‘గ్లోబల్‌ సమ్మిట్‌’ పోలీస్‌ బాస్‌ బదిలీ

‘గ్లోబల్‌ సమ్మిట్‌’ పోలీస్‌ బాస్‌ బదిలీ

సాక్షి, సిటీబ్యూరో: రాచకొండ కమిషనరేట్‌లోని మహేశ్వరం జోన్‌ పరిధిలోకి వచ్చే మీర్‌ఖాన్‌పేటలో వచ్చే నెల 8, 9 తేదీల్లో గ్లోబల్‌ సమ్మిట్‌ జరగనుంది. ఈ నేపథ్యంలో ప్రస్తుతం మహేశ్వరం జోన్‌ డీసీపీగా ఉన్న డి.సునీతా రెడ్డిని బదిలీ చేస్తూ.. ఆమె స్థానంలో వికారాబాద్‌ జిల్లా సూపరింటెండెంట్‌ ఆఫ్‌ పోలీస్‌ కె.నారాయణ రెడ్డికి మహేశ్వరం జోన్‌ డీసీపీగా పోస్టింగ్‌ ఇచ్చారు. కాగా.. నూతన డీజీపీగా శివధర్‌ రెడ్డి బాధ్యతలు చేపట్టిన తర్వాత గ్రేటర్‌లో తొలిసారిగా ఐపీఎస్‌ల బదిలీలు జరిగాయి. శుక్రవారం రాష్ట్రంలో ఒకేసారి 32 మంది ఐపీఎస్‌లకు స్థానచలనం కాగా.. ఇందులో పలువురు గ్రేటర్‌ హైదరాబాద్‌ నుంచి కూడా ఉన్నారు. సైబరాబాద్‌ కమిషనరేట్‌లో ఒక్క అధికారికీ బదిలీ కాకపోవడం గమనార్హం.

రాచకొండలో..

మల్కాజిగిరి జోన్‌ డీసీపీ పీవీ పద్మజ (2013)ను తెలంగాణ యాంటీ నార్కోటిక్స్‌ బ్యూరో (అడ్మిన్‌) ఎస్పీగా బదిలీ చేశారు. ఆమె స్థానంలో ఇంటెలిజెన్స్‌ ఎస్పీగా ఉన్న సీహెచ్‌ శ్రీధర్‌ (2020)కు పోస్టింగ్‌ ఇచ్చారు. భువనగిరి ఎస్‌డీపీఓ కంకనాల రాహుల్‌ రెడ్డి (2021)ని భువనగిరి గ్రేడ్‌–1 అదనపు ఎస్పీ/ఏఎస్పీగా బదిలీ చేశారు. రాచకొండ క్రైమ్స్‌ డీసీపీ అరవింద్‌ బాబును బదిలీ చేసి, ఆయన స్థానంలో వెయిటింగ్‌లో ఉన్న కె.గుణశేఖర్‌కు పోస్టింగ్‌ ఇచ్చారు.

హైదరాబాద్‌లో..

హైదరాబాద్‌ సౌత్‌ జోన్‌ డీసీపీ స్నేహ మెహ్రా (2018)ను బదిలీ చేసి, ఆమె స్థానంలో జయశంకర్‌ భూపాల్‌పల్లి ఎస్పీ ఖారే కిరణ్‌ ప్రభాకర్‌ (2017)కు అప్పగించారు. హైదరాబాద్‌ టీజీ యాంటీ నార్కోటిక్‌ బ్యూరో ఎస్పీగా ఉన్న చెన్నూరి రూపేష్‌ (2017)ను హైదరాబాద్‌ సిటీ ఎస్‌ఎంఅండ్‌ఐటీ డీసీపీగా బదిలీ చేశారు. హైదరాబాద్‌ సిటీ టాస్క్‌ఫోర్స్‌ డీసీపీ వైవీఎస్‌ సుధీంద్ర స్థానంలో గైఖ్వాడ్‌ వైభవ్‌ రఘునాథ్‌ (2018)కు పోస్టింగ్‌ ఇచ్చారు.

సమ్మిట్‌ బందోబస్త్‌ రోడ్‌ మ్యాప్‌ పరిశీలన

వచ్చే నెలలో జరగనున్న తెలంగాణ రైజింగ్‌ గ్లోబల్‌ సమ్మిట్‌కు భారీ బందోబస్త్‌ ఏర్పాటు చేస్తున్నామని రాచకొండ కమిషనర్‌ జి.సుధీర్‌ బాబు అన్నారు. శుక్రవారం లా అండ్‌ ఆర్డర్‌, ట్రాఫిక్‌ బందోబస్త్‌ రోడ్‌ మ్యాప్‌ను ఆయన పరిశీలించారు. వాహనాల పార్కింగ్‌ స్థలం, హెలిపాడ్‌ ప్రదేశం, సభాస్థలి తదితరాల రోడ్‌ మ్యాప్‌ను పరిశీలించి అధికారులకు సలహాలు, సూచనలు చేశారు. ఆయన వెంట మహేశ్వరం డీసీపీ సునీతా రెడ్డి తదితరులున్నారు.

మహేశ్వరం జోన్‌ డీసీపీ సునీత బదిలీ

ఆమె స్థానంలోనారాయణ రెడ్డికి పోస్టింగ్‌

గ్రేటర్‌లో పలువురు ఐపీఎస్‌లకు స్థానచలనం