అంతర్జాతీయ స్థాయిలో రాణించినా ఆటోనే కడుపునింపుతోంది

అంతర్జాతీయ స్థాయిలో రాణించినా ఆటోనే కడుపునింపుతోంది

నవీపేట: మండలంలోని ఫతేనగర్‌ ఫస్ట్‌ ప్లాట్‌ గ్రామానికి చెందిన మహ్మద్‌ ఇమ్రాన్‌ అలీఖాన్‌ ఉషు(మార్షల్‌ ఆర్ట్స్‌లో కత్తితో విన్యాసం)లో ఉత్తమ ప్రతిభ కనబరుస్తున్నాడు. సర్వర్‌ అలీఖాన్‌, నసీమ్‌ సుల్తానాకు నలుగురు కుమారులు, ఒక కుమార్తె. క్రీడాకారుడైన సర్వర్‌ఖాన్‌ తన కుమారుల్లో ఒక్కరినైనా ఉత్తమ క్రీడాకారుడిగా తీర్చిదిద్దాలని కలలుగన్నాడు. కుమారుల్లో ఒకరైనా మహమ్మద్‌ ఇమ్రాన్‌ అలీఖాన్‌కు మార్షల్‌ ఆర్ట్స్‌లో ఉన్న ఉత్సాహాన్ని పసిగట్టి ఉషు వైపు పరుగులు పెట్టించాడు. అప్పు చేసి పంజాబ్‌లోని పాటియాల ఎన్‌ఐఎస్‌లో బీపీఈడీ(బ్యాచిలర్‌ ఆఫ్‌ ఫిజికల్‌ ఎడ్యుకేషన్‌)లో చేర్పించాడు. అక్కడి నుంచి డిప్లొమా సాధించిన ఇమ్రాన్‌ అలీఖాన్‌ ఉషు క్రీడపై మరింత దృష్టి సారించి, మెళకువలు నేర్చుకున్నాడు.

అంతర్జాతీయ స్థాయిలో గోల్డ్‌మెడల్‌

రష్యా రాజధాని మాస్కోలో ఈనెల 1 నుంచి 7వ తేదీ వరకు 10వ ఇంటర్నేషనల్‌ ఉషు స్టార్స్‌ టోర్నమెంట్‌(2025)ను నిర్వహించారు. ఈ వేడుకలో 17 దేశాలకు చెందిన క్రీడాకారులు పాల్గొన్నారు. మన దేశం నుంచి 58 మంది క్రీడాకారులు పాల్గొనగా తెలంగాణ నుంచి ఇద్దరు పాల్గొన్నారు. ఆ ఇద్దరిలో ఒకరైన మహ్మద్‌ ఇమ్రాన్‌ అలీఖాన్‌ ఉత్తమ ప్రతిభ కనబర్చి బంగారు పతకాన్ని సాధించాడు.

ఆటో ఇంటి వద్ద ఉంటే పస్తులే!

అంతర్జాతీయ స్థాయి ఉషులో ఉత్తమ ప్రతిభ కనబరిచి బంగారు పతకం సాధించిన మహమ్మద్‌ అలీఖాన్‌ జీవనోపాధి కోసం ఆటో నడుపుతున్నాడు. భార్య, నాలుగేళ్ల కుమారుడిని పోషించేందుకు ప్రతిరోజూ ఆటో నడపాల్సిందే. ఏ ఒక్కరోజూ ఆటో ఇంటి వద్ద ఉన్నా ఆ కుటుంబం పస్తులు ఉండాల్సిన పరిస్థితి ఉంది. ఎన్ని ఆర్థిక ఇబ్బందులు ఎదురైనా టోర్నీమెంట్‌లకు వెళ్లేందుకు మళ్లీ అప్పులు చేస్తున్నాడు. ఆయన ఉత్సాహాన్ని చూసి కుటుంబ సభ్యులు సైతం అడ్డుకోలేకపోతున్నారు. ఓ వైపు టోర్నమెంట్‌లలో పాల్గొంటూ.. మరో వైపు ఆటో నడుపుతూ కుటుంబాన్ని పోషిస్తున్న ఇమ్రాన్‌ అలీఖాన్‌ నిజామాబాద్‌లో ప్రతి రోజూ కొంత మంది పేద చిన్నారులకు ఉచితంగా ఉషు శిక్షణ ఇస్తున్నాడు.

ఉషు క్రీడలో ఇమ్రాన్‌ అలీఖాన్‌ ప్రతిభ

చిన్నారులకు ఉచిత శిక్షణ

గోల్డ్‌మెడల్‌ సాధించినా

మారని పరిస్థితులు

ప్రభుత్వం ఆదుకోవాలి

కేంద్ర, రాష్ట్ర ప్రభుత్వాలు సహకరిస్తే అంతర్జాతీయ స్థాయిలో మరిన్ని పతకాలు సాధిస్తా. నన్ను ఆర్థికంగా ఆదుకోవాలని వేడుకుంటున్నా. జీవనోపాధి కోసం ఆటో తోలుకునే నాకు స్పోర్ట్స్‌ కోటాలో ఎక్కడైనా ఉద్యోగం కల్పించాలని కోరుతున్నా. మార్షల్‌ ఆర్ట్స్‌ విభాగంలోని ఉషులో రాణించేందుకు ప్రోత్సహించాలి.

– మహ్మద్‌ ఇమ్రాన్‌ అలీఖాన్‌, ఉషు

ఇంటర్నేషనల్‌ క్రీడాకారుడు

1/2

అంతర్జాతీయ స్థాయిలో రాణించినా ఆటోనే కడుపునింపుతోంది

2/2

అంతర్జాతీయ స్థాయిలో రాణించినా ఆటోనే కడుపునింపుతోంది