– 8లోuవరంగల్‌ ఎంపీ స్థానంలో.. లోక్‌సభ పరిధిలో ఏడు సెగ్మెంట్లలో నమోదైన పోలింగ్‌ శాతం చూస్తే పట్టణ ప్రాంతాలున్న నియోజకవర్గాల్లో తగ్గింది. గ్రామీణ ప్రాంతాలున్న సెగ్మెంట్లలో ఓటింగ్‌ పెరిగింది. స్టేషన్‌ఘన్‌పూర్‌ (ఎస్సీ) నియోజకవర్గంలో అత్యధికంగా 78.77శాతం పోలవగా, అత్యల్పంగా వరంగల్‌ పశ్చిమలో 52.68శాతం మంది ఓటుహక్కును వినియోగించుకున్నారు. పరకాల సెగ్మెంట్‌లో 76.86 శాతం, వర్ధన్నపేట (ఎస్సీ)లో 72.24శాతం, పాలకుర్తిలో 71.43 శాతం, భూపాలపల్లిలో 67.71శాతం, వరంగల్‌ తూర్పు సెగ్మెంట్‌లో 65.08 శాతం పోలింగ్‌ నమోదైంది. ఈసారి జరిగిన పోలింగ్‌ను పరిశీలిస్తే పట్టణాల్లో ఉండే వారికంటే గ్రామీణ ప్రాంతాల్లో ఉండే ఓటర్లే తమ ఓటుహక్కును ఎక్కువగా వినియోగిం చుకున్నట్లు కనిపిస్తోంది. మొత్తం ఓట్లు 18,24,466 పోలైన ఓట్లు 12,56,301సాక్షిప్రతినిధి, వరంగల్‌: వరంగల్‌ లోక్‌సభ ఎన్నికల పోలింగ్‌పై పోస్టుమార్టం జరుగుతోంది. 2019 ఎన్నికలతో పోలిస్తే ఈసారి భారీగా పోలింగ్‌శాతం పెంచేందుకు విస్తృతంగా చర్యలు చేపట్టిన కేంద్ర ఎన్నికల సంఘం, జిల్లా ఎన్నికల అధికారులు కూడా సమీక్ష చేస్తున్నారు. మరోవైపు పోలింగ్‌శాతం ఎక్కడ పెరిగింది? ఎక్కడ తగ్గింది? ఎవరికి లాభం, ఎవరి నష్టం? అన్న లెక్కల్లో బీజేపీ, కాంగ్రెస్‌, బీఆర్‌ఎస్‌ పార్టీలు నిమగ్నమయ్యాయి. వరంగల్‌ పార్లమెట్‌ పరిధి ఏడు అసెంబ్లీ సెగ్మెంట్లలో సమయం దాటినా క్యూ లైన్లలో ఉన్నవారిని అనుమతించి రాత్రి వరకు పోలింగ్‌ నిర్వహించారు. మొత్తం 18,24,466 ఓటర్లకు 12,56,301 (68.86శాతం) మంది తమ ఓటుహక్కును వినియోగించుకున్నట్లు వరంగల్‌ లోక్‌సభ రిటర్నింగ్‌ అధికారి, జిల్లా కలెక్టర్‌ పి.ప్రావీణ్య పేరిట మంగళవారం ఒక ప్రకటనలో వెల్లడించారు. ఈసారి మహిళలదే ఆధిక్యం.. ఆసక్తి చూపని థర్డ్‌జెండర్స్‌.. 2009 నుంచి 2019 వరకు వరుసగా మూడు పర్యాయాలు జరిగిన లోక్‌సభ ఎన్నికల్లో అత్యధికంగా ఓటుహక్కును వినియోగించుకున్న మహిళలు.. గత అసెంబ్లీ ఎన్నికల్లో కూడా వారే ముందంజలో ఉన్నారు. ఆ అసెంబ్లీ ఎన్నికల్లో అభ్యర్థుల గెలుపును ‘ఆమె’నే శాసించింది. వరంగల్‌ పార్లమెంట్‌ పరిధి ఏడు శాసనసభ నియోజకవర్గాల్లో 6,91,902 మంది పురుషులు, 7,01,862 మంది మహిళలు ఓటేయగా.. పురుషుల కంటే 9,960 మంది మహిళలు ఎక్కువగా ఓటెత్తారు. సోమవారం జరిగిన వరంగల్‌ లోక్‌సభ ఎన్నికల్లో మొత్తం 12,56,301 మంది ఓటేయగా... అందులో 6,26,704 మంది పురుషులు, 6,29,512 మంది మహిళలు ఉన్నారు. పురుషులకన్నా 2,808 మంది మహిళలు అధికంగా ఓటేశారు. ఇదిలా ఉంటే వరంగల్‌ లోక్‌సభ పరిధిలో థర్డ్‌జెండర్ల ఓట్లు 397 ఉండగా 85 మంది ఓటేశారు. దీంతో లోక్‌సభ ఓటింగ్‌పై ఆసక్తి చూపినట్లుగా కనిపించలేదు. పోలింగ్‌శాతంపై పోస్టుమార్టం... గెలుపుపై మూడు పార్టీల ధీమా... వరంగల్‌ లోక్‌సభ ఎన్నికలు ఆద్యంతం ఆసక్తికరంగా సాగాయి. అభ్యర్థుల ఎంపిక మొదలు.. పోలింగ్‌ ముగిసే వరకు అనేక పరిణామాలు చోటుచేసుకోగా.. మూడు ప్రధాన పార్టీలు కూడా గెలుపు ధీమాను వ్యక్తం చేస్తున్నాయి. వరంగల్‌ పార్లమెంట్‌కు పోటీ చేసిన అభ్యర్థులు, మాజీ ఎమ్మెల్యే అరూరి రమేశ్‌ (బీజేపీ), డాక్టర్‌ కడియం కావ్య (కాంగ్రెస్‌), డాక్టర్‌ మారేపల్లి సుధీర్‌కుమార్‌ (బీఆర్‌ఎస్‌) ఎంపీగా మొదటిసారి పోటీ చేశారు. ఆయా పార్టీల అగ్రనేతలు, ప్రజాప్రతినిధులు, ముఖ్యనేతలు, కార్యకర్తలతో కలిసి అభ్యర్థులు విస్తృతంగా ప్రచా రం చేశారు. సోమవారం పోలింగ్‌ ముగియగా.. మంగళవారం వెలువడిన పోలింగ్‌ శాతం, పోలైన ఓట్లపై పోస్టుమార్టం మొదలెట్టారు. లోక్‌సభ పరిధిలోని ఏడు సెగ్మెంట్లలో ఎక్కడ పెరిగింది.. ఎక్కడ తగ్గింది అన్న కోణంలో నియోజకవర్గాల ఇన్‌చార్జ్‌లు, ముఖ్య నేతలతో కలిసి మూడు పార్టీల అభ్యర్థులు, ముఖ్య నేతలు లెక్కల్లో పడ్డారు. అభ్యర్థులు ఎవరికి వారుగా గెలుపు ధీమాను వ్యక్తం చేస్తున్నారు. జూన్‌ 4న ఓట్ల లెక్కింపు, ఫలితాలు వెలువడితేనే ఈ సస్పెన్స్‌కు తెరపడుతుంది. న్యూస్‌రీల్‌అర్బన్‌లో తగ్గిన పోలింగ్‌... రూరల్‌ సెగ్మెంట్లలో ఫరవాలేదు..పోలింగ్‌ శాతం 68.86

(మొత్తం ఓటర్లు) (పోలైన ఓట్లు) అసెంబ్లీ సెగ్మెంట్‌ పురుషులు మహిళలు ఇతరులు మొత్తం పురుషులు మహిళలు ఇతరులు మొత్తం శాతం స్టేషన్‌ఘన్‌పూర్‌ 1,25,210 1,28,898 02 2,54,110 1,00,819 99,337 02 2,00,158 78.77 పాలకుర్తి 1,26,411 1,29,090 13 2,55,514 91,683 90824 08 182515 71.43 పరకాల 108076 114305 02 2,22,383 84,528 86,387 01 1,70,916 76.86 వరంగల్‌ పశ్చిమ 1,39,322 1,44,108 16 2,83,446 74,819 74,498 03 1,49,320 52.68 వరంగల్‌ తూర్పు 1,25,638 1,32,518 339 2,58,495 83,105 85,066 63 1,68,234 65.08 వర్ధన్నపేట 1,34,257 1,39,491 18 2,73,766 98,653 99,108 02 1,97,763 72.24 భూపాలపల్లి 1,36,507 1,40,238 07 2,76,752 93,097 94,292 06 1,87,395 67.71 మొత్తం 8,95,421 9,38,648 397 18,24466 6,26,704 6,29,512 85 12,56,301 68.86

