All India Students Association

న్యూఢిల్లీ: జాతీయ పతాకాన్ని ఎగరేసేందుకు దేశ పౌరులకు ఎలాంటి అనుమతీ అవసరం లేదని ఆలిండియా స్టూడెంట్స్‌ అసోసియేషన్‌ (ఏఐఎస్‌ఏ) అధ్యక్షురాలు నేహా బోరా స్పష్టం చేశారు. ముందస్తు అనుమతి లేకుండానే జాతీయ పతాకాన్ని ఎగురవేశానంటూ పోలీసులు తనకిచ్చిన నోటీసును రద్దు చేయాలంటూ ఆమె దాఖలు చేసిన పిటిషన్‌పై ఢిల్లీ హైకోర్టులో గురువారం వాదనలు జరిగాయి. శాంతికి కట్టుబడతానంటూ స్పెషల్‌ ఎగ్జిక్యూటివ్‌ మేజి్రస్టేట్‌కు బాండ్‌ సమర్పించాలంటూ ఢిల్లీ పోలీసులు జారీ చేసిన నోటీసును కూడా ఆమె సవాలు చేశారు. కోర్టుకు దసరా సెలవుల నేపథ్యంలో న్యాయమూర్తి జస్టిస్‌ సుబ్రమణియం ప్రసాద్‌ ఏకసభ్య ధర్మాసనం బోరా పిటిషన్‌పై ప్రత్యేకంగా విచారణ చేపట్టింది. బోరాకు నోటీసుల జారీలో పోలీసులు నిబంధనలను తుంగలో తొక్కారని ఆమె తరఫు సీనియర్‌ న్యాయవాది గోపాల్‌ శంకరనారాయణన్‌ ఆరోపించారు. ప్రభుత్వ మార్పిడికి బోరా డిమాండ్‌ చేశారంటూ కేంద్ర ప్రభుత్వం తరఫున అదనపు సొలిసిటర్‌ జనరల్‌ (ఏఎస్‌జీ) చేతన్‌ శర్మ వెలిబుచ్చిన అభ్యంతరాలను ఆయన తోసిపుచ్చారు. ‘‘ప్రజాస్వామిక వ్యవస్థలో అలాంటి డిమాండ్‌ తప్పే కాదు. అయితే బోరా ఆ వ్యాఖ్యలు చేయలేదు’’అన్నారు. వాటిపట్ల ఏఎస్‌జీ తీవ్ర అభ్యంతరం తెలిపారు. ‘‘బోరా ఆ వ్యాఖ్యలు చేశారు. ఆమెతో పాటు ఇతర నిరసనకారులు పాల్గొన్న సదరు ప్రెస్‌ మీట్‌లో శంకరనారాయణన్‌ కూడా ఉన్నారు’’అంటూ గుర్తు చేశారు. ‘ప్రజాస్వామ్యంలో ప్రభుత్వ మార్పిడి ఓట్ల ద్వారానే జరుగుతుంది తప్ప ఢిల్లీ నడిబొడ్డులో విచ్చిన్న శక్తులు పాల్పడే నిరసనల ద్వారా కాద’న్నారు.నేడు తీర్పు ఇరు వర్గాల వాదనల అనంతరం, పిటిషన్‌పై శుక్రవారం తీర్పు వెలువరిస్తానని న్యాయమూర్తి పేర్కొన్నారు. బోరాకు నోటీసుల విషయమై అప్పటిదాకా ఎలాంటి చర్యలూ చేపట్టవద్దని పోలీసులకు సూచించారు. శాంతికి భంగం కలిగించబోనని హామీపత్రం రాసిస్తే ఆమెపై తదుపరి చర్యలను నిలిపేసేందుకు అభ్యంతరమేమీ ఉండబోదని ఏఎస్‌జీ తెలిపారు. దాంతో న్యాయమూర్తి స్పందిస్తూ, ‘తాను చెడ్డదాన్నంటూ తొలుత ముద్ర వేసి, ఇప్పుడేమో బుద్ధిమంతురాలిగా ఉంటానంటూ హామీ కోరుతున్నారన్నది బోరా ఆక్షేపణ’అని అభిప్రాయపడ్డారు. బోరా కనీసం 12 రకాల చట్టోల్లంఘనలకు పాల్పడ్డారని ఏఎస్‌జీ కోర్టు దృష్టికి తీసుకెళ్లారు. వాటన్నింటికీ పక్కగా రుజువులున్నట్టు చెప్పారు. అక్టోబర్‌ 16న ఢిల్లీలో కాక్రోచ్‌ జనతా పార్టీ (సీజేపీ) చేపట్టిన లెహరాదో తిరంగా’నిరసన యాత్రలో పాల్గొనేందుకు వెళ్తుండగా బోరాను అదుపులోకి తీసుకున్న పోలీసులు ఆ మర్నాడు వదిలేశారు.

