రోలుగుంట: స్థానిక కొండపై గల శ్రీ వేంకటేశ్వర ఆలయంలో ఆదివారం లక్ష తులసీ పూజ ఘనంగా నిర్వహించారు. ఆలయ అర్చకుడు రేజేటి శ్రీనివాసాచార్యులు ముందుగా స్వామివారికి పంచామృతాభిషేకం చేశారు. అనంతరం నిర్వహించిన లక్ష తులసీ పూజలో భక్తులు పెద్ద ఎత్తున పాల్గొన్నారు. ఈ సందర్భంగా అధిక సంఖ్య లో భక్తులు స్వామివారిని దర్శించుకున్నారు. భక్తులకు గ్రామానికి చెందిన మద్దాల కాశీవిశ్వనాథం దంపతులు అన్నవరం దేవస్థానం ప్రసాదాన్ని అందజేశారు. కె.నాయుడుపాలెం, మరివలస, కొవ్వూరు తదితర గ్రామాల నుంచి అధిక సంఖ్యలో వచ్చిన భక్తులకు అవసరమైన ఏర్పాట్లను ఆలయ నిర్వాహక కమిటీ సభ్యులు సమకూర్చారు.

పాడేరు : విద్యుత్‌ స్తంభం వైర్లు సరిచేస్తున్న సమయంలో విరిగి పడటంతో లైన్‌మన్‌కు తీవ్ర గాయాలయ్యాయి. మండలంలోని ఇరడాపల్లి పంచాయతీ ఎస్‌.బొడ్డాపుట్టు గ్రామంలో ఆదివారం లైన్‌మన్‌ మసాడ హరికృష్ణ విద్యుత్‌ స్తంభం ఎక్కి పనులు చేస్తుండగా ఉన్నట్టుండి స్తంభం విరిగిపడిపోయింది. దీంతో అతను కిందపడిపోవడంతో కాలు, తలభాగాల్లో తీవ్ర గాయాలయ్యాయి. వెంటనే స్పందించిన పరిసర ప్రాంతీయులు అతడిని పాడేరు జిల్లా ఆస్పత్రికి తరలించడంతో వైద్యసేవలు అందిస్తున్నారు. ఇలావుండగా విద్యుత్‌శాఖ అధికారులు స్పందించి ఇరడాపల్లి పంచాయతీలోని గ్రామాల్లో ప్రమాదకరంగా ఉన్న విద్యుత్‌ స్తంభాలను తొలగించి వాటి స్థానంలో కొత్తవి ఏర్పాటుచేయాలని సర్పంచ్‌ గుల్లేల అశ్వజ కోరారు. వైర్లు సరిచేస్తుండగా విరిగిన స్తంభం పైనుంచి కింద పడిపోవడంతో ప్రమాదం వెంటనే పాడేరు జిల్లా ఆస్పత్రికి తరలింపు

అనంతగిరిలో రోడ్డుపైకి వరదనీరుసాక్షి,పాడేరు: ఏజెన్సీలో వర్షాలు విస్తారంగా కురుస్తున్నాయి. ఆదివారం మధ్యాహ్నం నుంచి పాడేరులో వర్షం కురుస్తూనే ఉంది. ఖరీఫ్‌కు ఎంతో అనుకూలమని రైతులు తెలిపారు. లోతట్టు భూముల్లో వరద నీరు చేరుతోంది. ప్రధాన మత్స్యగెడ్డలో నీటి ప్రవాహం పెరిగింది.అనంతగిరి: మండల కేంద్రంలో నాలుగు రోజులుగా భారీ వర్షాలు కురుస్తున్నాయి. ఆదివారం మధ్యాహ్నం ఏకదాటిగా కురిసిన వర్షానికి రోడ్లపైకి వరదనీరు వచ్చేసింది. ఉదయం ఎండతీవ్రత.. మధ్యాహ్నం నుంచి భారీ వర్షం కురుస్తుండటంతో మండల ప్రజలకు వేసవి తాపంనుంచి ఉపశమనం పొందుతున్నారు. గూడెంకొత్తవీధి: మండల కేంద్రం గూడెంకొత్తవీధిలో ఆదివారం భారీ వర్షం కురిసింది. మధ్యాహ్నం వరకూ ఎండ కాసింది. ఆ తరువాత ఉరుములు, మెరుపులతో సుమారు మూడున్నర గంటలపాటు కురవడంతో లోతట్టు ప్రాంతాలన్నీ జలమయం అయ్యాయి. కొద్దిసేపు విద్యుత్‌ సరఫరాకు అంతరాయం ఏర్పడింది.

