breaking news
Diviseema Cyclone
-
ఆ కాళరాత్రికి 49 ఏళ్లు
ఎన్టీఆర్ జిల్లా: సముద్రంలో ఎగసిపడిన రాకాసి అలలు ఉప్పెనగా మారి దివిసీమ ప్రాంతాన్ని కకావికలం చేసిన రోజు.. రాకాసి అలల ధాటికి వేల మంది జలసమాధి అయిన రోజు.. ఊళ్లకు ఊళ్లు సముద్రుడి ఉగ్రరూపానికి కొట్టుకుపోయిన రోజు.. ప్రకృతి బీభత్సానికి చిగురుటాకులా వణికిన దివిసీమ ప్రజానీకాన్ని ఎప్పుడూ వెంటాడే విషాద ఘటన అది.. అదే 1977 నవంబర్ 19వ తేదీ రాత్రి దివిసీమను ముంచెత్తిన ఉప్పెన. మరువలేని మహాప్రళయం సంభవించి 49 ఏళ్లు గడిచినా నాటి దృశ్యాలను తలుచుకుంటే దివిసీమ ప్రజలు నేటికీ హడలిపోతున్నారు. కొట్టుకుపోయిన గ్రామాలు ఉప్పెన ప్రభావానికి సొర్లగొంది, పాలకాయతిప్ప గ్రామాలు కొట్టుకుపోయాయి. పాలకాయతిప్ప, హంసల దీవి, ఇరాలి, ఊటగుండం, రామకృష్ణాపురం, బసవానిపాలెం, ఉల్లిపాలెం, నాగాయలంక మండలంలోని సొర్లగొంది, ఏటిమొగ, ఎదురుమొండి, సంగమేశ్వరం, నాచుగుంట, ఏలిచెట్లదిబ్బ తదితర మత్స్యకార గ్రామాల్లో ఉప్పెనకు వేల మంది ప్రాణాలు కోల్పోయారు. నాగాయలంక మండలంలోని సొర్ల గొందిలో అత్యధికంగా 714 మంది, పాలకాయతిప్పలో 460 మంది, మూలపాలెంలో 300 మంది మృతిచెందారు. దివిసీమ ప్రాంతంలోనే సుమారు రూ.172 కోట్లు మేర ఆస్తినష్టం వాటిల్లింది. మోపిదేవి, చల్లపల్లి, అవనిగడ్డ, మచిలీపట్నం మండలాల్లో ఈ ప్రభావం ఎక్కువగా కనిపించింది. కృష్ణాతో పాటు గుంటూరు జిల్లాలో ఉప్పెన దాటికి చాలా మేర ఆస్తినష్టం సంభవించింది. రేపల్లె, నిజాంపట్నం ప్రాంతా ల్లోని పలు గ్రామాలు ఈ ప్రళయం దాటికి దెబ్బతిన్నాయి. ఒక్క కుటుంబంలో నలుగురు నుంచి ఐదుగురు వరకు మృత్యవాత పడ్డారు. మృతదేహాలకు సామూహికంగా దహన సంస్కారాలు నిర్వహించారు. ఎందరో ప్రజాప్రతినిధులు, రాష్ట్ర, జాతీయ స్థాయి నేతలు దివిసీమలో పర్యటించి ఘోర విపత్తను చూసి చలించారు. అండగా నిలిచిన స్వచ్ఛంద సంస్థలు స్వచ్ఛంద సంస్థలతో పాటు దేశ, విదేశీ సంస్థలు విపత్తు అనంతరం దివిసీమను పుననిర్మించేందుకు తోడ్పాటును అందించాయి. నాడు రాష్ట్ర మంత్రిగా ఉన్న మండలి వెంకటకృష్ణారావు తన మంత్రి పదవికి రాజీనామా చేసి సహాయ కార్యక్రమాల్లో పాల్గొన్నారు. ఉప్పెన కారణంగా మృతిచెందినవారి గుర్తుగా అవనిగడ్డ మండలం పులిగడ్డ గ్రామంతో స్మారక స్థూపం నిర్మించారు. అత్యధికంగా దెబ్బతిన్న సొర్లగొంది గ్రామాన్ని జిల్లా పోలీస్శాఖ దత్తత తీసుకొని 1979లో పుననిర్మించింది. రామకృష్ణామిషన్ సభ్యులు కోడూరులోని గొల్లపాలెం పంచాయతీని పూర్తిస్థాయిలో అభివృద్ధి చేసి ఆ గ్రామానికి రామకృష్ణాపురం అని నామకరణం చేశారు. పాలకాయతిప్ప