అమెరికా నేపథ్యంలో ప్రియాంక, దీపికా పర్‌మర్, కిమ్‌బెర్లి ఇగ్లా, నాగినీడు, ఝాన్సీ ముఖ్య తారలుగా రూపొందిన చిత్రం ‘వెల్‌కమ్ టు అమెరికా’. స్వీయదర్శకత్వంలో యు.ఎస్. రాజు రూపొందించిన ఈ చిత్రానికి చిత్ర కథానాయకుడు పృథ్వీ చంద్ర పాటలు స్వరపరిచారు. హైదరాబాద్‌లో జరిగిన ఈ చిత్రం ఆడియో ఆవిష్కరణ వేడుకలో సంగీతదర్శకుడు కేఎం. రాధాకృష్ణన్ సీడీని ఆవిష్కరించి నిర్మాత రమేష్ పుప్పాలకు అందించగా, సంస్థ లోగోను ‘దిల్’ రాజు ఆవిష్కరించారు. దర్శక, నిర్మాత మాట్లాడుతూ- ‘‘పృథ్వీచంద్ర మంచి పాటలిచ్చారు. నటుడిగా కూడా తనకు గుర్తింపు తెచ్చే చిత్రమిది. అమెరికాలో 64 లొకేషన్స్‌లో ఈ చిత్రం చేశాం’’ అన్నారు.
  


  ‘‘అమెరికాలో చేసిన అచ్చ తెలుగు చిత్రం ఇది. ఇందులో మంచి పాత్ర చేశాను’’ అని కోట శ్రీనివాసరావు చెప్పారు. గాయకుడు పృథ్వీ చంద్రను హీరోగా పరిచయం చేస్తూ, స్వీయదర్శకత్వంలో యు.ఎస్. రాజు నిర్మించిన చిత్రం ‘వెల్‌కమ్ టు అమెరికా’. ప్రియాంక, దీపికా పర్‌మర్, రింబెర్లి ముఖ్య తారలు. ఈ చిత్రం లోగో, ప్రచార చిత్రాన్ని కోట ఆవిష్కరించారు. యు.ఎస్. రాజు మాట్లాడుతూ -‘‘వినోద ప్రధానంగా సాగే ఈ చిత్రాన్ని అమెరికాలోని 64 అందమైన లొకేషన్స్‌లో తీశాం. అమెరికా వెళ్లాలనే కల చాలామందికి ఉంటుంది. కానీ, కొందరే సాకారం చేసుకోగలుగుతారు. ఈ చిత్రం అమెరికా వెళ్లిన ఫీల్ కలుగజేస్తుంది. ప్రస్తుతం నిర్మాణానంతర కార్యక్రమాలు జరుగుతున్నాయి’’ అన్నారు.