పద్మనాభం: స్థానిక కుంతీ మాధవ స్వామి ఆలయంలో చందనోత్సవం ఆదివారం అత్యంత వైభవంగా నిర్వహించారు. ఆదివారం తెల్లవారుజామున 2 గంటల నుంచి 4 వరకు కుంతీ మాధవ స్వామికి అర్చక స్వాములు చందనంతో అలంకరించారు. ముందుగా విశ్వక్షేన పూజ, పూణ్యాహవచనం జరిపారు. అనంతరం ఉదయం ఆరు గంటల నుంచి చందనం అలకంరణలో ఉన్న కుంతీ మాధవ స్వామిని దర్శించుకోవడానికి భక్తులకు ప్రవేశం కల్పించారు. వైఎస్సార్‌ సీపీ భీమునిపట్నం నియోజకవర్గ ఇన్‌ఛార్జి ముత్తంశెట్టి మహేష్‌, జెడ్పీ వైస్‌ చైర్మన్‌ సుంకర గిరిబాబు, ఎంపీపీ కంటుబోతు రాంబాబు, వైఎస్సార్‌ సీపీ నాయకుడు తాలాడ పద్మనాభం స్వామిని దర్శించుకుని ప్రత్యేక పూజలు చేశారు. పరిసర గ్రామాలైన మద్ది, కృష్ణాపురం, రెడ్డిపల్లి, విలాస్కాన్‌పాలెం, కురపల్లి నుంచే కాకుండా దూర ప్రాంతాలైన విశాఖపట్నం, విజయనగరం, భీమునిపట్నం నుంచి తరలివచ్చిన భక్తులు స్వామిని దర్శించుకున్నారు.

అరకులోయ టౌన్‌: ప్రముఖ పర్యాటక కేంద్రమైన అరకులోయలో వెలసిన శ్రీ వేంకటేశ్వర స్వామి వారి కల్యాణ మహోత్సవం ఆదివారం ఘనంగా జరిగింది. స్వామివారి ఆలయం నుంచి ప్రధాన రహదారి మీదుగా ఊరేగింపు నిర్వహించారు. నర్సింగరావు (బుజ్జి), బుజ్జి దంపతుల ఇంటివద్ద పెళ్లిమాటల ఘట్టం నిర్వహించారు. ఆలయ అర్చకుడు బాల గణేష్‌, కశింకోటలోని శ్రీ వేణుగోపాల స్వామి దేవస్థానం, శ్రీ మారుతి విద్యాపీఠం ఆగమ పండిట్‌, అర్చక ఎగ్జామినర్‌ శ్రీమాన్‌ రేజేటి శ్రీరామచార్యులు (రాంబాబు) శాస్త్రోక్తంగా జరిపించారు. కల్యాణం తిలకించేందుకు పరిసర గ్రామాల నుంచి పెద్ద ఎత్తున భక్తులు తరలివచ్చారు. ఆలయ కమిటీ చైర్మన్‌ సమర్థి రఘునాథ్‌, ఉత్సవ కమిటీ చైర్మన్‌ అప్పలరామ్‌, కార్యదర్శి అప్పు, కామేష్‌, ఆలయ కమిటి మాజీ ప్రతినిధులు కాపుగంటి కృష్ణారావు, ఎల్‌బీ వెంకటేశ్వరరావు, కొళ్లా రమేష్‌బాబు, దేవభక్తుల వెంకటరావు, చిట్టిబాబు, లకే బొంజుబాబు తదితరులు పాల్గొన్నారు. శ్రీరమాసహిత సత్యనారాయణ స్వామివారి.. ఎటపాక: చోడవరం తోటపల్లిలో వేంచేసియున్న శ్రీరమాసహిత సత్యనారాయణ స్వామి వారి కల్యాణం ఆదివారం ఘనంగా నిర్వహించారు. ఉదయం నుంచి ప్రత్యేక హోమాలు, పూజలు ఆలయ అర్చకులు నిర్వహించారు. ప్రత్యేకంగా అలంకరించిన మండపంలో స్వామి వారిని కొలువుదీర్చారు. ఉదయం 11 గంటల నుంచి మధ్యాహ్నం రెండు గంటల వరకు కల్యాణ ఘట్టాన్ని నిర్వహించారు. పొరుగు రాష్ట్రాల నుంచి వందలాది మంది భక్తులు తరలివచ్చి స్వామి వారి తీర్థ ప్రసాదాలు స్వీకరించారు. సుండ్రుపుట్టులో వీరబ్రహ్మేంద్రస్వామి.. సాక్షి,పాడేరు: సుండ్రుపుట్టులోని వీరబ్రహ్మేంద్రస్వామి ఆలయంలో గోవిందమ్మ సమేత వీరబ్రహ్మేంద్రస్వామి వారి కల్యాణోత్సవాన్ని విశ్వబ్రహ్మణ సంఘం ఆధ్వర్యంలో ఆదివారం ఘనంగా నిర్వహించారు. పాడేరు మోదకొండమ్మతల్లి ఆలయం తరఫున పట్టు వస్త్రాలను ఆలయ కమిటీ ప్రధాన కార్యదర్శి కొట్టగుళ్లి సింహాచలంనాయుడు తదితరులు ఉరేగింపుగా తీసుకువెళ్లి అందజేశారు. మధ్యాహ్నం అన్నసమరాదన నిర్వహించారు. సాయంత్రం స్వామి వారి ఉత్సవ విగ్రహాలను పల్లకిలో పాడేరు పురవీధుల్లో ఉరేగించారు.