గ్రామంలో ఆర్ఎస్ఎస్ అభివృద్ధి పనులు చేపట్టింది. ప్రభుత్వం దృష్టి పెట్టాల్సిన అంశాలు తుపాన్ల నుంచి తీరప్రాంతాల రక్షణకు దోహదపడే మడ అడవుల పెంపకంపై దృష్టి పెట్టాలి. తీరం వెంట మడ మొక్కలు నాటినా వాటిని సంరక్షించేందుకు అధికారులు సరైన చర్యలు తీసుకోవడంలో పూర్తిగా విఫలమయ్యారు. కొంతమంది యథేచ్ఛగా మడ కర్రను నరికి, అక్రమ రవాణాకు పాల్పడుతున్నారు. వీటిని నివారించి పూర్తిస్థాయిలో మడ పెంపకంపై దృష్టి పెట్టితే ఎంతో ఉపయోగకరంగా ఉంటుంది. సముద్రం పోటు నీరు గ్రామాలోకి రాకుండా గతంలో నిర్మించిన అవుట్పాల్ స్లూయిస్లపై పర్యవేక్షణ కొరవడింది. దీంతో స్లూయిస్ల గేట్లు మొత్తం తుప్పు పట్టి ఊడిపోయేందుకు సిద్ధంగా ఉన్నాయి. పాలకాయతిప్ప, సంగమేశ్వరం ప్రాంతాల్లో స్లూయిస్ శి«థిలావస్థకు చేరి కూలేందుకు సిద్ధంగా ఉన్నాయి. వీటిని పుననిర్మిస్తే తుపాను బారి నుంచి తీరప్రాంతాల ప్రజలను రక్షించవచ్చు. కృష్ణా కరకట్ట అనేక చోట్ల ధ్వంసమైంది. ఉల్లిపాలెం హంసలదీవి ప్రాంతంలో కరకట్ట మూడొంతులు పైగా నదిలో కలిసిపోయింది. నిర్మాణ సమయంలో తగిన నాణ్యతా ప్రమాణాలు గురించి పట్టించుకోకపోవ డంతో నాగాయలంక నుంచి ఉల్లిపాలెం వరకు కట్ట భారీస్థాయిలో కోతకు గురైంది. ఇటీవల వచ్చిన కృష్ణా నదికి భారీగా వరదలు రావడంతో ఈ కరకట్ట మరింత బలహీనమైయింది. కట్ట ఎత్తు సైతం పెంచేందుకు చర్యలు తీసుకోవాలి. తీరప్రాంత గ్రామాల్లో ఉప్పెన అనంతరం నిర్మించిన తుపాను రక్షిత భవనాలు చాలా చోట్ల శిథిలావస్థకు చేరాయి. వీటిని పుననిర్మిస్తే విపత్తు సమయంలో ఎంతగానో ఉపయోగపడతాయి.ఇదీ చదవండి: టీడీపీని వదిలి.. వైఎస్సార్ సీపీలో చేరి -
ఆ రాత్రి ... కాళరాత్రి
దివిసీమ ఉప్పెనకు 38 ఏళ్లు కడలి కల్లోలానికి కకావికలమైన తీరప్రాంత గ్రామాలు శవాల దిబ్బలుగా మారిన ఊళ్లు నేటికీ మరువలేని చేదు జ్ఞాపకాలు 1977.. నవంబర్ 19. తుఫాను వర్షం కురుస్తుంది. ఎప్పటిలాగే తీరం దాటుతుందని దివిసీమ ప్రజలు నిశ్చింతగా నిద్రలోకి జారుకున్నారు. ఆ రాత్రిని కాళరాత్రిగా మారుస్తూ ఒక్కసారిగా ప్రళయం ముంచెత్తింది..మీటర్ల కొద్దీ (సుమారు మూడు తాడిచెట్లు అంత ఎత్తున) ఎగిసిపడుతున్న రాకాసి అలలు చెలియల కట్టలు దాటి ఊళ్ల మీద విరుచుకుపడ్డాయి. నిద్రలోని వారిని శాశ్వత నిద్రలోకి తీసుకెళ్లాయి. పశు, పక్ష్యాదులు అల్లకల్లోలమయ్యాయి..గ్రామాలకు గ్రామాలు అనవాళ్లు లేకుండా తుడిచిపెట్టుకుపోయాయి.. లక్షల ఎకరాల్లో పంట నామరూపాల్లేకుండా పోయింది..