సాక్షి, చైన్నె: బీజేపీ రాష్ట్ర అధ్యక్షుడు అన్నామలై పై కేసు నమోదుకు ప్రభుత్వం అనుమతి ఇచ్చింది. అన్నామలై ఇటీవల కాలంగా చేస్తూ వస్తున్న వ్యాఖ్యలు వివాదాలకు దారి తీస్తూ వచ్చిన విషయం తెలిసిందే. సేలంకు చెందిన సామాజిక కార్యకర్త పీయూష్‌ ఈ వ్యాఖ్యలను తీవ్రంగా పరిగణించి కోర్టును ఆశ్రయించారు. ఇరు వర్గాల ప్రజల మధ్య చిచ్చు పెట్టే విధంగా అన్నామలై వ్యవహరిస్తున్నారని పేర్కొంటూ కొన్ని అంశాలను కోర్టు దృష్టికి తెచ్చారు. ఆయనపై చర్యలు తీసుకోవాలని, కేసు నమోదుకు పోలీసులను ఆదేశించాలని కోరారు. ఈ పిటిషన్‌ను విచారించిన న్యాయ స్థానం ప్రభుత్వ అనుమతితో కేసు నమోదుకు ఆదేశించారు. కోర్టు ఆదేశాలను పరిగణనలోకి తీసుకున్న ప్రభుత్వం అన్నామలైపై కేసు నమోదు చేయాలని సేలం పోలీసులకు అనుమతినిచ్చింది. దీంతో ఆయనపై కేసు నమోదుకు పోలీసులు సిద్ధమయ్యారు.

ద్రవిడ మోడల్‌ పాలనలో గత మూడేళ్లలో గృహ నిర్మాణాలు, బహుళ అంతస్తులతో ప్లాట్‌ల కేటాయింపులో సరికొత్త రికార్డు సృష్టించినట్టు రాష్ట్ర ప్రభుత్వం ప్రకటించింది. రూ 3,198 కోట్లతో 28 వేల ప్లాట్‌లను సిద్ధం చేసి లబ్ధిదారులకు అప్పగించినట్టు వివరించింది. మూడేళ్లలో గృహ నిర్మాణాలలో తాము సాధించిన రికార్డుపై సీఎం స్టాలిన్‌ నేతృత్వంలో ఆదివారం సమగ్ర నివేదికను వెలువరించింది. ● 3,198 కోట్లతో 28 వేల ప్లాట్లు రెడీ ● లబ్ధిదారులకు అప్పగింత ● మూడేళ్ల ప్రగతిపై ప్రభుత్వం నివేదిక న్యూస్‌రీల్‌

సాక్షి, చైన్నె : డీఎంకే ప్రభుత్వం అధికారంలోకి వచ్చి ఈనెల 7వ తేదీతో మూడేళ్లు పూర్తి చేసుకున్న విషయం తెలిసిందే. నాలుగో వసంతంలోకి ప్రభుత్వం అడుగు పెట్టింది. ఈ సందర్భంగా గత మూడేళ్లలో గృహ నిర్మాణాలలో సాధించిన ప్రగతి, సృష్టించిన రికార్డులను వివరిస్తూ రాష్ట్ర ప్రభుత్వం ఆదివారం ప్రత్యేక నివేదికను వెలువరించింది. ఇందులో.. 1970 దివంగత నేత కరుణానిఽధి హయంలో తమిళనాడు స్లమ్‌ క్లియరెన్స్‌ బోర్డును ఏర్పాటు చేసినట్టు గుర్తు చేశారు. ఈ బోర్డు ప్రథమ కర్తవ్యం గుడిసెల స్థానంలో గృహాల నిర్మాణం, పేద కుటుంబాల జీవనోపాఽధి మెరుగు దిశగా ముందుకెళ్లినట్లు వివరించారు. గృహాల నిర్మానాలతో పాటు వారికి తాగునీరు, పారిశుధ్యం, విద్యుత్‌, రవాణా, విద్య, వైద్య తదితర సౌకర్యాలను కల్పించినట్టు పేర్కొన్నారు. 