నోట్ల రద్దు అనంతరం తలెత్తిన ఇబ్బందులను చక్కదిద్దేందుకు ప్రధానమంత్రి నరేంద్రమోదీ కోరిన యాభై రోజుల గడువుకు ఇక 15 రోజుల సమయమే మిగిలి ఉంది. నవంబర్‌ 8 నాటి సంచలన ప్రకటనతో, దేశంలోని మొత్తం కరెన్సీ నోట్ల విలువలో ఏకంగా 86.4% వాటా కలిగిన 1000, 500 నోట్లు ఒక్కసారిగా చెల్లుబాటు కాకుండా పోయాయి. అయితే ఈ మొత్తం తిరిగి చలామణిలోకి ఎప్పుడొస్తుందో అన్న ప్రశ్నకు మాత్రం ఇంతవరకు సరైన సమాధానం దొరకడం లేదు. రిజర్వు బ్యాంక్‌ ఆఫ్‌ ఇండియా(ఆర్బీఐ) వార్షిక నివేదిక–2016 ప్రకారం దేశంలోని కరెన్సీ ముద్రణ కేంద్రాల సామర్థ్యం, ప్రస్తుత నోట్ల పంపిణీ రేటును పరిగణనలోకి తీసుకుంటే ప్రధాని కోరిన గడువు నాటికి పరిస్థితులు చక్కబడే అవకాశాలు కనిపించడం లేదని నిపుణులు అభిప్రాయపడుతున్నారు.