ముందుగానే యూనిఫామ్‌లు

ముందుగానే యూనిఫామ్‌లు

న్యాల్‌కల్‌ (జహీరాబాద్‌): పాఠశాలలు ప్రారంభమైనప్పటికీ పాఠ్యపుస్తకాలు, ఏకరూప దుస్తులు (యూనిఫామ్‌)లు సకాలంలో విద్యార్థులకు అందకపోవడం వారు తీవ్ర ఇబ్బందులు పడేవారు. పాత పుస్తకాలు, చిరిగిన పాత బట్టలతో పాఠశాలలకు వచ్చేవారు. ఈ విషయాన్ని గుర్తించిన ప్రభుత్వం పాఠశాలల ప్రారంభానికి ముందే ఉచిత పాఠ్య పుస్తకాలు, యూనిఫామ్‌లు అందించాలని నిర్ణయించి అందుకు అనుగుణంగా చర్యలు చేపట్టింది. దీంతో విద్యార్థులు సంతోషం వ్యక్తం చేస్తున్నారు.

చురుగ్గా పంపిణీ

జిల్లాలో ఉచిత పాఠ్య పుస్తకాల పంపిణీ కార్యక్రమం దాదాపు పూర్తి కావడంతో అధికారులు యూనిఫామ్‌ల పంపిణీకి శ్రీకారం చుట్టారు. జిల్లాలో ప్రాథమిక, ప్రాథమికోన్నత, ఉన్నత, ఆదర్శ పాఠశాలలతో కలిపి మొత్తం 1,249 ప్రభుత్వ పాఠశాలలున్నాయి. ఆయా పాఠశాలల్లో 1,09,319 మంది విద్యార్థులు చదువుతున్నారు. వీరందరికీ యూనిఫామ్స్‌ పంపిణీ చేసే కార్యక్రమం చురుగ్గా కొనసాగుతోంది. ఒక్కో విద్యార్థికి ఒక జత చొప్పున జిల్లా నుంచి ఆయా మండలాల్లోని పాఠశాలలకు యూనిఫామ్‌లు పంపిణీ చేస్తున్నారు. పాఠశాలలు ప్రారంభమ య్యే నాటికి విద్యార్థులందరికీ పాఠ్యపుస్తకాలతో పాటు యూనిఫామ్స్‌ ఏకకాలంలో అందించాలని ప్రభుత్వం నిర్ణయించింది. ఐతే పాఠ్య పుస్తకాలు పంపిణీ ముందే చేపట్టి దాదాపు పూర్తి చేసిన అధికారులు యూనిఫామ్స్‌ను కూడా త్వరగా అందించేందుకు చర్యలు తీసుకుంటున్నారు.

తరగతుల వారీగా..

ఒకటి నుంచి 5వ తరగతి చదువుతున్న బాలురకు చొక్కా, నిక్కర్‌, ఒకటి నుంచి 3వ తరగతి చదువుతున్న బాలికలకు చొక్కా, లాంగ్‌ఫ్రాక్‌, 4,5 తరగతులకు బాలికలకు షర్ట్‌, స్కర్ట్‌, 6 నుంచి 10వ తరగతి వరకు (బాలురు)చొక్కా, ప్యాంట్‌, బాలికలకు పంజాబీ డ్రెస్స్‌లను పంపిణీ చేస్తున్నారు. జత డ్రెస్స్‌లను దాదాపు అన్ని పాఠశాలలకు పంపిణీ చేసి విద్యార్థులకు అందిస్తున్నట్లు అధికారులు పేర్కొంటున్నారు. మిగిలిన జత కూడా త్వరలో విద్యార్థులకు అందిస్తామని తెలిపారు. ఇదిలా ఉండగా న్యాల్‌కల్‌ మండలంలోని పలు పాఠశాలలకు శుక్రవారం యూనిఫామ్‌లు వచ్చాయి. వాటిని ఉపాధ్యాయులు విద్యార్థులకు అందజేశారు.

విద్యార్థులకు అందజేస్తున్న వైనం

తొలగనున్న విద్యార్థుల ఇబ్బందులు

సంతోషంగా ఉంది

గతేడాది స్కూల్‌ డ్రెస్స్‌లు ఆలస్యంగా అందించారు. దీంతో ఉన్న పాత డ్రెస్స్‌లనే వేసుకొని స్కూల్‌కు వెళ్తూ ఇబ్బంది పడ్డాం. ఈసారి ముందే పుస్తకాలు, యూనిఫామ్స్‌ అందించడం చాలా సంతోషంగా ఉంది.

– అక్షిత, 7వ తరగతి, విద్యార్థినీ–మిర్జాపూర్‌(బి)

అన్ని పాఠశాలలకు పంపిణీ చేశాం

అన్ని పాఠశాలలకు యూనిఫామ్‌ల పంపిణీ అనుకున్న సమయానికే పంపించాం. ఒకటి రెండు పాఠశాలలు మినహా దాదాపు అన్ని పాఠశాలల్లో విద్యార్థులకు ఒక జత యూనిఫామ్స్‌ అందించగలిగాం. మిగిలిన జతను కూడా త్వరలో అందిస్తాం.

–వెంకటేశ్వర్లు, డీఈఓ, సంగారెడ్డి

1/2

ముందుగానే యూనిఫామ్‌లు

2/2

ముందుగానే యూనిఫామ్‌లు