Ganesh utsav

సాక్షి, హైదరాబాద్‌: వినాయక నిమజ్జన వేడుకల నిర్వహణ విషయమై ట్యాంక్‌బండ్‌పై ఉద్రిక్తత నెలకొంది. నిమజ్జనానికి ఏర్పాట్లు చేయాలని డిమాండ్‌ చేస్తూ గణేష్‌ ఉత్సవ సమితి సభ్యులు ఆందోళనకు దిగడంతో పోలీసులు, ఉత్సవ సమితి సభ్యుల మధ్య వాగ్వాదం, తోపులాట చోటుచేసుకుంది.ట్యాంక్‌బండ్‌పై వినాయక నిమజ్జన వేడుకలు నిర్వహించాలని గణేష్‌ ఉత్సవ సమితి సభ్యులు డిమాండ్‌ చేశారు. అలాగే, జీహెచ్‌ఎంసీ ఏర్పాట్లు చేయని పక్షంలో తామే ఏర్పాట్లు చేసుకుంటామని ప్రకటించారు. ఈ క్రమంలో ట్యాంక్‌బండ్‌పై ఏర్పాటు చేసిన బారికేడ్లను ఉత్సవ కమిటీ సభ్యులు తొలగించేందుకు ప్రయత్నించగా పోలీసులు వారిని అడ్డుకున్నారు. దీంతో ఇరువర్గాల మధ్య వాగ్వాదం జరిగింది. అనంతరం ఉత్సవ సమితి సభ్యులు ట్యాంక్‌బండ్‌పై బైఠాయించి నిరసన తెలిపారు. ట్యాంక్‌బండ్‌పైనే వినాయక నిమజ్జన వేడుకలు నిర్వహించేందుకు అనుమతి ఇవ్వాలని ఉత్సవ సమితి సభ్యులు డిమాండ్‌ చేశారు. ఈ సందర్భంగా హుస్సేన్‌సాగర్‌లో గణేష్‌ నిమజ్జనానికి అవసరమైన ఏర్పాట్లు తామే చేసుకుంటామని భాగ్యనగర్‌ గణేష్‌ ఉత్సవ సమితి ప్రధాన కార్యదర్శి రావినూతల శశిధర్‌ తెలిపారు. పొల్యూషన్‌ కంట్రోల్‌ బోర్డు, జీహెచ్‌ఎంసీ అధికారుల వైఫల్యం కారణంగానే నిమజ్జన ఏర్పాట్ల విషయంలో ఇబ్బందులు తలెత్తుతున్నాయని ఆయన అన్నారు. అలాగే, 2001లో ప్లాస్టర్‌ ఆఫ్‌ పారిస్‌ విగ్రహాలను ఏర్పాటు చేయాలని ప్రభుత్వమే ఉత్తర్వులు ఇచ్చిందని పేర్కొన్నారు. హిందూ పండగలు వచ్చిన ప్రతిసారీ ఏదో ఒక కారణంతో నిమజ్జనంపై ఆంక్షలు విధించే ప్రయత్నం జరుగుతోందని ఆరోపించారు. హుస్సేన్‌సాగర్‌లో ప్రజల విశ్వాసాలు, సంప్రదాయాలకు అనుగుణంగానే గణేష్‌ నిమజ్జనం కొనసాగుతుందని తెలిపారు.అయితే, తమిళనాడులో జల్లికట్టుపై ప్రజల విశ్వాసాలను కాపాడిన తరహాలోనే హైదరాబాద్‌ గణేష్‌ భక్తుల విశ్వాసాలను కూడా ప్రభుత్వం గౌరవించి పరిరక్షించాలని రావినూతల కోరారు. భక్తుల మనోభావాలకు అనుగుణంగా నిమజ్జన కార్యక్రమానికి అవసరమైన ఏర్పాట్లు చేయాలని ఆయన సూచించారు.ఇదీ చదవండి: ఇది కాంగ్రెస్‌ తెచ్చిన కరువు