న్యూఢిల్లీ: చీఫ్‌ ఎలక్షన్‌ కమిషనర్‌ జ్ఞానేశ్‌ రాజీనామా చేయాలని డిమాండ్‌ చేస్తూ ఆలిండియా స్టూడెంట్స్‌ అసోసియేషన్‌(ఏఐఎస్‌ఏ) నేతలు, కార్యకర్తలు ఢిల్లీలో వరుసగా మూడో రోజు ఆదివారం సైతం కదం తొక్కారు. జంతర్‌మంతర్‌ వైపు దూసుకెళ్లేందుకు ప్రయత్నించగా పోలీసులు ఎక్కడికక్కడ అడ్డుకున్నారు. జంతర్‌మంతర్‌ చుట్టూ పటిష్టమైన భద్రత ఏర్పాటు చేశారు. అశోక రోడ్డులోని ఆంధ్రభవన్‌ సర్కిల్‌ నుంచి దూసుకొచ్చిన నిరసనకారులు జంతర్‌మంతర్‌ సమీపంలో బారికేడ్లను ఛేదించడానికి ప్రయత్నించగా పోలీసులు అప్రమత్తమయ్యారు. ఈ సందర్భంగా ఇరువర్గాల మధ్య తీవ్రస్థాయిలో ఘర్షణ చోటుచేసుకుంది. ఏఐఎస్‌ఏ జాతీయ అధ్యక్షురాలు నేహా బోరా బారీకేడ్‌ ఎక్కగా పోలీసులు ఆమెను అదుపులోకి తీసుకున్నారు. నిరసనకారులను పోలీసులు ఈడ్చుకెళ్లిన దృశ్యాలు సోషల్‌మీడియాలో వైరల్‌గా మారాయి. బలవంతంగా వాహనాల్లోకి ఎక్కించి, పోలీసు స్టేషన్‌కు తరలించారు. మహిళా జర్నలిస్టులకు లైంగిక వేధింపులు ఢిల్లీలో ఈనెల 3న జరిగిన నిరసన సందర్భంగా పోలీసులు తమను లైంగికంగా వేధించారని ముగ్గురు మహిళా జర్నలిస్టులు ఆరోపించడం కలకలం సృష్టించింది. నిష్పాక్షిక విచారణ కోసం వారి ఫిర్యాదులను క్రైమ్‌ బ్రాంచ్‌కు బదిలీ చేసినట్లు పోలీసు అధికారులు ఆదివారం తెలిపారు. తనపై ఒక ఏసీపీ లైంగిక దాడి చేశారని పాత్రికేయురాలు ఆరోపించారు. నిరసనకారులను అదుపులోకి తీసుకుంటున్న సమయంలో మహిళా పోలీసులు ఎవరూ లేరంటూ తాను ప్రశ్నించానని, దాంతో ఏసీపీ వివేక్‌ భగత్‌ తనను అసభ్యకరంగా తాకుతూ నెట్టేశాడని తెలిపారు. వేధింపులపై మరో ఇద్దరు మహిళా జర్నలిస్టులు ఫిర్యాదు చేశారు. మహిళా జర్నలిస్టుల పట్ల పోలీసులు వ్యవహరించిన తీరు పట్ల ప్రెస్‌ కౌన్సిల్‌ ఆఫ్‌ ఇండియా ది్రగ్బాంతి వ్యక్తం చేసింది. పోలీసుల వ్యవహార శైలిని కాంగ్రెస్‌ పార్టీ నాయకురాలు, ఎంపీ ప్రియాంక గాంధీ వాద్రా ఖండించారు. ఈ విషయంలో ప్రధాని మోదీ, హోంమంత్రి అమిత్‌ షా సమాధానం చెప్పాలని నిలదీశారు. నిరసనల సందర్భంగా మహిళా జర్నలిస్టులను