అది ముగిసిపోయిన అధ్యాయం!

అది ముగిసిపోయిన అధ్యాయం!

‘‘నా జీవితం నా ఇష్టం. ఎవరికీ వివరణ ఇవ్వాల్సిన అవసరం లేదు. అది ముగిసిపోయిన విషయం అయినా, జరుగుతున్నది అయినా’’ అని కంగనా రనౌత్ ఒకింత ఘాటుగా స్పందించారు. బోల్డ్‌గా మాట్లాడే ఈ బ్యూటీ ఇప్పుడిలా అనడానికి కారణం ఆమెకూ, హృతిక్ రోషన్‌కూ మధ్య ఎఫైర్ సాగుతోందనే వార్త రావడమే. ‘కైట్స్’ చిత్రం అప్పుడు ఈ ఇద్దరూ ప్రేమించుకున్నారనే వార్త వచ్చింది. ఆ చిత్రం విడుదలైన ఆరేళ్లకు మళ్లీ ఈ వార్త ఫ్రెష్‌గా మొదలైంది. దానికి కారణం ఏడాదిన్నర క్రితం హృతిక్, అతని భార్య సుజానె విడాకులు తీసుకోవడమే.

భార్య నుంచి విడిపోయాక మళ్లీ కంగనాతో పాత ప్రేమను హృతిక్ మొదలుపెట్టాడని బాలీవుడ్‌లో చెప్పుకుంటున్నారు. ఇన్నాళ్లూ ఈ వార్తను మౌనంగా భరించిన హృతిక్ హఠాత్తుగా  ‘‘నాకు ఎఫైర్ ఉందని వచ్చిన వార్తలన్నీ అబద్ధం’’ అని కుండ బద్దలు కొట్టారు. హృతిక్ ఇలా వివరణ ఇవ్వడం కంగనాకి ఏమాత్రం నచ్చనట్లుంది. అందుకే, ఎవరెవరికో వివరణ ఇవ్వాల్సిన అవసరం నాకు లేదంటూ ఇన్‌డెరైక్ట్‌గా ఈ హీరోగారికి చురక వేశారు.

‘‘నేను గతాన్ని తవ్వుకునే మనిషిని కాదు. ముగిసిపోయిన అధ్యాయం గురించి అస్సలు మాట్లాడను. ఎదుటివాళ్లు ఏం చేస్తున్నారు? ఎక్కడికి వెళుతున్నారు? అంటూ వాళ్ల జీవితాల్లోకి ఇతరులు తొంగి చూడటం పద్ధతి కాదు’’ అని కంగనా రనౌత్ అన్నారు.