నాగ్‌పుర్: ఆధ్యాత్మికతతో పాటు విజ్ఞానాన్ని మేళవిస్తూ మహారాష్ట్రలోని నాగపూర్‌లో గల బాల గణేశోత్సవ మండల్ ఈ ఏడాది ‘విజ్ఞానం ద్వారా ఆత్మశుద్ధి’ ఇతివృత్తంతో ప్రత్యేక మండపాన్ని ఏర్పాటు చేసింది. మనసు, చైతన్యం, విజ్ఞానం, ఆధ్యాత్మికతల మధ్య ఉన్న అనుసంధానాన్ని భక్తులకు పరిచయం చేయడం దీని ఉద్దేశమని నిర్వాహకులు తెలిపారు. ఈ మండపాన్ని అంతరిక్షాన్ని ప్రతిబింబించేలా రూపొందించారు. గెలాక్సీలు, గ్రహాల స్ఫూర్తితో లోహాలు, రేఖాగణిత ఆకృతులు, వృత్తాకార నిర్మాణాలను ఉపయోగించి ఖగోళ అంశాలు, అవి మానవ జీవితంపై చూపే ప్రభావాన్ని ప్రతిబింబించారు.ప్రవేశద్వారం వద్ద భక్తుల అవగాహనకు విశ్వానికి సంబంధించిన నమూనాలను ఉంచారు. మానవ మెదడు పనిచేసే తీరును చూపించే ప్రతిరూపాలు, ఇన్‌స్టలేషన్లు ఇందులో ఏర్పాటు చేశారు. ఈ అలంకరణ ద్వారా భక్తులు తమలోకి తాము చూసుకుని ఆలోచనలు, భావోద్వేగాలు, చర్యల మధ్య సంబంధాన్ని అర్థం చేసుకోవాలని కోరుతున్నట్లు కార్పొరేటర్, మండల్ అధ్యక్షుడు ఈశ్వర్ తెలిపారు. ప్రధాన మండపంలోకి వెళ్లిన తర్వాత విశ్వాన్ని తలపించే ఏర్పాట్లు కనిపిస్తాయని, మానవ మెదడులో నిరంతరం జరిగే ఆలోచనలు, కార్యకలాపాలను గోడలపై ప్రతిబింబించామని ఈశ్వర్‌ వివరించారు. భావోద్వేగాలు, ప్రవర్తనకు సంబంధించిన శాస్త్రీయ ప్రక్రియలను కూడా ఇందులో చూపించినట్లు తెలిపారు. దేశవ్యాప్తంగా వివిధ మండళ్లలో రూపొందించిన నమూనాలు, డిజైన్లను పరిశీలించిన తర్వాత ఈ మండపాన్ని రూపొందించినట్లు చెప్పారు.మండపం మధ్యలో మనసు, మేధస్సు, ఆలోచనలు, సంస్కృతికి ప్రతీకగా భారీ జలాశయాన్ని పోలిన నిర్మాణాన్ని ఏర్పాటు చేశారు. దాని నుంచి వెలువడే తరంగాలు కామం, క్రోధం, లోభం, మోహం, మదం, మాత్సర్యం అనే ఆరు అంతర్గత శత్రువులను సూచిస్తాయి. మధ్యభాగం పైన భారీ శివలింగాన్ని ఏర్పాటు చేశారు. మానవులలో మారుతూ ఉండే ఆలోచనలు, భావోద్వేగాలను వీక్షించే విశ్వశక్తికి ఇది ప్రతీకగా పేర్కొన్నారు. అదుపు లేని భావోద్వేగాలు, ప్రతికూల ధోరణులు.. మానసిక అశాంతి, ఘర్షణ, ద్వేషం, హింస, విధ్వంసానికి దారితీస్తాయని ఈశ్వర్‌ తెలిపారు. దీనికి భిన్నంగా గణేశుడికి శరణాగతి, ప్రార్థన, నైతిక విలువలు, సత్ప్రవర్తన, కరుణ ఆత్మశుద్ధికి మార్గాలుగా చూపించినట్లు చెప్పారు. అజ్ఞానం నుంచి ఆధ్యాత్మిక జ్ఞానోదయం వైపు సాగే ప్రయాణానికి ప్రతీకగా 16 దీపస్తంభాలను కూడా ఏర్పాటు చేసినట్లు నిర్వాహకులు తెలిపారు.ఇదీ చదవండి: ఆడంబరాలకు దూరంగా.. వందేళ్ల 32 గణేశ మండపాలు