లైంగికంగా వేధించిన పోలీసులపై ఎఫ్‌ఐఆర్‌ నమోదు చేయాలని తేల్చిచెప్పారు. నంబర్‌లేని వాహనంలో నేహా తరలింపుఏఐఎస్‌ఏ అధ్యక్షురాలు నేహా బోరాను ఢిల్లీ పోలీసులు నంబర్‌ ప్లేట్‌లేని ఒక వాహనంలో ఎక్కించారు. అందులో గుర్తుతెలియని ప్రదేశానికి తీసుకెళ్లారని ఏఐఎస్‌ఏ సభ్యులు ఆరోపించారు. ‘‘మా నాయకురాలి జాడ తెలీకుండా ఉండేందుకు నంబర్‌లేని వాహనంలో ఎత్తుకెళ్లారు. తీసుకెళ్లే సమయంలో వాహనంలో మహిళా పోలీసులు ఎవరూ లేరు. ఇది నిబంధనల్ని పూర్తిగా ఉల్లంఘించడమే. ఆమె ఫోన్, బ్యాగ్‌ను పోలీసులు లాక్కున్నారు’’ అని నిరసనకారులు ఆందోళన వ్యక్తంచేశారు. అదుపులోకి తీసుకున్న నేహా బోరాను నరేలా పారిశ్రామిక ప్రాంత పోలీస్‌ స్టేషన్‌ నుంచి పోలీసులు తర్వాత విడుదల చేశారు.

న్యూఢిల్లీ: ఓట్ల జాబితా ప్రత్యేక సమగ్ర సవరణ(ఎస్‌ఐఆర్‌) సర్వే కారణంగా అన్యాయంగా కోట్లాది మంది ఓటర్లు ఓటుహక్కు కోల్పోడానికి కారణమైన ప్రధాన ఎన్నికల అధికారి జ్ఞానేశ్‌కుమార్‌ సీఈసీ పదవికి రాజీనామా చేయాలన్న డిమాండ్‌తో ఆలిండియా స్టూడెంట్స్‌ అసోసియేషన్‌(ఏఐఎస్‌ఏ) సభ్యులు సహా పలు విద్యార్థి సంఘాల నేతలు, విద్యార్థులు మళ్లీ ఢిల్లీలో నిరసన మొదలెట్టారు. పెద్దసంఖ్యలో ఉద్యమకారులను తాత్కాలికంగా పోలీసులు అదుపులోకి తీసుకున్న మరుసటిరోజే మళ్లీ పెద్దసంఖ్యలో నిరసనకారులు జంతర్‌మంతర్‌ దిశగా వచ్చారు. శనివారం పటేల్‌ చౌక్‌ నుంచి జంతర్‌ మంతర్‌ వైపు ర్యాలీగా వెళ్తున్న వారిని పోలీసులు మార్గమధ్యంలోనే అడ్డుకున్నారు. దీంతో పోలీసులు, నిరసనకారులకు మధ్య వాగ్వాదం, తోపులాట జరిగింది. ఈ ఘటనలో దాదాపు 150 మందిని పోలీసులు అదుపులోకి తీసుకున్నారు. ఏఐఎస్‌ఏ జాతీయ అధ్యక్షురాలు నేహా బోరా, సామాజిక కార్యకర్త యోగేంద్ర యాదవ్, సీనియర్‌ సుప్రీంకోర్టు న్యాయవాది ప్రశాంత్‌ భూషణ్‌ తదితరులను పోలీసులు అదుపులోకి తీసుకున్నారు. ధర్నాలో సీనియర్‌ లాయర్లు నిత్యా రామకృష్ణన్, పల్లవ్‌ సిసోడియా తదితరులు సైతం పాల్గొన్నారు. నేహా బోరాను ఒక పోలీస్‌ అధికారి కొట్టాడని, మరో