2021లో తమ ప్రభుత్వం అధికారంలోకి రాగానే స్లమ్‌ క్లియరెన్స్‌ బోర్డును అర్బన్‌ హాబిటడ్‌ డెవలప్‌ మెంట్‌ బోర్డుగా పేరు మార్చినట్లు వివరించారు. తమిళనాడు చరిత్రలో సరికొత్త విజయాలతో దూసుకెళ్తున్న సీఎం స్టాలిన్‌ నేతృత్వంలోని ప్రభుత్వం ఈ కొత్త అభివృద్ధి బోర్డు ద్వారా రికార్డులను సృష్టించే దిశగా కార్యాచరణను సిద్ధం చేసినట్టు తెలిపారు. మూడేళ్ల కాలంలో అద్బుత విజయాలను సొంతం చేసుకున్నామని, కనీవిని ఎరుగని రీతిలో బహుళ అంతస్తుల తరహాలో అపార్ట్‌మెంట్లు, ప్లాట్‌ల నిర్మానాలపై దృష్టి పెట్టినట్టు వివరించారు. నిర్ణీత గడువులోపు నిర్మాణాలను పూర్తి చేశామని లబ్ధిదారులకు ప్రస్తుతం గృహాల కేటాయింపులపై దృష్టి పెట్టామన్నారు. హాలు, వంటగది, బెడ్‌రూం మరుగు దొడ్డి సౌకర్యంతో ప్లాట్‌లను నిర్మించడమే కాకుండా మురుగునీటి సౌకర్యం, పవర్‌ లిఫ్ట్‌, రోడ్లు, వీధి దీపాలు, కాంక్రీటు హంగులతో ఆ పరిసరాలను సుందరంగా తీర్చిదిద్దామని వివరించారు. ఆయా ప్రాంతాలలో పాఠశాలలు, లైబ్రరీ, పార్కులు, అంగన్‌వాడీ కేంద్రాలు, ప్రాథమిక ఆరోగ్య కేంద్రం, మినీ దుకాణాలు, పాల దుకాణాలు, కమ్యూనిటీ హాల్‌ వంటి సౌకర్యాలను కల్పించామని పేర్కొన్నారు. పాత భవనాల పునరుద్ధరణ కొత్త నిర్మాణాలతో పాటు పాత భవనాలను పునరుద్ధరించడం, మరమ్మతులు చేయించడంలో ముందంజలో ఉన్నట్లు వివరించారు. ఇందులో 17 ప్రాజెక్టులు ఉన్నాయని ఇందులో 7,582 పునరుద్ధరణ, 9,522 ప్లాట్లకు మరమ్మతులు పూర్తి చేశామని వివరించారు. ప్రజలకు సమగ్ర వివరాలను తెలియ జేయాలనే లక్ష్యంతో, సొంతింటి కలను సాకారం చేసుకునే పనిలో ఉన్న వారి కోసం బృహత్తర పథకం మేరకు కొన్ని బహుళ అంతస్తుల భవనాలలో ప్లాట్లను ప్రత్యేక రాయితీతో విక్రయించామని వివరించారు. పేదల సొంతింటి కల సాకారం చేయడంలో తన ప్రభుత్వం ఇప్పటికే రికార్డులు సృష్టించిందని, మరింతగా ముందుకెళ్తూ, నిరుపేదలందరికీ గృహాల కేటాయింపు ప్రక్రియను విస్తృతం చేయనున్నామని ఆ నివేదిక ద్వారా వివరించారు. 92 ప్రాజెక్టులు.. తాము అధికారంలోకి రాగానే అర్బన్‌ హాబిటాట్‌ డెవలప్‌మెంట్‌ బోర్డ్‌ ద్వారా 92 ప్రాజెక్ట్‌లకు శ్రీకారం చుట్టామని, ఇవన్నీ ప్రస్తుతం ఫలితాలను ఇస్తూ లబ్ధిదారుల జీవితాలలో ఆనందాన్ని నింపుతున్నాయని ఆ నివేదిక ద్వారా స్పష్టం చేశారు. అధికారంలోకి వచ్చినానంతరం రూ. 3,198 కోట్లతో బహుళ అంతస్తుల తరహా నిర్మాణాలతో 28,824 ప్లాట్లను పూర్తి చేశామన్నారు. మురికి వాడలలో నివాసం ఉన్న వారికి ఉపయోగం కల్పించే విధంగా లబ్ధిదారులకు కేటాయింపుల ప్రక్రియ శరవేగంగా జరుగుతోందని వివరించారు. గత నిర్మాణాలతో పాటు మొత్తంగా 37,720 మందికి ప్రస్తుతం లబ్ధి చేకూర్చినట్లు వివరించారు. అలాగే, 1,68,495 వ్యక్తిగత గృహ నిర్మాణాలు పూర్తి చేశామని, మరో 89,429 వ్యక్తిగత గృహాల నిర్మాణాలకు అనుమతులు జారీ చేసి పనులు వేగవంతం చేశామన్నారు.

