గుజరాత్ అసెంబ్లీలో ఆల్కహాల్ దాడి

గుజరాత్ రాష్ట్రంలో మద్య నిషేధాన్ని సక్రమంగా అమలు చేయడం లేదని ఆరోపిస్తూ ఆల్కహాల్ వ్యతిరేక ఆందోళనకారుడు బాబూభాయ్ శంకర్‌దాస్ పటేల్ రాష్ట్ర అసెంబ్లీలో ఆల్కహాల్ దాడికి దిగాడు. 70 ఏళ్ల పటేల్ ఓ ప్లాస్టిక్ సంచిలో ఆల్కహాల్ నింపుకొని  అసెంబ్లీ ప్రేక్షకుల గ్యాలరీలోకి ప్రవేశించాడు. అసెంబ్లీ సమావేశాలు ప్రారంభమవుతుండగా ఆల్కహాల్ సంచీ సభలోకి విసిరేసి కరపత్రాలను వెదజల్లాడు.

రాష్ట్రంలో మద్యం నిషేధాన్ని పటిష్టంగా అమలు చేయాలని ముఖ్యమంత్రి ఆనందిబెన్ పటేల్‌తో పాటు సభా స్పీకర్, సభ్యులను ఆ కరపత్రాల్లో డిమాండ్ చేశారు. నాడు ఢిల్లీ అసెంబ్లీలో నాటుబాంబులు విసిరి, కరపత్రాలు వెదజల్లి నిరసన వ్యక్తం చేసిన భగత్ సింగ్, సుఖ్‌దేవ్, రాజ్‌గురులను స్ఫూర్తిగా తీసుకొని వారి సంస్మరణ దినోత్సవం నాడు పటేల్ ఈ ఆల్కహాల్  నిరసనకు పాల్పడ్డారు.