ఢిల్లీ పోలీస్‌ అధికారి దూషించాడని ఏఐఎస్‌ఏ సభ్యులు ఆరోపించారు. దీనిపై ఢిల్లీ పోలీసుల నుంచి ఎలాంటి స్పందనా రాలేదు. మరోవైపు శుక్రవారం నాటి అనుమతిలేని ధర్నాలు, ర్యాలీలకు సంబంధించి ఢిల్లీ పోలీసులు శనివారం మూడు ఎఫ్‌ఐఆర్‌లు నమోదుచేశారు. ధర్నాలో పాల్గొనాలని పిలుపునిచ్చిన సంస్థల పేర్లను అందులో చేర్చారు. జంతర్‌మంతర్‌ వద్ద భారీ ధర్నాలకు ఆస్కారంలేకుండా ఢిల్లీ పోలీసులు భారీస్థాయిలో బలగాలను మొహరిస్తున్నారు.

న్యూఢిల్లీ: ఓటరు జాబితా, సర్‌ ప్రక్రియలో అవకతవకలకు పాల్పడినట్లు ఆరోపణలున్న ప్రధాన ఎన్నికల కమిషనర్‌(సీఈసీ) జ్ఞానేశ్‌ కుమార్‌ను వెంటనే అరెస్ట్‌ చేయాలంటూ శుక్రవారం జంతర్‌మంతర్‌ వద్ద నిరసన జరిగింది. ఆల్‌ ఇండియా స్టూడెంట్స్‌ అసోసియేషన్‌(ఏఐఎస్‌ఏ)ఢిల్లీ విభాగం, పౌర సమాజాల సభ్యులు ఈ ధర్నా కార్యక్రమం చేపట్టారు. ఎన్నికల కమిషన్‌కు వ్యతిరేకంగా, సీఈసీ రాజీనామా చేయాలంటూ వీరు నినాదాలు చేశారు. అయితే, నిరసన కోసం వీరు ఎటువంటి అనుమతులు కోరలేదని పోలీసులు తెలిపారు. అందుకే నిర్వాహకులను అరెస్ట్‌ చేశామన్నారు. పోలీసులు నిర్బంధంలోకి తీసుకున్న వారిలో సీపీఐ(ఎంఎల్‌) లిబరేషన్‌ ప్రధాన కార్యదర్శి దీపాంకర్‌ భట్టాచార్య, ఉద్యమకారుడు యోగేంద్ర యాదవ్, ఏఐఎస్‌ఏ అధ్యక్షురాలు నేహా బోరా తదితరులున్నారు. అయితే, శనివారం, ఆ తర్వాతా తాము నిరసనలను కొనసాగిస్తామని ఏఐఎస్‌ఏ నేతలు తెలిపారు. కంఝావాలా పోలీస్‌స్టేషన్‌ నుంచి నేహా ఒక వీడియో విడుదల చేశారు. అందులో ఆమె..ఎన్నికల సంఘం నుంచి జవాబుదారీతనాన్ని డిమాండ్‌ చేసినందుకే పోలీసులు విద్యార్థులను అదుపులోకి తీసుకున్నారని ఆరోపించారు. ‘రాజ్యాంగం అందరికీ ప్రజాస్వామ్యబద్ధంగా నిరసన తెలిపే హక్కును ప్రసాదించింది, అందుకే మేం జంతర్‌ మంతర్‌ వద్ద నిరసన తెలపడానికి వెళ్లాం’అని పేర్కొన్నారు. ఈ రోజు తమను అదుపులోకి తీసుకున్నప్పటికీ, రేపు మళ్లీ వస్తాం, ఎల్లుండీ వస్తాం. జ్ఞానేశ్‌ కుమార్‌ జైలుకు వెళ్లే వరకు.. సర్‌ నిలిపివేసే వరకు.. రాజ్యాంగ విరుద్ధంగా