సాక్షి, చైన్నె: చైన్నె మెరీనా తీరంలో సైలింగ్‌ అకాడమీ ఏర్పాటుకు స్పోర్ట్స్‌ డెవలప్‌మెంట్‌ అఽథారిటీ కార్యాచరణ సిద్ధం చేసింది. రూ. 7 కోట్లతో పనులకు చర్యలు చేపట్టారు. ఈ పనులకు సంబంధించిన సమగ్ర నివేదికను కోస్టల్‌ రెగ్యులేషన్‌ జోన్‌ అథారిటీ వర్గాలకు పంపించారు. వివరాలు.. డీఎంకే ప్రభుత్వం అధికారంలోకి వచ్చినానంతరం రాష్ట్రంలో క్రీడలకు పెద్దపీట వేస్తూ వస్తున్న విషయం తెలిసిందే. జాతీయ, అంతర్జాతీయ పోటీలకు తమిళనాడు వేదికగా మారింది. ప్రపంచస్థాయి చెస్‌ పోటీలు, ఏషియన్‌ స్థాయిలో హాకీ, ఖేలో ఇండియా పోటీలను ఇక్కడ విజయవంతంగా నిర్వహించారు. అన్ని నియోజకవర్గాల్లో మినీ స్టేడియాలు, ప్రధాన నగరాలలో జాతీయ, అంతర్జాతీయ స్థాయి పోటీలకు వేదికగా క్రీడా మైదానాల ఏర్పాటు ప్రక్రియ మీద దృష్టి పెట్టమే కాకుండా, చైన్నె శివారులలో స్పోర్ట్స్‌ సిటీ ఏర్పాటుకు ప్రణాళిక సిద్ధం చేశారు. ఈ పరిస్థితుల్లో చైన్నెలో అతి పెద్ద సముద్ర తీరంగా ఉన్న మెరీనాలో సైలింగ్‌ అకాడమీ ఏర్పాటుకు సిద్ధమయ్యారు. సైలింగ్‌ అకాడమీ.. దేశంలో అతిపెద్ద సాగర తీరం బీచ్‌గా చైన్నె మెరీనా పేరు గడించిన విషయం తెలిసిందే. ఇక్కడకు నిత్యం సందర్శకులు వచ్చి వెళ్తుంటారు. అతి పొడవైన సముద్ర తీరంతో పాటు ఇసుక దిమ్మెలతో పర్యాటకంగా సందర్శకుల్ని ఈ బీచ్‌ ఆకర్షిస్తోంది. మెరీనా తీరంలో ఓ వైపు కిలో మీటర్ల కొద్ది సముద్రం, మరోవైపు ప్రభుత్వ కార్యాలయాలు, ప్రభుత్వ విద్యా సంస్థలు చూడముచ్చటగా కనిపిస్తుంటాయి. ఈ తీరంలోనే దివంగత సీఎంలు అన్నాదురై, ఎంజీయార్‌, అమ్మ జయలలిత, మాజీ సీఎం, డిఎంకే అధినేత ఎం. కరుణానిధి సమాధులు , స్మారకాలు గంభీరంగా కనిపిస్తుంటాయి. అలాగే మెరీనాను మరింత సుందరంగా తీర్చిదిద్దేందుకు గతంలో పర్యాటక శాఖ సిద్ధమైంది. ఇందుకు సంబంధించిన ప్రణాళిక సిద్ధం చేసి అమలు చేయడానికి ఏర్పాట్లు చేస్తున్నారు. ఈ పరిస్థితుల్లో మెరీనాతీరంలో జాతీయ , అంతర్జాతీయ పోటీలకు తగ్గట్టుగా ఆధునిక ప్రమాణాలతో సైలింగ్‌ అకాడమీ ఏర్పాటుకు సిద్ధమయ్యారు. రాష్ట్ర స్పోర్ట్స్‌ డెవలప్‌మెంట్‌ అథారిటీ సభ్య కార్యదర్శిగా మేఘనాథరెడ్డి బాధ్యతలు స్వీకరించినానంతరం క్రీడల శాఖలో కొత్త ఒరవడి సృష్టించే విధంగా జరుగుతున్న పథకాల అమల్లో భాగంగా ప్రస్తుతం సైలింగ్‌ అకాడమీకి కార్యాచరణ సిద్ధం చేశారు. మెరీనా తీరంలోని కూవం నది ముఖ ద్వారం వద్ద రూ. 7 కోట్లతో సైలింగ్‌ అకాడమీ, శిక్షణ కేంద్రా ఏర్పాటుకు నిర్ణయించారు. ఈ ప్రాజెక్టుకు గతంలోనే నిర్ణయించినా, తాజాగా అమలు ప్రయత్నాలు వేగవంతం చేశారు. ఈ ప్రాజెక్టు కోసం 2.75 ఎకరాలలో విస్తీర్ణ స్థలాన్ని ఎంపిక చేశారు. 