సాక్షి, హైదరాబాద్‌: వినాయక చవితి సందర్భంగా కేంద్ర మంత్రి బండి సంజయ్‌ కుమార్‌ హిందూ బంధువులందరికీ శుభాకాంక్షలు తెలిపారు. గణేశ్‌ ఉత్సవాలు హిందువుల ఐక్యతా స్ఫూర్తికి, భక్తికి నిదర్శనమని పేర్కొన్నారు. హిందువులంతా సంఘటితంగా ఉంటూ ఆనందోత్సవాలతో గణేశ్‌ ఉత్సవాలను జరుపుకోవాలని పిలుపునిచ్చారు.రాష్ట్రంలో వర్షాలు కురుస్తున్న నేపథ్యంలో గణేశ్‌ మండపాల నిర్వహణలో నిర్వాహకులు తగిన జాగ్రత్తలు తీసుకోవాలని బండి సంజయ్‌ సూచించారు. భక్తులకు ఎలాంటి ఇబ్బందులు కలగకుండా అవసరమైన భద్రతా చర్యలు చేపట్టాలని కోరారు. ప్రతి ఒక్కరూ భక్తిశ్రద్ధలతో వినాయక నవరాత్రులను నిర్వహించాలని అన్నారు.హిందూ పండుగలను ఘనంగా నిర్వహించడం ప్రతి ఒక్కరి బాధ్యత అని బండి సంజయ్‌ పేర్కొన్నారు. ధర్మాన్ని కాపాడుతూ సంప్రదాయాలను పరిరక్షించుకోవాలని పిలుపునిచ్చారు. ఐక్యంగా గణేశ్‌ ఉత్సవాలను జరుపుకుంటూ భక్తిపారవశ్యంతో వినాయకుడిని కొలుద్దామని అన్నారు.విఘ్నాలను తొలగించే విఘ్నేశ్వరుడి ఆశీస్సులతో ప్రతి ఇంటా సుఖసంతోషాలు నిండాలని బండి సంజయ్‌ ఆకాంక్షించారు. ప్రజల జీవితాల్లోని కష్టాలు, విఘ్నాలు తొలగిపోయి ప్రతి కుటుంబం ఆనందంగా ఉండాలని కోరుకున్నారు.గణనాథుడి ఆశీస్సులతో తెలంగాణ మరింత సుభిక్షంగా ఉండాలని బండి సంజయ్‌ ఆకాంక్షించారు. ప్రతి గ్రామం ఆధ్యాత్మిక శోభతో కళకళలాడాలని, ప్రజల కష్టాలు తొలగిపోయి ప్రతి ఇంటా సంతోషం వెల్లివిరియాలని, గణనాథుడి ఆశీస్సులతో తెలంగాణలో ధర్మ విజయం సాధించాలని కోరుకున్నారు.ఇదీ చదవండి: ఏడాదైనా చైర్మన్‌ లేరు.. బాబ్జీ సంచలన నిర్ణయం

వైరల్‌: మనిషి జీవితం.. ఈరోజుల్లో నీటి బుడగలా మారిపోయింది.  సీసీ కెమెరాలు, సెల్‌ఫోన్‌ రికార్డింగ్‌ల వల్ల..  ఉన్నట్లుండి కుప్పకూలి మరణిస్తున్న ఘటనలు చాలామట్టుకు వెలుగులోకి వస్తున్నాయి. తాజాగా ఓ యువకుడు నాటక సమయంలోనే స్టేజ్‌పై కుప్పకూలి కన్నుమూశాడు.  గణేష్‌ ఉత్సవాల సందర్భంగా.. యోగేష్‌ గుప్తా అనే ఆర్టిస్ట్‌ పార్వతి దేవి గెటప్‌ వేసి నాటకంలో పాల్గొన్నాడు. నాటకంలో భాగంగా నృత్యం చేసిన యోగేష్‌.. ఉన్నట్లుండి కింద పడిపోయాడు. అదీ నాటకంలో భాగమే అనుకుని పొరపడిన శివుడి పాత్రధారి యువకుడు.. దగ్గరగా వచ్చి లేపబోయాడు. కానీ, యోగేష్‌లో చలనం లేదు.  దీంతో నిర్వాహకులు ఆస్పత్రికి తరలించగా.. అప్పటికే యోగేష్‌ గుండెపోటు మృతి చెందినట్లు నిర్ధారించారు. దేశవ్యాప్తంగా గత కొన్నిరోజలుగా ఇలాంటి ఆకస్మిక మరణాలకు సంబంధించిన ఉదంతాలు వెలుగు చూస్తూనే ఉన్నాయి.  మలయాళం దిగ్గజ గాయకుడు ఎడవ బషీర్‌ సైతం ఇలాగే మే 28వ తేదీన అలపుజ్జాలో ప్రదర్శన ఇస్తూ కుప్పకూలి మృతి చెందారు. అలాగే.. ఈ ఏడాది జూన్‌లో ప్రముఖ సింగర్‌ కృష్ణకుమార్‌ కున్నాత్‌ అలియాస్‌ కేకే.. ప్రదర్శనలో ఇబ్బందిగా ఫీలై.. ఆ తర్వాత గుండెపోటుతో హఠాన్మరణం చెందారు. వీళ్లే కాదు.. చాలా చోట్ల ఇలా మరణించిన ఘటనల తాలుకా వీడియోలు వైరల్‌ కావడం చూశాం. #WATCH | One more youth died with cardiac arrest..! Youth named #YogeshGupta who was performing the role of Maa Parvati during a Jagran in Bishnah Tehsil of #Jammu collapsed while dancing and died. He suffered a cardiac arrest. pic.twitter.com/dMRsy8M7up — Subodh Kumar (@kumarsubodh_) September 8, 2022