ఓటు హక్కు కోల్పోయిన ఓటర్లందరికీ తిరిగి ఓటు హక్కు పునరుద్ధరించే వరకు నిరసనలతో హోరెత్తిస్తాం’అని నేహా ఆ వీడియోలోపేర్కొన్నారు. అరెస్ట్‌ సమయంలో పోలీసులు నిరసనకారులపై విచక్షణారహితంగా వ్యవహరించారని భట్టాచార్య ఆరోపించారు. ఈ మేరకు ఆయన ఒక ప్రకటన విడుదల చేశారు. నిరసన స్థలంలో మోహరించిన కొందరు పోలీసు సిబ్బంది నేమ్‌ ట్యాగ్‌లు (పేరు బిళ్ళలు) ధరించకపోవడంపై ఆయన అనుమానం వ్యక్తం చేశారు. ‘ఓట్ల దొంగతనానికి పాల్పడుతూ జ్ఞానేశ్‌ పట్టుబడ్డారు. ఆయన రాజీనామా చేయాలని డిమాండ్‌ చేస్తుంటే, సీఈసీగా ఆయన్ను నియమించిన మోదీ, షాలు నిరసనలను అణచివేయడానికి ఢిల్లీ పోలీసులను ప్రయోగిస్తున్నారు. ప్రభుత్వం సీఈసీని కాపాడుతోంది’అని విమర్శించారు.

రాంచీ: జార్ఖండ్‌లో ప్రభుత్వ ఉద్యోగాల నియామక పరీక్షల్లో జరిగిన అవకతవకలకు నిరసనగా శుక్రవారం అసెంబ్లీ వరకు నిర్వహించిన నిరసన ప్రదర్శన సందర్భంగా ఉద్రిక్తత చోటుచేసుకుంది. ఆల్‌ ఇండియా స్టూడెంట్స్‌ అసోసియేషన్‌(ఏఐఎస్‌ఏ) అధ్యక్షురాలు నేహా బోరాను దేశద్రోహి అని ఆరోపిస్తూ ఒక వ్యక్తి ఆమెపై సిరా చల్లాడు. వామపక్ష విద్యార్థి సంఘాలైన ఏఐఎస్‌ఏ, ఏఐఎస్‌ఎఫ్‌ మద్దతుదారులు, నిరసనకారులు అసెంబ్లీ వైపు ర్యాలీగా వెళ్తుండగా బిర్సా చౌక్‌ వద్ద ఈ ఘటన జరిగింది. సిరా చల్లిన వ్యక్తిని అమర్‌నాథ్‌ పాండేగా గుర్తించారు. పోలీసులు అదుపులోకి తీసుకొని ప్రశి్నస్తున్నారు. అయితే, ఇప్పటివరకు అతనిపై ఎఫ్‌ఐఆర్‌ నమోదు చేయలేదని పోలీసులు చెప్పారు. ఈ సిరా దాడి ఒక నాటకమేనని ప్రతిపక్ష బీజేపీ విమర్శించింది. అధికార జేఎంఎం నేతృత్వంలోని కూటమిలో భాగమైన సీపీఐ(ఎంఎల్‌) లిబరేషన్‌కు ఏఐఎస్‌ఏ విద్యార్థి విభాగమని గుర్తుచేసింది. ఉద్యమాన్ని బలహీనపర్చడానికి కుట్రలు తాజా సంఘటనపై నేహా బోరా స్పందించారు. ఢిల్లీలో నిరసనల సమయంలో పెల్లెట్‌ గన్‌ కాల్పులు, లాఠీచార్జిని ఎదుర్కొన్న తనకు ఈ సిరా దాడి వల్ల ఎలాంటి భయం కలగదని చెప్పారు. దేశవ్యాప్తంగా విద్యార్థులు, యువత ఆగ్రహాన్ని సిరాతో అణచివేయగలరా? అని