1250 చదరపు మీటర్లతో రెండు అంతస్తులతో భవన నిర్మాణాలకు చర్యలు చేపట్టారు. సైలింగ్‌ పోటీలలో పాల్గొనే క్రీడాకారుల పడవలను నిలిపేందుకు ప్రత్యేక పార్కింగ్‌ షెడ్డులు ఏర్పాటు చేయడానికి నిర్ణయించారు. సమగ్ర సమాచారం, కొత్త అంశాలతో కూడిన నివేదికను సిద్ధం చేసి కోస్టల్‌ రెగ్యులేషన్‌ జోన్‌ అథారిటీకి పంపించారు. రూ. 7 కోట్లను నిర్మాణాలకు అంచనా వ్యయంగా నిర్ణయించారు. కోస్టల్‌ అనుమతులు దక్కగానే పనులు చేపట్టేందుకు తగ్గ కార్యాచరణతో క్రీడల శాఖ వర్గాలు ముందుకెళ్తున్నాయి. అన్ని రకాల అనుమతులతో సకాలంలో పనులు ముగిసిన పక్షంలో చైన్నె మెరీనా తీరంలో మరో ఐకాన్‌గా ఈ అకాడమీ నిలిచే అవకాశాలు అధికంగా ఉన్నాయి. రూ. 7 కోట్లతో పనులకు కార్యాచరణ అనుమతుల కోసం సముద్ర తీర విభాగానికి నివేదిక

కొరుక్కుపేట: కమలకన్ని అమ్మన్‌ ఉత్సవాల సందర్భంగా ఈ నెల 13 నుంచి 22వ తేదీ వరకు సెంజికోట సందర్శనకు భక్తులను ఉచితంగా అనుమతిస్తామని భారత పురావస్తు శాఖ తెలిపింది. వివరాలు.. విల్లుపురం జిల్లాలోని సెంజిలో చారిత్రక ప్రాధాన్యత కలిగిన సెంజికోట ఉంది. పురావస్తు శాఖ ఆధ్వర్యంలోని ఈ కోటను సందర్శించేందుకు రుసుముగా స్థానిక పర్యాటకులకు రూ. 25, విదేశీ పర్యాటకులకు రూ. 250 వసూలు చేస్తున్నారు. కొండపై ఉన్న ఈ కోటలో పురాతన శ్రీకమలకన్ని అమ్మన్‌ ఆలయం ఉంది. ఈ ఆలయంలో బ్రహ్మోత్సవాలకు ఏర్పాట్లు చేశారు. ఆ ప్రకారం 13న శ్రీకమలకన్ని అమ్మన్‌ ఆలయ ఉత్సవాలు ధ్వజారోహణంతో ప్రారంభం కానున్నాయి. మే 22 వరకు ఉత్సవాలు జరగనుండటంతో భక్తులు పోటెత్తారు. దీంతో సెంజి కోటను సందర్శించేందుకు 10 రోజుల పాటు ఎలాంటి రుసుం చెల్లించకుండా పర్యాటకులకు ఉచితంగా అనుమతి ఇస్తున్నట్లు నిర్వాహకులు ప్రకటించారు. రిజర్వాయర్లలో తగ్గుతున్న నీటిమట్టం తిరువొత్తియూరు: చైన్నెకి తాగునీరు పూండి, చోళవరం, పుళల్‌, కన్నన్కోట తేర్వాయి కండిగై, సెంబరంబాక్కం, వీరాణం చెరువుల నుంచి అందుతోంది. అలాగే నెమ్మేలి, మీంజూర్‌ వద్ద సముద్రపు నీటి డీశాలినేషన్‌ ప్లాంట్‌ నుంచి నీటిని ప్రజలకు సరఫరా చేస్తున్నారు. ఇందులో కడలూరు జిల్లాలోని వీరాణం చెరువు నీరులేక ఎండిపోయింది. ఇక పూండి చెరువులో 755 మిలియన్‌ ఘనపు అడుగులతో 23.37 శాతం మాత్రమే నీరు నిల్వ ఉంది. చోళవరం 106 మిలియన్‌ క్యూబిక్‌ అడుగులతో 9.81 శాతం, పుఝల్‌ సరస్సు 86.97 శాతం 2,870 మిలియన్‌ క్యూబిక్‌ అడుగులతో (2.8 టీఎంసీలు)నూ, కన్నన్‌కోట్టై, తేర్‌వాయి