 ఎన్నికల సంఘానికి ఉత్సవ మండళ్ల విజ్ఞప్తి
  
 సాక్షి, ముంబై: గణేశ్ ఉత్సవాల తర్వాతే ఎన్నికల ప్రవర్తనా నియమావళిని అమలు చేయాలంటూ రాష్ట్ర ఎన్నికల కమిషన్‌కు విజ్ఞప్తి చేయాలని సార్వజనిక గణేశ్ ఉత్సవ మండళ్లు నిర్ణయించాయి. ఒకవేళ అంతకు ముందే కోడ్ అమల్లోకి వస్తే రాజకీయ పార్టీల నుంచి గణేశ్ ఉత్సవ మండళ్లకు రావల్సిన ఆదాయానికి భారీగా గండిపడుతుందని ఉత్సవ కమిటీలు ఆందోళన వ్యక్తం చేస్తున్నాయి. దీంతో మండళ్లు ఆర్థికంగా నష్టపోకుండా ఉండేందుకు ఉత్సవాల తరువాత ఎన్నికల కోడ్ అమలు చేయాలని విజ్ఞప్తి చేయనున్నాయి. ఈ ఏడాది గణేశ్ ఉత్సవాలు ఆగస్టు 29 నుంచి సెప్టెంబరు 8వ తేదీ వరకు జరుగనున్నాయి.
  
 అదే సమయంలో రాష్ట్రంలో శాసనసభ ఎన్నికలు జరిగే సూచనలు కనిపిస్తున్నాయి. దీంతో గణేశ్ మండళ్లకు ఆర్థికంగా నష్టపోతామేమోననే దిగులు పట్టుకుంది. ఏటా ఉత్సవాలు నిర్వహించే మండళ్లు తమ పరిధిలోకి వచ్చే చాల్స్, భవనాలు, సొసైటీల ఇళ్లు, షాపుల నుంచి చందా రూపంలో డబ్బును పోగు చేస్తాయి. అయితే ఉత్సవాలు ఘనంగా నిర్వహించే మండళ్లకు ఈ నిధులు ఎటూ సరిపోవు. రాజకీయ నాయకులు అందజేసే భారీ విరాళాలతో ఉత్సవాలను ఘనంగా జరుపుతారు. ఉత్సవాలు జరిగే పరిసరాల్లో, మండపం ఆవరణలో ఏర్పాటుచేసే బ్యానర్లు, కటౌట్లు, ప్రవేశ ద్వారాలు, ఇతర ప్రకటనలు ఏర్పాటు చేసినందుకు వచ్చే ఆదాయం కూడా భారీగానే ఉంటుంది. ఒకవేళ ఎన్నికల కోడ్ అమల్లోకి వస్తే వీటిని ఏర్పాటు చేయడానికి వీలుండదు.
  
 అంతేకాక రాజకీయ నాయకులు మండళ్లకు చందా రూపంలో అందజేస్తే డబ్బు పంపిణీ కేసు నమోదవుతుంది. ఇక మండళ్లు ప్రచురించే సావనీర్‌లో కూడా నాయకుల ఫొటోలు ముద్రించినందుకు కూడా కొంత ఆదాయం వస్తుంది. అయితే ఎన్నికల కోడ్ అమలులోకి రావడంవల్ల ఇలా ప్రకటనల ద్వారా వచ్చే ఆదాయాన్ని కోల్పోవడం తోపాటు అనేక రకాలుగా సార్వజనిక గణేశ్ ఉత్సవ మండళ్లు నష్టపోతాయి. ఉత్సవాలు జరుగుతున్న సమయంలోనే కాకుండా నిమజ్జనోత్సవాలపై కూడా దీని ప్రభావం పడుతుంది.
  
 ప్రధాన కూడళ్ల వద్ద ఏర్పాటుచేసే వేదికపై ముఖ్యమంత్రితోసహా ఇతర శాఖల మంత్రులు, మేయర్, వివిధ పార్టీల ప్రతినిధులు నిలబడి గణేశ్ విగ్రహాలపై పూలుచల్లడం, భక్తులకు ధన్యవాదాలు తెలుపడం వంటివి చేస్తారు. కోడ్ అమల్లోకి వస్తే ఇలాంటి వాటికి కూడా నేతలు దూరంగా ఉండాల్సి ఉంటుంది. ఈ ఇబ్బందులను దృష్టిలో పెట్టుకొని రాష్ట్ర ఎన్నికల కమిషన్‌కు లేఖ రాయాలని నిర్ణయించినట్లు బృహన్ ముంబై సార్వజనిక గణేశ్ ఉత్సవ సమన్వయ సమితి అధ్యక్షుడు అడ్వొకేట్ నరేశ్ దహిబావ్కర్ తెలిపారు.