ఆదివారం వస్తోందంటే చాలు అమితాబ్‌ బచ్చన్‌ అభిమానులకు జల్సానే జల్సా. ఎందుకంటే ఆయన ముంబైలో ఉంటే కచ్చితంగా తన అభిమానులను కలుస్తారు. ‘జల్సాకి రండి.. జాలీగా కబుర్లు చెప్పుకుందాం’ అని అభిమానులను ఆహ్వానిస్తారు. ఈసారి ‘నో జల్సా’ అంటూ ఫ్యాన్స్‌ని నిరుత్సాహపరిచారు. అయితే వారి క్షేమం కోసమే. కరోనా వ్యాప్తి కారణంగా స్కూళ్లు, సినిమా హాళ్లు, షాపింగ్‌ మాల్స్‌ బంద్‌ అయ్యాయి. ఎక్కువగా జనాలు గుమిగూడటం మంచిది కాదనే పరిస్థితి. అందుకే ఫ్యాన్స్‌తో మీటింగ్‌ని అమితాబ్‌ క్యాన్సిల్‌ చేశారు. ‘‘నా అభిమానులకు, శ్రేయోభిలాషులందరికీ ఓ విన్నపం. దయచేసి జల్సా (అమితాబ్‌ ఇంటి పేరు జల్సా) గేట్‌ దగ్గరకు రావొద్దు. ఆదివారం మీటింగ్‌కి నేను రాను. అందరూ జాగ్రత్తలు తీసుకోండి. సేఫ్‌గా ఉండండి’’ అని అమితాబ్‌ సోషల్‌ మీడియా ద్వారా పేర్కొన్నారు.


 సొంత బ్లాగ్‌లో తన మనోభావాలను పంచుకోవడంలో ఎప్పుడూ ముందుండే నటుడు అమితాబ్ బచ్చన్ కొత్త ఏడాదిలో కూడా ఆ ధోరణిని కొనసాగించారు. ముంబయ్‌లోని ‘జల్సా’ నివాసంలో పిల్లల హడావిడి, హంగామా ఏమీ లేకుండా నిశ్శబ్దంగా కొత్త ఏడాదికి స్వాగతం పలికారు-72 ఏళ్ళ బిగ్ బి. కాలగతిలో వచ్చిన మార్పుల్ని ప్రస్తావిస్తూ, ‘‘గతంలో ఉత్తరాల ద్వారా నూతన సంవత్సర శుభాకాంక్షలు చెప్పుకునేవాళ్ళం.
 
 జనవరి 1 కల్లా మిత్రులకు చేరడం కోసం చాలా ముందుగా ఉత్తరాలు రాయాల్సి వచ్చేది. టెలిఫోన్ వచ్చాక స్వయంగా మాటలతో శుభాభినందనలు చెప్పుకుంటూ వచ్చాం. ఆ తరువాత మొబైల్ ఫోన్లు వచ్చాక రోడ్డు మీద ఉన్నవాళ్ళతోనూ మాట్లాడగలిగాం. తాజాగా, ‘ఫేస్‌టైమ్’, ‘స్కైప్’ లాంటి వాటి పుణ్యమా అని ఒకరినొకరం చూసుకుంటూ శుభాకాంక్షలు తెలుపుకుంటున్నాం.
 
 మరి, రాబోయే రోజుల్లో ఇంకేం వస్తుందో?’’ అని ఆయన ఆలోచనాత్మకంగా ప్రస్తావించారు. నటుడిగా మొదలై హీరోగా ఎదిగి, ఏ.బి.సి.ఎల్. అధినేతగా మారి, ఇప్పుడు క్యారెక్టర్ నటుడిగా, టీవీ హోస్ట్‌గా అవతరించి, కాలంతో పాటు మారుతూ వచ్చి, ఆధునిక బ్లాగ్ రాతల బాట పట్టిన అమితాబ్ ఆ వచ్చే కొత్త కమ్యూనికేషన్ విధానాన్ని కూడా ఒడిసిపట్టుకుంటారని వేరే చెప్పాలా!