కండ్రిగ 71.80 శాతం 359 మిలియన్‌ క్యూబిక్‌ అడుగులతోనూ, సెంబరంబాక్కం చెరువు 2,137 ఘనపు అడుగుల (2.1 టీఎంసీ)తో 58.63 శాతం నీటినిల్వనూ కలిగి ఉంది. తద్వారా మొత్తం 6,227 మిలియన్‌ క్యూబిక్‌ ఫీట్లు (6.2 టీఎంసీలు)తో ఆరు నెలల పాటు నగరంలో తాగునీటి అవసరాలను తీర్చవచ్చు. ఇక వేసవి తాపానికి నీటిమట్టం పడిపోతున్నందున, ఈ సరస్సుల్లో సగటున 47.10 శాతం నీటి సామర్థ్యం మాత్రమే ఉందని జలవనరుల శాఖ అధికారులు ఆదివారం ప్రకటించారు. తిరుత్తణిలో అరుదైన గుడ్లగూబ తిరుత్తణి: తిరుత్తణి బైపాస్‌ రోడ్డుకు సమీపంలో ఏరిక్కరై వద్ద మహేష్‌ అనే వ్యక్తి ఇంటి సమీపంలో వింత గుడ్ల గూబ కనిపించింది. దాన్ని స్థానికులు పట్టుకుని అటవీశాఖ రేంజర్‌ అరుల్‌ నాదన్‌కు అందజేశారు. ఆయన ఆస్ట్రేలియాకు చెందిన గుడ్లగూబ జాతిగా గుర్తించారు. 16వ తేదీ వరకు వర్షాలు సాక్షి, చైన్నె : రాష్ట్రంలోని పలు జిల్లాలో ఈనెల 16వ తేదీ వరకు వర్షాలు పడనున్నాయని వాతావరణ కేంద్రం ఆదివారం ప్రకటించింది. వివరాలు.. రాష్ట్రంలో గత రెండు నెలలుగా భానుడు తీవ్రప్రభావాన్ని చూపించిన విషయం తెలిసిందే. అయితే నాలుగైదు రోజులుగా భానుడి సెగ కొన్ని జిల్లాల్లో తగ్గింది. ఇందుకు కారణం అకాల వర్షం పలకరిస్తుండడమే. శనివారం రాత్రి మదురై, తిరుచ్చి తదితర నగరాలలో ఈదురు గాలులతో భారీ వర్షం పడింది. రోడ్లన్నీ జలమయం అయ్యా యి. ఈ పరిస్థితులో ఈనెల 16వ తేదీ వరకు పలు జిల్లాల్లో వర్షాలు కొనసాగుతాయని వాతావరణ కేంద్రం ప్రకటించింది. కోయంబత్తూరు, తేని, దిండుగల్‌, విరుదునగర్‌, తెన్‌కాశి, తిరునల్వేలి, కన్యాకుమారి తదితర జిల్లాలో ఈ వర్షాలు కొనసాగేందుకు అవకాశం ఉందని ప్రకటించారు. స్టాన్లీ ప్రభుత్వ ఆసుపత్రిలో ఖైదీ మృతి అన్నానగర్‌: పుళల్‌ కేంద్ర కారాగారంలో క్షయ వ్యాధితో బాధపడుతున్న ఖైదీ స్టాన్లీ ప్రభుత్వాసుపత్రిలో ఆదివారం ఉదయం మృతి చెందాడు. వివరాలు.. చైన్నెలోని పుళల్‌ సెంట్రల్‌ జైలు కాంప్లెక్స్‌లో 700ల మందికి పైగా ఖైదీలను నిర్బంధంలో ఉంచారు. వీరిలో చైన్నె ఐసీఎఫ్‌లోని న్యూ అవడి రోడ్డుకు చెందిన రాజా (61) పోక్సో కేసులో అరెస్టయ్యాడు. గత మార్చి నుంచి రాజాని పుళల్‌ జైలులో పెట్టారు. కాగా రాజా క్షయవ్యాధితో బాధపడుతున్నట్లు తెలుస్తోంది. దీంతో అతను ఈ ఏడాది ఏప్రిల్‌ 18న చైన్నెలోని స్టాన్లీ ప్రభుత్వ ఆసుపత్రిలో చేరాడు. పోలీసు రక్షణలో తీవ్రమైన చికిత్స పొందుతున్నాడు. ఈ క్రమంలో ఆదివారం ఉదయం రాజా మృతి చెందాడు. పుళల్‌ పోలీసులు కేసు నమోదు చేసి దర్యాప్తు చేస్తున్నారు.