ఏలూరు (మెట్రో) : జిల్లాలో పంటలను కాపాడుకునేందుకు శివారు భూములకు కూడా సాగునీరు అందేలా అవసరమైన చర్యలు తీసుకోవాలని అధికారులను జిల్లా కలెక్టర్‌ కాటంనేని భాస్కర్‌ ఆదేశించారు. స్థానిక కలెక్టర్‌ కార్యాలయంలో సోమవారం మీ కోసం కార్యక్రమం సందర్భంగా జిల్లాలో వివిధ ప్రాంతాల నుంచి వచ్చిన ప్రజల నుంచి వినతులు, ఫిర్యాదులు స్వీకరించి వాటి పరిష్కారానికి సంబంధితాధికారులకు ఆదేశాలు జారీ చేశారు. 
 జిల్లాలో ఏ ఒక్క రైతు సాగునీటి కోసం ఇబ్బందులు పడటానికి వీల్లేదని, అధికారుల దృష్టికి సాగునీటి సమస్య ఏ ఒక్క రైతు తీసుకొచ్చినా వెంటనే పరిష్కరించాలని ఆదేశించారు. పెదవేగి మండలం కొప్పాకకు చెందిన రైతులు చందు నాగేశ్వరరావు, పర్వతనేని నగేష్, గిరిడి అచ్చయ్య మరి కొంతమంది కలెక్టర్‌కు వినతిపత్రం సమర్పిస్తూ పోలవరం కాలువ నుంచి గో సంరక్షణ వరకు సుమారు కిలోమీటరు వరకూ బోర్లలో నీరురాక వేరుశనగ, మొక్కజొన్న, జామ, ఆయిల్‌పామ్‌ పంటలు ఎండిపోతున్నాయని పోలవరం కాలువ నుంచి ఎత్తిపోతల పథకం ద్వారా నీళ్లిచ్చి ఆదుకోవాలని కోరారు.
  దీనిపై కలెక్టర్‌ స్పందిస్తూ వెంటనే పరిశీలించి పంటలను కాపాడేందుకు సాగునీరు అందే విధంగా చర్యలు తీసుకోవాలని అధికారులను ఆదేశించారు. 
 ∙గోపాలపురం మండలం కరగపాడుకు చెందిన పినెళ్లి ధర్మయ్య, తానేటి వెంకటరత్నం, ఐనపర్తి దుర్గారావు మరికొంతమంది కలెక్టర్‌కు ఫిర్యాదు చేస్తూ గ్రామంలో ఆర్‌ఎస్‌ నంబర్‌ 42లో ఎనిమిది మంది దళితులకు కేటాయించి పట్టాలిచ్చినా ఆ భూమిని నేటికీ అప్పగించలేదని ఫిర్యాదు చేశారు. దీనిపై చర్యలు తీసుకోవాల్సిందిగా గోపాలపురం తహసీల్దార్‌ను ఆదేశించారు. 
 ∙కొవ్వూరు మండలం దొమ్మేరుకు చెందిన సిద్ధిగని నాగేశ్వరరావు, వంకా> శ్రీను, ఈలి లక్ష్మయ్య మరికొంతమంది కలెక్టర్‌కు వినతిపత్రం అందిస్తూ నివాసాల మధ్య కొంతమంది పందులు పెంపకం చేస్తూ చుట్టుపక్కల హోటళ్ల నుంచి తీసుకొచ్చిన వ్యర్థాలు, కోడిమాంసం వంటివి పందులకు మేతగా వేస్తూ అనారోగ్యాలకు గురి చేస్తున్నారని, ప్రజలు రోగాల బారినపడుతున్నారని ఫిర్యాదు చేశారు. దీనిపై స్పందించిన కలెక్టర్‌ స్వయంగా డీపీవో పరిశీలించి చర్యలు తీసుకోవాలని ఆదేశించారు. 
 ∙టి.నరసాపురం మండలం బంధంచర్లకు చెందిన కె.నాగబాబు కలెక్టర్‌కు ఫిర్యాదు చేస్తూ ఎస్సీ కార్పొరేషన్‌ ద్వారా వేసిన బోరు నుంచి నీటిని వాడుకోకుండా లింగాల సోమసుందరం అనే వ్యక్తి అడ్డుపడుతున్నాడని, అందరూ బోరు నీటిని వాడుకోవాల్సి ఉండగా దౌర్జన్యం చేస్తున్నాడని ఫిర్యాదు చేశారు. ఈ విషయంపై విచారణ చేసి చర్యలు తీసుకోవాలని, వినకుంటే బోరును రద్దు చేయాలని ఎస్సీ కార్పొరేషన్‌ ఈడీ ఝాన్సీరాణిని ఆదేశించారు. ఈ కార్యక్రమంలో జాయింట్‌ కలెక్టర్‌ పులిపాటి కోటేశ్వరరావు, అదనపు జాయింట్‌ కలెక్టర్‌ షరీఫ్, హౌసింగ్‌ పీడీ శ్రీనివాసరావు పాల్గొన్నారు. 
  
  
  


 ఏలూరు సిటీ : జిల్లాలో పోలవరం ప్రాజెక్టు నిర్వాసితులకు 70 ఎకరాల విస్తీర్ణంలో ప్రత్యేకంగా భారీ కాలనీ ఏర్పాటు చేసి అన్ని వసతులు అక్కడే కల్పించి మెరుగైన సేవలు అందించాలని కలెక్టర్‌ కాటంనేని భాస్కర్‌ అధికారులను ఆదేశించారు. కలెక్టరేట్‌లో జిల్లాలోని సాగునీటి ప్రాజెక్టుల పనుల ప్రగతిపై అధికారులు, ఏజెన్సీ ప్రతినిధులతో సమీక్షించారు.
 ఈ సందర్భంగా కలెక్టర్‌ మాట్లాడుతూ పోలవరం ప్రాజెక్టు నిర్వాసితులకు చిన్న చిన్న 19 కాలనీలు నిర్మించాలన్న ప్రతిపాదనతో నిర్వాసితులకు పెద్దగా మేలు జరగదని 2  లేదా 3 భారీ కాలనీలు ఏర్పాటు చేసి సకల సౌకర్యాలు కల్పిస్తే ఆ ప్రాంత ప్రజలంతా ఎంతో ఆనందిస్తారని భాస్కర్‌ చెప్పారు. పోలవరం ప్రాజెక్టు నిర్వాసితులకు కొయ్యలగూడెం మెయిన్‌రోడ్డుకు చేర్చి 70 ఎకరాల విస్తీర్ణంలో భారీ కాలనీ ఏర్పాటు చేయాలని, ఆ కాలనీలో బస్టాప్,  కోటి రూపాయల వ్యయంతో ఫంక్షన్‌ హాలు, షాపింగ్‌ కాంప్లెక్స్, ఆరోగ్య కేంద్రం, స్కూల్‌ భవనం, తదితర సౌకర్యాలు కల్పిస్తే నిర్వాసితులు ఎంతో లబ్ధి పొందుతారన్నారు. ఆ దిశగా ప్రణాళిక అమలు చేయాలని ఐటీడీఏ పీవో షాన్‌ మోహన్‌ను కలెక్టర్‌ ఆదేశించారు.
  తమ్మిలేరు అభివృద్ధి పనులు డిసెంబర్‌ 1న ప్రారంభించి 31 రాత్రి కల్లా పూర్తి చేసేందుకు చర్యలు తీసుకోవాలని కలెక్టర్‌ అధికారులను ఆదేశించారు. తాడిపూడి ఎత్తిపోతల పథకం, చింతలపూడి ఎత్తిపోతల పథకం భూసేకరణ ప్రక్రియ, విస్తరణ పనులపై కాంట్రాక్ట్‌ ఏజెన్సీ, అధికారులతో చర్చించారు. భూసేకరణను వేగవంతం చేయాలని అధికారులను ఆదేశించారు. కాలువల ఎలైన్‌మెంట్‌ మార్చే ప్రసక్తి లేదని కలెక్టర్‌ తేల్చి చెప్పారు. కలెక్టర్‌ వద్దకు వెళితే ఎలైన్‌మెంట్‌ మారుస్తారంటూ రైతులకు చెబుతున్న ఈఈ చినబాబుపై ఆయన ఆగ్రహం వ్యక్తం చేశారు. సమావేశంలో జేసీ పి.కోటేశ్వరరావు, ఏజెసీ ఎంహెచ్‌.షరీఫ్, భూసేకరణ స్పెషల్‌ డెప్యూటీ కలెక్టర్‌ భానుప్రకాష్, ఐటీడీఏ పీవో షాన్‌మోహన్, ఆర్డీవోలు నంబూరి తేజŒ భరత్, శ్రీనివాసరావు, పోలవరం ఎస్‌ఈ శ్రీనివాసయాదవ్‌ పాల్గొన్నారు.