ముంబై : నగరవాసులకు శుభవార్త. వచ్చే నెలాఖరులోగా వడాలా-చెంబూర్ మార్గంలో మోనో రైలు సేవలు అందుబాటులోకి వచ్చే అవకాశముంది. 8.8 కిలోమీటర్ల పొడవైన ఈ కారిడార్‌లో మోనో రైలు సేవలను అందుబాటులోకి తీసుకురావడం కోసం ముంబై మహానగర ప్రాంతీయాభివృద్ధి సంస్థ (ఎంఎంఆర్ డీయే) శాయశక్తులా ప్రయత్నిస్తోంది. ఇందులోభాగంగా సేఫ్టీ సర్టిఫికెట్ కోసం సంబంధిత విభాగానికి దరఖాస్తు చేసింది. ఈ విషయమై ఎంఎంఆర్‌డీయే కమిషనర్ అశ్విని భిడే శుక్రవారం మీడియాతో మాట్లాడుతూ  సేఫ్టీ సర్టిఫికేషన్ అథారిటీకి తాము అవసరమైన పత్రాలను సమర్పించామని, వాటిని సంబంధిత అధికారులు పరిశీలి స్తున్నారన్నారు. దీంతోపాటు వారు స్వయంగా మోనో మార్గాన్ని పరిశీలిస్తారన్నారు. ఈ ప్రక్రియ మొత్తం పూర్తయ్యేందుకు దాదాపు నెల రోజుల సమయం పడుతుందని, ఆ తరువాత సేఫ్టీ సర్టిఫికెట్ ఇచ్చే అవకాశం ఉందన్నారు.