ప్రశ్నించారు. ఉద్యమాన్ని బలహీనపర్చడానికి బీజేపీ–ఆర్‌ఎస్‌ఎస్‌ వర్గాలు కుట్రలు సాగిస్తున్నాయని దుయ్యబట్టారు. నిరసన ర్యాలీ నిర్వహిస్తుండగా హింసకు పాల్పడాల్సిన అవసరం ఏమొచ్చిందని నిలదీశారు. కేంద్ర విద్యాశాఖ మంత్రి ధర్మేంద్ర ప్రధాన్‌ రాజీనామాకు దారితీసిన ఢిల్లీ ఉద్యమంలో తాను భాగమైనందుకే ప్రతీకార చర్యగా బీజేపీ ఈ ఘటనకు పాల్పడిందని నేహా బోరా ఆగ్రహం వ్యక్తంచేశారు. శాంతియుతంగా ర్యాలీ నిర్వహిస్తుండగా జనసందోహం మధ్య నుంచి ఒక్కసారిగా ఒక వ్యక్తి బయటకు వచ్చి బోరాపై సిరా విసిరాడని ఏఐఎస్‌ఏ నాయకురాలు శివాని పేర్కొన్నారు. నిందితుడికి బీజేపీ అండదండలు ఉన్నాయని ఆరోపించారు. నేహా బోరా దేశ వ్యతిరేకి అని నిందితుడు అమర్‌నాథ్‌ పాండే మండిపడ్డాడు. ఆమె ఉమర్‌ ఖలీద్‌ మద్దతుదారు అని ధ్వజమెత్తాడు. ఆసుపత్రికి రాహుల్‌ క్రాంతి తరలింపు ప్రభుత్వ ఉద్యోగాల భర్తీలో అక్రమాలకు వ్యతిరేకంగా నిరాహార దీక్ష కొనసాగిస్తున్న ఆరుగురు నిరసనకారుల ఆరోగ్య పరిస్థితి క్రమంగా క్షీణిస్తున్నట్లు తెలిసింది. వారిలో రాహుల్‌ క్రాంతి అనే విద్యార్థి ఆరోగ్యం విషమించడంతో శుక్రవారం రాంచీలోని సదర్‌ ఆసుపత్రిలో చేర్చినట్లు ఒక అధికారి తెలిపారు. రాహుల్‌ క్రాంతి మంగళవారం రాత్రి నుంచి నిరాహార దీక్ష చేస్తున్నాడు. అతడి ఆరోగ్య పరిస్థితి గురించి ప్రతిపక్ష నాయకుడు బాబూలాల్‌ మరాండి ఆరా తీశారు. మెరుగైన చికిత్స అందించాలని వైద్యులను కోరారు. ఇద్దరు మహిళలు సహా మొత్తం ఐదుగురు నిరాహార దీక్ష కొనసాగిస్తున్నారు. మరోవైపు విద్యార్థుల నిరసన శుక్రవారం నాటికి 14వ రోజుకు చేరుకుంది. రెండు విద్యార్థి సంఘాలు రాష్ట్ర అసెంబ్లీ వరకు పాదయాత్ర నిర్వహించాయి. నియామక పరీక్షల్లో అక్రమాలను అరికట్టాలని డిమాండ్‌ చేశాయి. 