శవాల గుట్టల మధ్య జీవశ్చవాలుగా మిగిలిన వారి ఆర్తనాదాలు ఆ ప్రణయ ఘోషలో కలిసిపోయాయి. అవనిగడ్డ(కృష్ణా జిల్లా): దివిసీమ ఉప్పెననకు సరిగ్గా 38 ఏళ్లు. తలచుకుంటేనే ఒళ్లు గగుర్పొడిచే ఆనాటి ప్రళయం మిగిల్చిన చేదు జ్ఞాపకాలు ఇంకా కళ్ల ముందు కదిలాడుతూనే ఉన్నారుు.. ఉప్పెన ప్రభావంతో ఉప్పొంగిన సముద్రం అలలు 83 గ్రామాలను జల సమాధి చేశాయి. కోడూరు మండలంలోని పాలకాయతిప్ప, హంసలదీవి, ఇరాలి, ఊటగుండం, గొల్లపాలెం, బసవవానిపాలెం, ఉల్లిపాలెం..నాగాయలంక మండలంలోని ఏటిమోగ, సొర్లగొంది, ఎదురుమొండి, సంగమేశ్వరం, నాచుగుంట, ఏలిచట్ల దిబ్బ తదితర మత్స్యకార గ్రామాల్లో వేలాది మంది ప్రాణాలు కోల్పోయారు. సుమారు 33 లక్షల ఎకరాల్లో పంట నష్టం వాటిల్లింది. ఉప్పెన ప్రభావానికి దివిసీమలో సుమారు 10 వేల మంది చనిపోయినట్లు అప్పట్లో అధికారులు అంచనా వేశారు. ఒక్క నాగాయలంక మండలంలోని సొర్లగొంది గ్రామంలో 714, కోడూరు మండలం పాలకాయతిప్పలో 460, మూలపాలెంలో 300 మంది చనిపోయినట్లు అధికారుల అంచనాలో తేలింది. ఒక్క దివిసీమలోనే సుమారు రూ.172 కోట్ల మేర ఆస్తి నష్టం వాటిల్లింది. మోపిదేవి, చల్లపల్లి, మచిలీపట్నం మండలాల్లో ఈ ప్రభావం ఎక్కువగా కనిపించింది. కృష్ణాతోపాటు గుంటూరు జిల్లాలోనూ ఈ ఉప్పెన ప్రభావం కనిపించింది. రేపల్లె, నిజాంపట్నం తదితర గ్రామాలు ప్రళయం దాటికి దెబ్బతిన్నాయి. ఉప్పెనలో చిక్కుకున్న వారిని స్వచ్ఛంద సంస్థల ఆధ్వర్యంలో సురక్షిత ప్రాంతాలకు తరలించారు. మృతదేహాలను గుట్టలుగా వేసి దహన సంస్కారాలు చేశారు. ఒక్కో కుటుంబంలో నలుగురు నుంచి ఐదుగురు వరకు మృత్యువాత పడ్డారు. ఉప్పెన కారణంగా మృతి చెందిన వారికి గుర్తుగా అవనిగడ్డ మండలం పులిగడ్డ గ్రామంలో స్మారక స్థూపం నిర్మించారు. నవంబర్ వచ్చిందంటే దివిసీమ ప్రజల గుండెల్లో రైళ్లు పరిగెడతాయి. ఈ నెలలో బంగాళాఖాతంలో అల్పపీడనం, తుపాన్ సంభవిస్తే ప్రజలు బిక్కుబిక్కుమంటూ గడుపుతారు. ఇలాంటి ప్రళయాలు మళ్లీ రావద్దంటూ సముద్రుడికి తీర ప్రాంతవాసులు నేటికీ పూజలు నిర్వహిస్తారు. 400 మందిని కాపాడిన హంసలదీవి ఆలయం.. హంసలదీవిలోని శ్రీ రుక్మిణీ సత్యభామ సమేత వేణుగోపాలస్వామివారి దేవాలయం నాటి ప్రళయం నుంచి 400 మంది గ్రామస్తులకు రక్షించింది. ఆనాటి మధ్యాహ్నానికి ఆకాశంలో వచ్చిన మార్పులకు గ్రామంలోని పూరిళ్లు వదిలి గ్రామస్తులంతా ఆలయంలో ఆశ్రయం పొందేందుకు వచ్చారు.సముద్రం ఉప్పొంగిన అలలతో ఊళ్లు, మనుషులు కొట్టుకుపోయినా ఈ దేవాలయంలోకి చుక్క సముద్రం నీరు చేరలేదు. దీంతో వీరంతా ప్రాణాలు దక్కించుకున్నారు. నమ్మలేని నిజాలు మృతులు - 10 వేలపైనే మృతి చెందిన పశువులు -2.5 లక్షలు మృతి చెందిన కోళ్లు - 4 లక్షలు కూలిన ఇళ్లు -8,504 ఆస్తి నష్టం - రూ. 172 కోట్లు


