ఆదర్శానికి లీకేజీలు

ఆదర్శానికి లీకేజీలు

వట్‌పల్లి(అందోల్‌): మోడల్‌ పాఠశాలల ద్వారా గ్రామీణ ప్రాంతాల్లోని పేద విద్యార్థులకు నాణ్యమైన విద్యతోపాటు దూర ప్రాంతాల నుంచి రాకపోకలు సాగించే పేద విద్యార్థులకు ఉచిత భోజనం, వసతిని కల్పించడం కోసం ప్రభుత్వం ఆదర్శ వసతి గృహాల ఏర్పాటుకు శ్రీకారం చుట్టింది. ఇందులో భాగంగా వట్‌పల్లి మండల పరిధిలోని పోతులబోగుడా మోడల్‌ పాఠశాల విద్యార్థుల కోసం నిర్మించిన హాస్టల్‌ భవనం రెండేళ్లు కూడా గడవకముందే శ్లాబ్‌ పెచ్చులూడుతూ నీటి లీకేజీలు ఏర్పడ్డాయి. కాంట్రాక్టర్ల కాసుల కక్కుర్తి, అధికారుల అలసత్వం వెరసి ఈ భవనం మళ్లీ మరమ్మతుల కోసం ఎదురుచూస్తోంది.

రూ.1.28కోట్ల నిధులతో...

ఈ హాస్టల్‌ నిర్మాణం కోసం 2016లో ఆర్‌ఎంఎస్‌ఏ ద్వారా రూ.1.28 కోట్ల నిధులను మంజూరు చేసింది. 2018లో వసతి గృహ నిర్మాణం ప్రారంభించగా దాదాపుగా ఆరేళ్ల తర్వాత హాస్టల్‌ నిర్మాణ పనులను పూర్తి చేసి 2023 అక్టోబర్‌ నెలలో వసతి గృహాన్ని ప్రారంభించారు. భవనం నిర్మించి రెండేళ్లు గడవకముందే భవనం పైకప్పు నుండి గోడలపై నీటి లీకేజీలు దర్శనమిస్తున్నాయి. భవన నిర్మాణ పనులు జరుగుతున్న సమయంలో అధికారుల పర్యవేక్షణ నామమాత్రంగా ఉండటంతో కాంట్రాక్టరు తన ఇష్టానుసారంగా పనులు చేసి చేతులు దులుపుకున్నాడని స్థానికులు ఆరోపిస్తున్నారు. ప్రభుత్వం అభివృద్ధి పనుల నిర్మాణం కోసం రూ.కోట్ల నిధులు మంజూరు చేస్తున్నప్పటికీ అధికారుల పర్యవేక్షణ లోపమే ఇందుకు నిదర్శనమని విమర్శిస్తున్నారు.

మరమ్మతు పనులు చేపట్టేనా..?

2023లో మోడల్‌ పాఠశాల హాస్టల్‌ను ప్రారంభించినప్పటికీ వసతిగృహ నిర్వహణ సిబ్బందిని నియమించకపోవడంతో రెండేళ్ల పాటు నిరుపయోగంగా ఉండటంతో పక్షులకు ఆవాసంగా మారి గదులు పక్షుల వ్యర్థాలతో నిండిపోయింది. ఈ ఏడాది నుంచి హాస్టల్‌ను ప్రారంభించేందుకు అధికారులు ఇటీవల వసతి గృహ సిబ్బందిని నియమించారు. దీంతో హాస్టల్‌ సిబ్బంది గదులను శుభ్రం చేయించడం, నీటి సరఫరా, విద్యుత్‌ మరమ్మతులు వంటి పనులను చేయిస్తున్న క్రమంలో భవనంపై చెరువులను తలపించేలా నిలిచిన వర్షపునీటితో పైకప్పు లీకేజీలు అవుతున్నట్లు గుర్తించారు. దీంతోపాటు వసతి గృహం నీటి అవసరాలను తీర్చేందుకు బోరుమోటారును కూడా ఏర్పాటు చేయలేదు. వారం రోజుల్లో పూర్తిస్థాయిలో విద్యార్థులు హాస్టల్‌కు వచ్చే అవకాశం ఉండటంతో ప్రారంభంలోనే సమస్యలతో స్వాగతం పలికేలా ఉంది. అధికారులు వెంటనే మరమ్మతులతోపాటు ఇతర మౌలిక వసతులను కల్పించాలని స్థానికులు కోరుతున్నారు.

రెండేళ్లక్రితం నిర్మించిన

హాస్టల్‌ భవనం

పూర్తిస్థాయిలో ప్రారంభించకముందే

నీటి లీకేజీలు

1/1

ఆదర్శానికి లీకేజీలు