14వ జేపీఎస్సీ సివిల్‌ సరీ్వసెస్‌ పరీక్షను రద్దు చేయాలని, అవకతవకలపై సీబీఐ లేదా విశ్రాంత హైకోర్టు న్యాయమూర్తుల బృందం చేత స్వతంత్ర విచారణ జరిపించాలని తేల్చిచెప్పాయి. ప్రభుత్వంతో తొలి విడత చర్చలు ప్రభుత్వ నియామక పరీక్షల్లో అవకతవకలపై జార్ఖండ్‌ ప్రభుత్వంతో చర్చలు జరిపినప్పటికీ ఆందోళనను కొనసాగిస్తామని నిరసనకారులు తేల్చిచెప్పారు. జేపీఎస్సీ పరీక్షను రద్దు చేయడంతోసహా తమ డిమాండ్లన్నీ నెరవేర్చే వరకూ ఆందోళనను విరమించబోమని పేర్కొన్నారు. ఆదివారం నాటికి తమ డిమాండ్లు నెరవేరకపోతే, ఆగస్టు 10న రాష్ట్ర అసెంబ్లీకి ర్యాలీగా వెళ్తామని చెప్పారు. రాష్ట్ర ప్రభుత్వానికి, జేపీఎస్సీ/జేఎస్‌ఎస్సీ సంస్కరణల మంచ్‌కు చెందిన 10 మంది సభ్యుల ప్రతినిధి బృందానికి మధ్య శుక్రవారం రాత్రి మొదటి విడత చర్చలు జరిగాయి. జార్ఖండ్‌ ప్రభుత్వంతో చర్చలు సానుకూల వాతావరణంలో జరిగాయని, తమ డిమాండ్లను పరిశీలిస్తామని ప్రభుత్వం హామీ ఇచ్చిందని సంస్కరణల మంచ్‌ నాయకులు చెప్పారు.


 న్యూఢిల్లీ: జవహర్‌లాల్‌నెహ్రూ స్టూడెంట్స్ యూనియన్ ఎన్నికల్లో ఆల్ ఇండియా స్టూడెం ట్స్ అసోసియేషన్ (ఏఐఎస్‌ఏ) విజయఢంకా మోగించింది. శుక్రవారం జేఎన్‌యూలో విద్యార్థి సంఘాల ఎన్నికలు జరిగిన విషయం తెలిసిందే. ఇందులో ఏఐఎస్‌ఏ, ఏబీవీపీ, ఎన్‌ఎస్‌యూఐ, ఎస్‌ఎఫ్‌ఐ,ఎల్‌పీఎఫ్ తరఫున అభ్యర్థులు పోటీపడ్డారు. ఎన్నిక జరిగిన ప్రధాన నాలుగు పోస్టులనూ ఏఐఎస్‌ఏ గెలుచుకుంది. అధ్యక్షుడిగా పోటీచేసిన అశ్‌తోష్ కుమార్ (ఏఐఎస్‌ఏ)కు 1,386 ఓట్లు పోలయ్యాయి. ఎల్‌పీఎఫ్ తరఫున పోటీచేసిన రహీలా పర్వీన్  (377 ఓట్ల తేడా) రెండో స్థానంతో సరిపెట్టుకుంది.
  
  అలాగే ఉపాధ్యక్షుడిగా అనంత్‌ప్రకాష్ (ఏఐఎస్‌ఏ) తన సమీప ప్రత్యర్థి మహ్మద్ జహిదుల్ దేవన్(ఏబీవీపీ)పై 600 ఓట్ల తేడాతో గెలిచాడు. ప్రధాన కార్యదర్శి పదవి కోసం జరిగిన పోరులో చింటు కుమారి (ఏఐఎస్‌ఏ), తన సమీప ప్రత్యర్థి ఆశిష్‌కుమార్ ధనోటియా (ఏబీవీపీ)పై 814 ఓట్ల తేడాతో జయకేతనం ఎగురవేసింది.  సంయుక్త కార్యదర్శిగా ఏఐఎస్‌ఏకు చెందిన షఫ్కత్ హుస్సేన్, తన సమీప ప్రత్యర్థి ములాయంసింగ్(ఎల్‌పీఎఫ్)పై 240 ఓట్ల తేడా తో విజయం చేజిక్కించుకున్నారు. గత ఏడాది కూడా జేఎన్‌యూ ఎన్నికల్లో ఏఐఎస్‌ఏ అన్ని పదవులను కైవశం చేసుకున్న విషయం తెలిసిందే.