దుర్గగుడి ప్రాంగణంలో చలువ పందిళ్లు

దుర్గమ్మ సన్నిధిలో విశేష అభిషేకాలు ఇంద్రకీలాద్రి (విజయవాడ పశ్చిమ): శ్రీదుర్గా మల్లేశ్వర స్వామి వార్ల దేవస్థానంలో ఆదివారం విశేష అభిషేకాలు జరిగాయి. సంకట హర చతుర్థిని పురస్కరించుకుని దేవస్థాన యాగశాలలో గణపతికి ప్రత్యేక అభిషేకాలు, అర్చనలు, గణపతి హోమం నిర్వహించారు. తొలుత ఆలయ అర్చకులు గణపతి విగ్రహానికి పంచామృతాలతో అభిషేకాలు నిర్వహించిన అనంతరం ప్రత్యేక పూజలు చేశారు. గణపతి హోమం నిర్వహించగా, ఆలయ చైర్మన్‌ రాధాకృష్ణ, ఈఓ శీనానాయక్‌లతోపాటు ఆలయ అధికారులు పాల్గొన్నారు. అమ్మవారి ఆలయంలో భక్తుల రద్దీ సాధారణంగా కనిపించింది. తెల్లవారుజాము నుంచి భక్తుల రద్దీ నామమాత్రంగానే ఉండగా, ఉదయం పది గంటల తర్వాత కాసింత పెరిగింది. మరో వైపున ఆలయ అధికారులు అంతరాలయ దర్శనం రద్దు చేసి బంగారు వాకిలి దర్శనం కల్పించారు. మధ్యాహ్నం అమ్మవారికి మహా నివేదన సమర్పించేందుకు అర్ధగంట పాటు అన్ని దర్శనాలు నిలిపివేశారు. మహా నివేదన అనంతరం 12.20 గంటలకు దర్శనాలు తిరిగి ప్రారంభమయ్యాయి. అర్ధగంట పాటు అన్ని దర్శనాలు నిలిపివేయడంతో క్యూలైన్లలో కాసింత భక్తుల తాకిడి కనిపించింది. ఆదివారం భక్తుల రద్దీ అంతంత మాత్రంగా ఉన్నా మహా మండపంలోని లిఫ్టులను ఐదో అంతస్తు వరకు మాత్రమే అనుమతించడంపై భక్తుల నుంచి ఫిర్యాదులందాయి. లోక కల్యాణార్థం, సర్వ మానవాళికి సంపూర్ణ ఆరోగ్యాన్ని కాంక్షిస్తూ అమ్మవారి ఆలయ ప్రాంగణంలో సూర్యోపాసన సేవ నిర్వహించారు. అమ్మవారి ఆలయ ప్రాంగణంలోని రాజగోపురం వద్ద సూర్య భగవానుడి విగ్రహానికి ఆలయ అర్చకులు, వేద పండితులు పూజా కార్యక్రమాలను నిర్వహించారు. అనంతరం సూర్య నమస్కారాలు, సూర్యోపాసన సేవ నిర్వహించగా, పలువురు ఉభయ దాతలు సేవలో పాల్గొన్నారు.