ఖానాపురం: ధాన్యం కొనుగోళ్లలో మిల్లర్లు కొర్రీలు పెడితే బ్లాక్‌లిస్ట్‌లో పెట్టాల్సి వస్తుందని డీసీఓ సంజీవరెడ్డి, డీసీఎస్‌ఓ శివప్రసాద్‌రెడ్డి, సివిల్‌ సప్లయీస్‌ డీఎం సంధ్యారాణి హెచ్చరించారు. బుధరావుపేటలో రోడ్లపై ఆరబెట్టిన ధాన్యాన్ని మంగళవారం వారు పరిశీలించారు. పద్మావతి ప్రొడ్యూసర్‌ కంపెనీ ఆధ్వర్యంలో చేపడుతున్న కొనుగోళ్లను అడిగి తెలుసుకున్నారు. 1010– ఏ గ్రేడ్‌లో కొనుగోలు చేసి మిల్లుకు పంపిన తర్వాత మిల్లర్లు ఇబ్బందులు పెడుతున్నారని రైతులు, సెంటర్‌ నిర్వాహకులు అధితకారుల దృష్టికి తీసుకెళ్లారు. అక్కడే ధాన్యాన్ని పరిశీలించి ఏ–గ్రేడ్‌ వర్తిస్తుందని రైతులకు తెలిపారు. అనంతరం ఖానాపురం శివారులోని శ్రీనివాస రైస్‌మిల్లులో దిగుమతులను తనిఖీ చేసి 1010 రకం ధాన్యాన్ని పరిశీలించారు. ఏ గ్రేడ్‌ వర్తిస్తుందా కామన్‌ కిందకు వస్తుందా అనే విషయాన్ని మిషన్‌ ద్వారా గుర్తించారు. బియ్యం శాతం బాగా రావడంతో ఏ–గ్రేడ్‌ కింద కొనుగోలు చేయాలని మిల్లు యజమానులకు సూచించారు. మరోసారి ఇలాంటి ఘటనలకు పాల్పడితే చర్యలు ఉంటాయని స్పష్టం చేశారు. అనంతరం ఏర్పాటు చేసిన విలేకరుల సమావేశంలో వారు మాట్లాడారు. జిల్లాలో 188 కొనుగోలు కేంద్రాల ద్వారా ఇప్పటి వరకు 30,489 మెట్రిక్‌ టన్నుల ధాన్యం కొనుగోలు చేసినట్లు తెలిపారు. ధాన్యాన్ని విక్రయించిన రైతులకు చెల్లించాల్సిన రూ.67 కోట్లకు ఇప్పటి వరకు 47 కోట్ల రూపాయలు ఖాతాల్లో జమ అయ్యాయని, మరో రూ.10 కోట్లు ఖాతాల్లో జమ చేయడానికి సిద్ధంగా ఉన్నట్లు తెలిపారు. తడిసిన ధాన్యాన్ని సైతం కొనుగోలు చేస్తామని పేర్కొన్నారు. కార్యక్రమంలో అసిస్టెంట్‌ రిజిస్ట్రార్‌ కీరునాయక్‌, సివిల్‌ సప్లయీస్‌ టెక్నికల్‌ మేనేజర్‌ రాజయ్య, డీటీ స్వప్న, పీఏసీఎస్‌ సీఈఓ ఆంజనేయులు, సిబ్బంది రాజు, కొంరయ్య, వినయ్‌, సెంటర్‌ నిర్వహకులు చెడిపాక ఉపేందర్‌, గిరగాని నర్సయ్య, అధికారులు, రైతులు, కేంద్రాల నిర్వాహకులు పాల్గొన్నారు. డీసీఓ సంజీవరెడ్డి, డీసీఎస్‌ఓ శివప్రసాద్‌రెడ్డి, సివిల్‌ సప్లయీస్‌ డీఎం సంధ్యారాణి బుధరావుపేటలో ఆరబెట్టిన ధాన్యం పరిశీలన

