షల రూపాయలను సమకూర్చలేక, తీవ్ర నిరాశకు గురైన ఒక భర్త ఆత్మహత్యకు పాల్పడ్డాడు. మృతుడిని మల్లాపుర గ్రామానికి చెందిన శివప్ప (26)గా గుర్తించారు. మెదడు సంబంధిత పక్షవాతం (బ్రెయిన్‌ స్ట్రోక్‌) బారిన పడిన తన భార్యకు సకాలంలో చికిత్స అందించడానికి అవసరమైన డబ్బును సమకూర్చలేక పోవడంతో ఆ యువకుడు ఈ నిర్ణయం తీసుకున్నాడు. ప్రారంభంలో తన చేతిలో ఉన్న డబ్బును ఖర్చు చేసి అతను భార్యకు చికిత్స చేయించాడు. ఆ తర్వాత అప్పులు కూడా చేశాడు. అయినప్పటికీ అతని భార్య ఆరోగ్యంలో ఎటువంటి మెరుగుదల కనిపించలేదు. దీంతో తన భార్య చికిత్స కోసం డబ్బును సమకూర్చలేక అతను ఉరివేసుకుని ఆత్మహత్య చేసుకున్నట్లు తెలిసింది. సంగాపుర జీపీ పరిధిలోని విప్రమగనిలో దేవఘాట్లి వైపునకు వెళ్లే రహదారికి ఎడమ వైపున ఉన్న ఒక రైతు గిడ్డంగి పక్కన ఉన్న చెట్టుకు ఉరి వేసుకుని ఆ యువకుడు ఆత్మహత్య చేసుకున్నాడు. సోమవారం శివప్ప మృతదేహం లభ్యమైంది.