‘జీహెచ్‌ఎంసీ ఎన్నికల నిర్వహణకు సిద్ధం’

హైదరాబాద్: గ్రేటర్ హైదరాబాద్ మునిసిపల్ కార్పొరేషన్ (జీహెచ్‌ఎంసీ)కు ఎన్నికలు నిర్వహించడానికి సిద్ధంగా ఉన్నట్టు తెలంగాణ ప్రభుత్వం హైకోర్టుకు నివేదించింది. జీహెచ్‌ఎంసీ ఎన్నికలపై పిటిషన్లకు సంబంధించి విచారణ సోమవారం హైకోర్టు ధర్మాసనం ముందుకు వచ్చింది. హైదరాబాద్‌కు ప్రత్యేక అధికారి పాలన మంచిది కాదని ధర్మాసనం ఈ సందర్భంగా వ్యాఖ్యానించింది.

కాగా జీహెచ్‌ఎంసీ ఎన్నికల నిర్వహణకు సిద్ధంగా ఉన్నామని... ఎప్పుడు నిర్వహించేదీ తేదీలతో పూర్తిస్థాయి అఫిడవిట్‌ను వచ్చే వారం కోర్టుకు సమర్పిస్తామని ప్రభుత్వం తరఫు న్యాయవాది తెలిపారు. దీంతో విచారణను ధర్మాసనం వచ్చే వారానికి వాయిదా వేసింది.