TV
ఎస్ఎస్ రాజమౌళిపై ఫిర్యాదు
అబ్దుల్లాపూర్మెట్: హనుమంతుడిపై అనుచిత వ్యా ఖ్యలు చేసిన సినీ దర్శకుడు ఎస్ఎస్ రాజమౌళిపై కేసు నమోదు చేసి తగిన చర్యలు తీసుకోవాలని అబ్దుల్లాపూర్మెట్ పోలీస్స్టేషన్లో యుగ తులసీ పార్టీ అధ్యక్షుడు, టీటీడీ పాలక మండలి మాజీ సభ్యుడు కె.శివకుమార్ గురువారం ఫిర్యాదు చేశారు. ఈ సందర్భంగా న్యాయవాది వినోద్, శ్రీ రామ్ జోషి, సందీప్, శ్రీకాంత్, నాగిరెడ్డి, లక్ష్మణ్, చంటిలతో కలిసి ఫిర్యాదు పత్రాన్ని సీఐ అశోక్రెడ్డి అందజేశారు.
సెల్ఫీ వీడియో తీసుకుని యువకుడు ఆత్మహత్య
హస్తినాపురం: పురుగుల మందుతాగి ఓ యువకుడు ఆత్మహత్య చేసుకున్న సంఘటన వనస్థలిపురం పోలీస్స్టేషన్ పరిధిలో చోటు చేసుకుంది. పోలీసుల కథనం ప్రకారం. సాహెబ్నగర్కు చెందిన పారంద శ్రీకాంత్ (32) గతంలో హయత్నగర్కు చెందిన నలుగురితో రూ.2 లక్షలు తీసుకున్నాడు. తీసుకున్న డబ్బులు తిరిగి ఇవ్వాలని పలుమార్లు శ్రీకాంత్పై ఒత్తిడి తేవడంతో పాటు నువ్వు పెళ్లి ఎలా చేసుకుంటావో చూస్తామని బెదిరించారు. డబ్బులు ఇవ్వకపోతే మీ ఇంటికి తాళాలు వేసి రోడ్డుమీదకు లాగుతామని ఫోన్లో బెదిరించారు. దీంతో తీవ్ర ఒత్తిడికి గురైన శ్రీకాంత్ సెల్ఫోన్లో సెల్ఫీ వీడియోలో ‘తల్లిదండ్రులు నన్ను క్షమించండి... నాకు చావు తప్ప వేరే మార్గం లేదు. నా చావుకు కారణమైన వారిని ఎట్టి పరిస్థితుల్లో వదలొద్దు.. ఇంటికొచ్చి పరువు తీస్తారనే భయంతోనే పురుగుల మందు సేవించి ఆత్మహత్య చేసుకుంటున్నానని’ వీడియోను స్థానిక సాహెబ్నగర్ వాట్సాప్ గ్రూపులో పోస్టు చేశాడు. గురువారం శ్రీకాంత్ హరిహరపురం కాలనీలోని కప్పలచెరువు కట్టమీద మందులో విషం కలుపుకుని తాగి అక్కడే మృతి చెంది కనిపించాడు. పోలీసులు మృతదేహాన్ని పోస్టుమార్టం నిమిత్తం ఉస్మానియాకు తరలించారు.
