వివాహితపై లైంగిక దాడికి యత్నం

హైదరాబాద్: వివాహితపై ఓ ఆటో డ్రైవర్ ముగ్గురు స్నేహితులతో కలిసి లైంగిక దాడి యత్నించాడు. బాధితురాలు  వారి నుంచి తప్పించుకుని మియాపూర్ పోలీస్ స్టేషన్‌లో ఫిర్యాదు చేయగా కేసు నమోదు చేసి దర్యాప్తు చేస్తున్నారు.  మియాపూర్ ఇన్‌స్పెక్టర్ పురుషోత్తమ్ యాదవ్ కథనం ప్రకారం.. శ్రీకాకుళం జిల్లా పలాసకు చెందిన వివాహిత (26) తన అక్కాబావతో కలిసి వినాయకుడి నిమజ్జనం తిలకించడం కోసం గచ్చిబౌలి అంజయ్యనగర్‌లో ఉంటున్న మరో సోదరి వద్దకు వచ్చింది.

ఈ నేపథ్యంలో వారు బుధవారం సాయంత్రం మాదాపూర్‌లోని శిల్పారామాన్ని సందర్శించారు. రాత్రి 9.30కి ఆటో ఎక్కగా కొండాపూర్ వద్ద ఆటో డ్రైవర్ తన ముగ్గురు స్నేహితుల్ని కూడా ఆటోలో ఎక్కించుకొన్నాడు.

హఫీజ్‌పేట్‌లోని నిర్మానుష్య ప్రాంతమైన సర్వేనెంబర్ 77లోకి ఆటోను తీసుకెళ్లాడు. వెంట ఉన్న అక్కాబావలను చితకబాది వివాహితపై నలుగురూ లైంగికదాడి యత్నించారు.  వీరి బారి నుంచి తప్పించుకున్న బాధితురాలు అంజయ్యనగర్‌లోని సోదరి ఇంటికి చేరుకుంది.  బాధితురాలి ఫిర్యాదు మేరకు పోలీసులు కేసు నమోదు చేసి నిందితుల కోసం గాలిస్తున్నారు.