నల్లబెల్లి/నర్సంపేట రూరల్‌: జిల్లాలోని పలు గ్రామాల్లో మంగళవారం సాయంత్రం గాలివాన బీభత్సం సృష్టించింది. పలు ఇళ్ల రేకులు కొట్టుకు పోయాయి. విద్యుత్‌ స్తంభాలు విరిగిపడి విద్యుత్‌ సరఫరాకు అంతరాయం ఏర్పడడంతో ప్రజలు తీవ్ర ఇబ్బందులు పడ్డారు. నల్లబెల్లి మండలంలోని మేడపల్లి, రాంపూర్‌, ఆసరవెల్లి, గొల్లపల్లి, గోవిందాపూర్‌, గుండ్లపహాడ్‌, నల్లబెల్లి తదితర గ్రామాల్లో వడగళ్ల వాన కురిసింది. ఆయా గ్రామాల్లో చెట్లు నేలకొరిగాయి. మామిడికాయలు రాలిపోయాయి. వరి పంటలు దెబ్బతిన్నాయి. అదేవిధంగా నర్సంపేట మండలంలోని చంద్రయ్యపల్లి గ్రామంలో భూషబోయిన తిరుపతి ఇంటి రేకులు పూర్తిగా ధ్వంసమయ్యాయి. ఆసమయంలో ఇంట్లో ఉన్న తిరుపతిపై పడడంతో తలకు తీవ్ర గాయాలయ్యాయి. అదే గ్రామ పంచాయతీ శివారులోని బుచ్చినాయక్‌తండాకు చెందిన అజ్మీరా రవి ఇంటి పైకప్పు గాలివానకు కొట్టుకుపోయింది. అకాల వర్షంతో నష్టపోయిన తమను ప్రభుత్వం ఆదుకోవాలని పలు గ్రామాల బాధితులు కోరుతున్నారు.

● ఎన్పీడీసీఎల్‌ సీఎండీ కర్నాటి వరుణ్‌ రెడ్డి హన్మకొండ: ఈదురు గాలులు, భారీ వర్షం టీఎస్‌ ఎన్పీడీసీఎల్‌కు భారీ నష్టాన్ని చేకూర్చింది. ఆదివారం రాత్రి హనుమకొండ, వరంగల్‌ జిల్లాలో ఈదురుగాలులు వీచడంతో పాటు భారీ వర్షం కురిసింది. ఈదురు గాలులకు వృక్షాలు కూలడంతో విద్యుత్‌ స్తంభాలు విరిగిపడ్డాయి. విద్యుత్‌ లైన్లు తెగిపడి సరఫరాలో ఆటంకం ఏర్పడింది. విద్యుత్‌ సరఫరాను పునరుద్ధరించేందుకు టీఎస్‌ ఎన్పీడీసీఎల్‌ చైర్మన్‌, మేనేజింగ్‌ డైరెక్టర్‌ కర్నాటి వరుణ్‌రెడ్డి అర్ధరాత్రి క్షేత్రస్థాయిలో పర్యటించారు. సిబ్బందికి సూచనలిచ్చారు. తెల్లవారితే పార్లమెంట్‌ ఎన్నికలు ఉండడంతో పోలింగ్‌కు అంతరాయం కలగకుండా, విద్యుత్‌ సరఫరాను పునరుద్ధరించేందుకు అధికారులు, సిబ్బంది అర్ధరాత్రి దాటే వరకు శ్రమించారు. ఎన్పీడీసీఎల్‌ సీఎండీ కర్నాటి వరుణ్‌ రెడ్డి ఎప్పటికప్పుడు ఎస్‌ఈ, డీఈలతో మాట్లాడుతూ.. సలహాలు, సూచనలిస్తూ.. క్షేత్రస్థాయిలో పర్యటించారు. రాయపర్తి, వర్ధన్నపేట 33/11 కేవీ సబ్‌ స్టేషన్లు, పెద్ద నాగరాం, ఘన్‌పూర్‌ 132/33 కేవీ సబ్‌స్టేషన్లను పరిశీలించారు. ఇంజనీర్లకు సూచనలిచ్చారు. అర్ధరాత్రి విద్యుత్‌ను పునరుద్ధరించిన ఉద్యోగులను అభినందించారు. విద్యుత్‌ సంబంధిత సమస్యలపై టోల్‌ ఫ్రీ నెంబర్‌ 18004250028, లేదా 1912కు ఫోన్‌ చేయాలని ఆయన కోరారు.