విభజన సెగ ఢిల్లీలోని సీమాంధ్రులకు తాకింది

సాక్షి, న్యూఢిల్లీ:  విభజన సెగ ఢిల్లీలోని సీమాంధ్రులకు తాకింది. రాష్ట్ర విభజన నిర్ణయంతో సీమాంధ్ర రగలిపోతోంది. అక్కడి ప్రజలు పార్టీలకు అతీతంగా ఉద్యమాలు కొనసాగిస్తుండగా, ఆ ప్రాంత ప్రజాప్రతినిధులు పార్లమెంటును స్తంభింపచేస్తున్నారు. వారి ఆందోళనకు ‘మేం సైతం’ అంటూ సంఘీభావం తెలుపుతూ నగరంలో నివసించే సీమాంధ్ర ఉద్యోగులు, ప్రజలు, మహిళలు కదం తొక్కుతున్నారు. గడిచిన మూడు రోజుల నుంచి ఏపీభవన్‌లో సమైక్యాంధ్ర ఉద్యోగులు రాష్ట్ర ఐక్యత కాంక్షిస్తూ చేస్తున్న ఉద్యమానికి కొనసాగింపుగా ఆదివారం జంతర్ మంతర్‌లో ధర్నా నిర్వహించారు. ఓ వైపు భారీ వర్షంతో నగరం తడిచిముద్దవగా.. ఆందోళనకారులు మాత్రం వెనకడుగు వేయలేదు. విభజన నిర్ణయం తీసుకున్న కాంగ్రెస్‌పై మండిపడ్డారు. సీమాంధ్ర ఉద్యోగులు వెళ్లిపోవాలని టీఆర్‌ఎస్ అధినేత కేసీఆర్ హుకుంపై ధ్వజమెత్తారు. ఏపీభవన్ నుంచి ప్రారంభమైన ప్రదర్శన జంతర్ మంతర్ వరకు చేరుకుంది. ‘తెలుగుభాష ఒక్కటేరా.. తెలుగువారంతా ఒక్కటే రా’, ‘విభజన వద్దు ఐక్యత ముద్దు’,  ‘మాకు న్యాయం కావాలి’, ‘సమైక్యాంధ్ర కావాలి’ అంటూ నినాదాలు చేశారు.